SO KAPHAGANADA KO ILMO siko aGAMA Islam

SO KAPHAGANADA KO ILMO siko aGAMA Islam So podi a go bantogan na rk o Allah a kadnan a isaysa a miphantao ko kapur-an o 'Arsh, so Salawat na go Salam na bagi- an o Nabi tano a Muhammad go so mga Sahaba niyan ago mga Pamilya niyan a mga tao a pagalongan o salakaw disalakaw ko dii kaphagagama. Kapaganad sa ilmo siko agama Islam So kaphaganada ko agama Islam'mama antaa Ka babae'wata Ka antaa Ka mala a tao'' So kaphaganada ko agama Islam na apiya andangka phaganada so ilmo siko Islam..pagari akn na pakandaklangka so kapmbtyaa Ka sa mga kitab mga books about siko Islam'' Amay ka mada rkanan na didn makala so ilmo oka so suwaaka siko islam'' Pamimikiranangka o peray mingi murais a surah sa qur an'? Go mga dua'go mga mas ala'so mga okit okit o sambayang so mga dua awn'so mga okit okit o kabgay sa zakat so kapuasa? pagari akn''pagitungangka a ginwangka o Malo mala a myassuwaaka siko Islam?? Inu phakabtyaaka sa qur an?odi na pkha kurof Ka?? Pamimikiranangka anan.'so ilmo na gyanan a kakhatoonangka ko allah. ﻣﻦ ﺍﻻﺣﻜﺎﻡ ﺍﻟﻤﺴﺎﻭﺍﺓ ﻓﻴﻬﺎ ﺍﻟﺮﺟﻞ ﻭﺍﻟﻤﺮﺍﺓ PD KO MGA HOKOMANO ISLAM AMLAGIDON SO MAMA AGO SO :BABAE .1 So kathontot sa Ilmo ko Islam. Aya dalil sa hadith na so khatharo o Rasol (s.a.w.) so kathontot sa Ilmo na paliyogat sii ko langowan a muslim a mama ago so muslim a babae. Pithro o Allah: ﻓﺎﺳﺄﻟﻮﺍ ﺃﻫﻞ ﺍﻟﺬﻛﺮ ﺇﻥ ﻛﻨﺘﻢ ﻻ ﺗﻌﻠﻤﻮﻥ na izai niyo so adn a katao niyan o skano na di niyo katawan. . So Katao "Ilmo" makapantag ko kokoman o kapaganadawn na dowa barang: 1. Fardho Kifayah: aya Fardho Kifaya na Wajib anan a o nggalbka o sabaad ko mga Muslim na di khadosa so dawn nggalbk, na o da a nggalb'kon na langon miyadosa so mga Muslim. 2. Fardho 'Ayn: aya Fardho 'Ayn na so Wajib dn ko oman i isa a Muslim, Babay Mama na wajib a manggalbk yan. na aya mga Ilmo a Fardho 'Ayn so kapaganadawn na so Okit a kinggolalan'n ko mga Simba, basta a Simba a Wajib na Fardho 'Ayn a kapagadawn na odi paganada o Muslim na miyadosa, Lagid o okit a kashambayang. Basta a Simba a kailangan dn a manggalbk ka na Fardho 'Ayn a kokoman o kinggolalan'n kawn. Na so kadaklan ko mga Ilmo na Fardho Kifayah so kapaganadawn. So kapaganad sa Ilmo na pd anan ko mga pipiya a simba ko Allah, go pd anan ko Jihad sa lalan ko Allah, pitharo o Nabi "saw" [ ﻣﻦ ﺧﺮﺝ ﻓﻲ ﻃﻠﺐ ﺍﻟﻌﻠﻢ ﻓﻬﻮ ﻗﻲ ﺳﺒﻴﻞ ﺍﻟﻠﻪ ﺣﺘﻰ ﻳﺮﺟﻊ ... ﺭﻭﺍﻩ ﺍﻟﺘﺮﻣﺬﻱ ] sa tao a "lomiyo" lomalakaw sa pantag sa kathontot sa Ilmo na sii skaniyan sa Lalan ko Allah taman sa di mbalingan "komasoy". Batabo labaw ron sa masa tano imanto a tanto dn a Mindakl so mga Bid'ah, mindakl so mga tao a diinggalbk sa Bid'ah, mindakl so mga Tao a aya ip'phanoloniran ko mga Tao na so Bid'ah, na mindakl dn mambo so ka-ignorante ko Agama, mindakl so mga tao a apya so katharo-a ko LA ILAHA ILLALLAH [ ﻻ ﺇﻟﻪ ﺇﻻ ﺍﻟﻠﻪ ] na diiran khasowa, na makin mawto pn a kababaloy iran a ignorante ko Agama na mga papasang pn i kambitiyara makapantag ko Agama, na miyadadag siran na miyakadadag siran pn, go mindakl so dii kaphapawala o mga Tao sabap ko kakhokorang o sabot ko Agama. Na giyangkai a tlo Barang a miya aloy tano na miyabaloy tano [ 1. kiyandakl o Bid'ah, 2. kiyapakalawlad o kadaa sabot ko Agama, 3. kiyandakl o mga Tao a p'phangokom sa dii niyan katawan ] na miyabaloy niyan so kapaganada ko Agama a tanto dn a kailangan ko oma i isa a Muslim sabap sa kailangan tano so mga Tao somasabot ko Agama ka an kabulongi angkai a kapakmbaba-oman o Agama Islam ko dii tano kapaging'd ka gophoon ayandakl so mga Tao a p'phaminasa na phakalawlad so kandosa na khada so titho a Agama a mini talingoma o Nabi "saw". Kailangan tano so kasabota tano ko Agama ka antano mabaton sa kababawan so Omat tano, antano ka-ompiya-i so miyabinasa ko dii tano kaphaging'd sabap ko dii kandosa o mga Tao a disomasabot ko Agama a go so mga Tao a miyaganad sa Ilmo a badn miyaka ibarat sa somiyagb sa ig na aya miyasagb yan na L'bog a ig a o maka inom kawn na khasabapan sa bangkadn kaprayor. Pitharo o Nabi "saw" [ ﺑﺪﺃ ﺍﻹﺳﻼﻡ ﻏﺮﻳﺒﺎ ﻭ ﺳﻴﻌﻮﺩ ﻏﺮﻳﺒﺎ ﻛﻤﺎ ﺑﺪﺃ ﻓﻄﻮﺑﻰ ﻟﻠﻐﺮﺑﺎﺀ ، ﻗﺎﻟﻮﺍ ﻣﻦ ﻫﻢ ﻳﺎ ﺭﺳﻮﻝ ﺍﻟﻠﻪ؟ ﻗﺎﻝ: ﺍﻟﺬﻳﻦ ﻳﺼﻠﺤﻮﻥ ﺇﺫﺍ ﻓﺴﺪ ﺍﻟﻨﺎﺱ ... ﺭﻭﺍﻩ ﻣﺴﻠﻢ ] miyanagipoon so Islam sa ikksa "strange" na ph'mbalingan a ikksa sa lagid o kiyapanagipoon yan, na sayana a miyagontong so mga tao a ikksa "strangers", na pitharo o mga Sahaba "ra" : Antaa siran ya Rasulallah? na tigyan a siran so mga Tao a p'phangompiya odi na thatagompiya igira a mimbinasa odi na miyabinasa so mga Tao. Go so mga Tao a miyamaganad sa Ilmo na siran so mga tao a biyantog o Allah sa Qur-an a go biyantog o Nabi tano a Muhammad "saw" Pitharo o Allah sa Qur-an [ ﺇﻧﻤﺎ ﻳﺨﺸﻰ ﺍﻟﻠﻪ ﻣﻦ ﻋﺒﺎﺩﻩ ﺍﻟﻌﻠﻤﺎﺀ ... ﺳﻮﺭﺓ ﻓﺎﻃﺮ ] mataan a ayabo man a tao a ikakalk yan so Allah na so mga ala i sabot ko Agama. Go pitharo iyan pn [ ﻫﻞ ﻳﺴﺘﻮﻱ ﺍﻟﺬﻳﻦ ﻳﻌﻠﻤﻮﻥ ﻭ ﺍﻟﺬﻳﻦ ﻻ ﻳﻌﻠﻤﻮﻥ ... ﺳﻮﺭﺓ ﺍﻟﺰﻣﺮ ] ba maka ph'lagid so miyamakasowa a go damamaka sowa? Go pitharo o Nabi "saw" [ ﻣﻦ ﻳﺮﺩ ﺍﻟﻠﻪ ﺑﻪ ﺧﻴﺮﺍ ﻳﻔﻘﻬﻪ ﻓﻲ ﺍﻟﺪﻳﻦ ﻭ ﺇﻧﻤﺎ ﺍﻟﻌﻠﻢ ﺑﺎﻟﺘﻌﻠﻢ ... ﺭﻭﺍﻩ ﺍﻟﺒﺨﺎﺭﻱ ] sa tao a kabaya o Allah a makowa a mapiya na phakisabotan yanon so Agama, go mataan a ayaboman a kashabota ko Agama na maka okit sa kapaganad. Go pitharo iyan pn [ ﻣﻦ ﺳﻠﻚ ﻃﺮﻳﻘﺎ ﻳﻠﺘﻤﺲ ﻓﻴﻪ ﻋﻠﻤﺎ ﺳﻬﻞ ﺍﻟﻠﻪ ﻟﻪ ﺑﻪ ﻃﺮﻳﻘﺎ ﺇﻟﻰ ﺍﻟﺠﻨﺔ ... ﺭﻭﺍﻩ ﻣﺴﻠﻢ ] sa tao a mokit ko Lalan "lomalakaw" sa pantag bo sa phangdg sa Ilmo, na l'bod'non o Allah sa Lalan a khitompa "khisold" sa Sorga. Na pd ko mga Ilmo a Fardho 'Ayn a kapaganadawn na so Okit a kabatiya sa Qur-an, sabap sa so Qur-an na katharo anan o Allah, na omangkawn maribat ko kaph'mbatiya-angkawn na masaling so Maana niyan na o maalin so Maana o katharo o Allah na miyadosa so Manosiya. Go so Fatiha na Rokon anan o Sambayang, na odi mabatiya o Tao sa correct so Fatiha ko kap'shambayang yan na Batal so Sambayang yan. Sabap san na Wajib "Fardho 'Ayn" so kapaganada ko kabatiya sa Qur-an. Ogaid na mbida pman so Tao a p'kharibat ko kabatiya sa Qur-an a pananagontamanan yan i kasowa-a niyanon a go so tao a di phaganad, aya madodosa na so Tao a di niyan phaganad'n ka Fardho 'Ayn so kapaganadawn na miyadosa ka da panagontaman sa kapaka paganad yan na miyatiya pman sa Qur-an na miyadosa pman ka miyangariribat pman ko kabatiya a ko katharo o Allah. Pitharo o Nabi "saw" [ ﺍﻟﻤﺎﻫﺮ ﺑﺎﻟﻘﺮﺁﻥ ﻣﻊ ﺍﻟﺴﻔﺮﺓ ﺍﻟﻜﺮﺍﻡ ﺍﻟﺒﺮﺭﺓ، ﻭﺍﻟﺬﻱ ﻳﻘﺮﺃ ﺍﻟﻘﺮﺁﻥ ﻭﻳﺘﺘﻌﺘﻊ ﻓﻴﻪ، ﻭﻫﻮ ﻋﻠﻴﻪ ﺷﺎﻕ، ﻟﻪ ﺃﺟﺮﺍﻥ ... ﺭﻭﺍﻩ ﻣﺴﻠﻢ ﻭ ﺍﻟﺒﺨﺎﺭﻱ ﻧﺤﻮﻩ ] so mapasang "biyaksa" ko Qur-an na tagpda o mga Mala-ikat a mga ala i Simba, na so pman so tao a ph'mbatiya sa Qur-an a diiyon thang'ndod go p'khapasanganon na bagi-an yan so dowa a Balas. Dowa i balas so mananagontaman : 1. balas o kabatiya sa Qur- an, 2. balas o panagontaman yan. Maka sabap san na Managontaman tano mga pagari ami ko kasabota tano ko Agama tano, go managontaman tano sa kasowa-a tano ko kabatiya-a ko katharo o Kadnan tano, Panagontamanan tano so kasabota tano ko Qur-an. Phakawriyan ko ron: Pitharo o Nabi "saw" [ ﺧﻴﺮﻛﻢ ﻣﻦ ﺗﻌﻠﻢ ﺍﻟﻘﺮﺁﻥ ﻭ ﻋﻠﻤﻪ ... ﺭﻭﺍﻩ ﺍﻟﺒﺨﺎﺭﻱ ] aya pirmo rkano "daa ona-an yan sa kapiya" a tao na so piyaganad yan so Qur-an go inipamang'ndao niyan. ﻦ ﻳﺮﻳﺪ ﺧﻴﺮﺍ ﻓﻰ ﻣﻜﺎﻧﻴﻦ ﻗﻠﻴﻔﻘﻪ ﺍﻟﺪﻳﻦ SADN SA TAO A KABAYA IYAN A MAKOWA NYAN SO MAPYA SA GYA DOWA DARPA (DONYA / AKHIRAT )PAGANADA NYAN SO ...AGAMA Balasangkawn a ALLAH na batyngka ini go pag share ka'angka makakuwa sa balas. Wassalamo 'Alaikom w.w.

kazadqa

SO LANGOWAN O BANTOGAN NA PALAYA MATATANGK’D A R’KO ALLAH, SO S’NANG NAGO SO RINAW NA SIE KO NABI MUHAMAAD SALLA LLAHO ALAIHI WASALLAM , NAGO SIE KO MGA PAMILY A NIYAN , NAGO SO MGA BULAYOKA IYAN, KALANGOLANGOWAN IRAN… 0RIYAN IYAN: Bapirapira e sadaqa a kiyasabapan sa kiyapaka lidas sa kamarg’nan? Nago ba pirapira e sadaqa a miyapar’ng iyan so rarangit o kadnan o mga langit ago lupa(Allah) nago ba pirapira e awida akal , kasimpit a kapagoyag, awida akal a misabap sa sadaqa a tulabos a ikhlas a para ko Allah , a inibgay o mo’omin ko maka kikinanglan a miskin na miya ona a kiya tarimaaon o Allah ko onaan o daron p’n katarimaa omb'ganon a miskin, aya mambo a resulta niyan ko misadqa na sindaw na toroan, na kapaka lidas , kapaka apas sa dunya na sampay sa alongan a mawri. So mga hadith ago so mga ayat o Allah sa qur’an mipantag san nago so diniyanon kipangoyat’n , so kalbihan o sadaqa na tanto a madak’l. Lagidiyan mambo so kiyasinagadan o mga barasadka na tanto mambo a madak’l, ipoon dn ko miyanga ona a masa na taman sa masa tano aya na taman dn sa kabangkita ko dunya na didn kapos a kap’ki- ilayin o Allah ko kalbihan o sadaqa nago so kipantag iyan na pkasangan iyan ko kap’gintaw mlagid so mapayag ago so masul’n , a ayad’n a kalilid na dimag’g’dam o kadaklan ko mga taw, apiya p’n mismo igira na so misadqa na diniyan kagdam sa aya b’s a kiyasabapan sa kiya libri niyan nagu kiyapaka apas iyan ko mga murala nago mga tiyoba na sabap sa sadaqa. Tarotop dn a daa sangkaan san o puso. Sabap sa giyangkaya a map'nothol tano saya na miyakalala a tanda a daleel sa kalbihan o sadaqa na kasadqa , sa mataan a ipaka libri nago lidas ko awida akal, kasimpit a kapagintaw. SO IMAM ALSHAWQANIE (rahimahollah) na isa skaniyan a kiyadayoan a p’d ko mga ulama a miyanga una a miyagin'taw sa Yaman. Madak’l a mini b’gak iyan a mga kitab, isawn na so kitab iyan a bituwan iyan sa (Albadrol Talie’ Bimahasin maa Ba’adal Qar’n Assaabie). Miya-aloy niyan a giyangkaya a tothol a piyakamemesa mipantag sa kalbihan o sadaqa. Lumiyangkap a giyangkaya a tothol sa inged a Yaman, sa giyangkoto a masa na dap’n a ba mga telephone lagid a giyangkaya a masa tano, pgalowin tano aya ka para dimap’ngantap nago so sangkaan na mada sa dimapikir a iringan sa tig odi na salakaw san… Opama bo ka da kadayoi na kiya bantogan sa katawan so miya notol saya, nago mataan a so Allah na daa baron mustaheel ka langowan taman na g’ganiyan, na dini matarima o ginawa ka piyakamemesa… ugaid na so Allah na piki-ilay niyan so mga tanda iyan sa sadn sa kabaya iyan. KATAYA SO TUTHOL: Adn a sakataw a mama a salih sa isa a darpa sa Yaman, aya ngaran a darpa oto na giya a (ALHAMRAH), sie aya matatago a darpa aya sa tumampar sa s’d’pan a Yaman, maran i sa Bahrol Ahmar, aya galb’k a giyangkoto a mama na kambasok, salakaw ko kambasok na aya b'tad iyan na katawan a mapiya e amal, SALIH mapaparatiyaan ko Allah nago mapasang e ka SADAQA, dieniyan gastoon so tamok iyan sa lalan ko Allah , ip'nga-limo iyan so mga p’kamerm’ran (miskin) batabolabaw so mga p'managed nago so p'ka-kalang sa lalan. Mimbalay a giyangkoto a mama a salih sa masjid, na tiyagoan iyan sa solo, palitaan na p’totodan oman magabi para ko p'managed, nago pangn’ngk’n a ip’nggabi para ko maka kikinanglan, amay ka adn a maka kikinanglan ko pangn’ngk’n na paki kan iyanon oda na k’niyan nago so pamilya niyan, oriyan iyan na manambayang sa sunnah , manahadjud sie ko kagagawie… na giyoto d’n e b’tad iyan nago ulawla niyan. Oriyan o sumiyagad a mga masa, miyasugat a Yaman a taon nago laon, sa taman sa kiya iratan so mga lawasaig taman ko mga kalot a tabay na miyati so ig iyan. Sabap sa giyangkoto a mama na aya galb’k iyan na kambasok na kaylangan iyan so ig para ko babasoka iyan nago ko diiniyan kapagintaw nago so pamilya niyan, sie ta sa so tabay a giyang koto a mama na miyati so ig iyan, na kiyalot iyan pdiyan so mga wata iyan, sie ko masa a kapkalota niyanon na gomitobar so tabay na kiyatambonanon skaniyan, taman sa minitobakon sa tarotop so tabay, maana a kiyatambonanon d’n. Kiyadaan non sa panginam so mga wata iyan oba p’n mauyag si ama iran taman sa dairan dn kalota sa giyangkoto a tabay sa tigiran a ginan dn e kubor iyan.. Giyoraokan iran , siyambayangan iran , oriyan iyan na pimbagi bagi iran (mga wata iyan) so tamok a giyangkoto a mama sa paratiyaya iranon na miyawapat d’n. Ugaid na aya di katawan o mga wata agiyangkoto a mama e miyanggolawla e ama iran sa didal’m oto a tabay a minitubak? Sabap sa takdir o kadnan na so kinitobak a giyangkoto a tabay na si ama iran na mini sampay ko misusunggir’b ko didal’m a giyangkoto a tabay , na miya ologon a mala a kayo na miyasandigon na miyarnon so lupa ,( miya sowa iyan so dindingali) miya tatap roo a giyangkoto a mama sa didal’m oto a tabay sa apiya so mga tindoro iyan na diniyan k’nonowan sa kalibot’ng iyan, sie sa giyang koto a masa na miyaka oma so tabang o Allah, karamah a poon ko Allah, miya ka talingoma so kaloag ko oriyan o kasimpit… miyaka talingoma so sangan na balas o sadaqa, sie ko masa a kak’kaylanganaron, bad’n miyatkaw a sindaw a palitaan sie ko kaporoan a giyangkoto a mama ko onaan a giyangkoto a gir’b, (mimbaloy a gir’b a giyangkoto a tabay a minitobar )giyangkoto a sindaw/palitaan na miyabaloy a ayaniyan p'kinono sa giyangkoto a didal’m a tabay a minitobar, aya dn oto a mimbaloy a kubor iyan a temporary… oriyan iyan na miya ilay niyan a pangn’ngk’n a lagid d’n o p’gnat’n iyan ko mga miskin oman gagawie. Giyangkoto a pangn’ngk’n na p’katalingomaon oman magabi, giyoto mambo e p’kitoos iyan sa miyagabi igira a miyaka talingoma a giyangkoto a pangn’ngk’n. Aya niyan miyagalb’k na dinduwa’a ko Allah, dimanambayang , nago diin-zik’r. Miya tatap a giyangkoto a mama a salih sa giyang koto a didal’m a tabay a mini tubak sa miyakan’m ragon, sa ron dn makakalaboso. Sa ayadn a b’tad iyan na giyangkoto a miya aloy, (duwa’a, zik’r, sambayang) oriyan o miyakan’m ragon na miyapikir o mga wata iyan na kalot’n iran p’roman a giyangkoto a tabay sa panagombalayin iran p’roman, taman sa kiyalot iran . gowani a misampay siran sa didal’m o tabay ko b’ngawan o misusunggirbon !!! Tithodn a piyakamemesa , nago dik’tarima, a pakatkaw! Guwani a mailay iran si ama iran a oyagoyag a daa sakit iyan sa kapipiya ginawa!!! Gowani a isa iranon o antonaay miya olawla na piyanotol iyan kiran. Miyatangk’d sa ginawa iran a mataan a giyangkoto a p’paka talingoma ron a pangn’ngk’n na giyoto so SADAQA na pkatalingoma ron sa giyangkoto a katatagoanon taman sa miyaka liyoron ko oriyan o miyakan’m ragon. Tanto ko mala a balas a imbegay o Allah sii ko tao a mapasang i kasadka. Madakel a miyaaloy ron sa Quran ago Hadith. Na ped ron giyangkai a pagaloyn tano. 1. So kasadka na lalan ko kapakasoled sa sorga. 2. So kasadka na dalil o paratiyaya o manosiya. 3. So kasadka na pkalekeban iyan so pitopolo a paytaw o manga shaytan. 4. So kasadka na maphakada iyan so rarangit o Allah. 5. So kasadka na mapephakabager iyan so sakit o manosiya. 6. So kasadka na lending ko naraka. 7. So kasadka na sirong ko alongan a da a kasirongan inonta bo so sirong-sirongan o Allah. 8. So kasadka na maphakalendo iyan so omor o manosiya balabaw ron opama ko aya sadkai niyan na manga tonganay niyan. 9. So kasadka na pekalending iyan so tiyoba. 10. So kasadka na maphakapiya niyan so okit a kapatay go mapakalebod iyan. 11. So kasadka na pekapadeng iyan so manga dosa sa lagid o kapephadenga o ig ko apoy. 12. Ipephamangni o manga malaikat sa mapiya so disadka. 13. So kasadka na knaba niyan pekalebatan so tamok o misadka. Aya mataan na mapepakaolad iyan so rizki niyan go pekathagowan sa barakah. 14. So kasadka na ped ko mangapipiya a sipat o Rasulullah sallallahu alayhi wa sallam. 15. So kasadka na pekiporo iyan so pangkatan o manosiya go ipephakarani niyan ko Allah. 16. So kasadka sa lalan ko Allah na petake-takepen o Allah sa balas iyan sa taman sa pito gatos takep sa taman sa sobo so Allah i matao ron. 17. So sadka na mapepakabager iyan so kanggiginawai. 18. So sadaqah jariyah lagid o kambalay sa masjid, madrasah, umbak, lalan go nganin san a di kanggonaan o manosiya. Taman ko kapamomolaan sa kayo na phekioma ko misadka so balas iyan iyan apiya sii ko kobor iyan, apiya miyawafat den sekaniyan. 19. So kasadka sa yatim (wata a ilo) na marani ko Rasulullah sallallahu alayhi wa sallam sii sa sorga. 20. Biyantog o Allah sa Quran so manga barasadka. So kala balas o kasadka na depende ko kabager i niyat o manosiya a panonowatan iyan ko Allah go so minisakripisyo niyan ron. Go sa kala pen a misadka o tao na kala mambo a balas iyan. Go balabaw ron igira aya kiyapakaokit o sadka na sii ko tanto a makakikinanglan ron. Lagid o sii ko manga miskin, wata a ilo, balo, makauutang, pamangaroma, sa lalan ko Allah. Aya pen oba ped ko manga tonganayng ka. Go aya pen oba ayangka di kanggastoi na so pamilyang ka a paliyogat reka. Allahu akbar! Na giyangkanan a miyangaaloy tano a manga balas na knaba giyanan bo i balas iyan ka madakel pen. Na ino so Muslim na kiyasokodan rekiyan apiya isa sangkanan a miyangaaloy a mitolod iyan a ginawa niyan a sadka mambo. Tawfiqan tano o Allah sa madakel a mapiya. Lagid angkanan a makakikinanglan a pagari tanu anan ka gyanan I titho a pzadqaan ka kailangan niyan..pagari akn o maadun rka so kapdi go limo na kapdiin tanu a pagari tanu anan..gyanan I myamakalala a balas.. Reference: BAD’R ALTALIE 1/493 O AD’N A MATOON KAON A RIBAT ODI NA KORANG NA PAKA TIYOLINANG KA, ODI NA TAROPOPANG KA SA MOKIT SA HIKMA SOBO SO ALLAH E DAA PAAWING IYAN NAGO TAROTOP NA DIK’RIBAT!!!

mi'raj. o nabi

Al-Isra ago Al-Mi'raj Al-Isra ago Al-Mi'raj {So piyakamemesa a kagagawi-i a kiyapakasongowa o Allah ko Rasulullah (Sallallahu ‘Alayhi Wasallam) sa Masjid phoon sa Makkah taman sa Masjid Al-Aqsa sa Jerusalem [Al-Isra] ago a kiyapakapanik o Rasulullah (Sallallahu ‘Alayhi Wasallam) sa langit.} Sii ko masa a so Rasulullah (Sallallahu ‘Alayhi Wasallam) na mithagompiya sekaniyan ki khiphanolonen iyan ko Agama oriyan o kaprastaon o manga ridoay o Agama, na aden a kagagawii a lomilintad so langowan na miyawla-ola so piyakamemesa sii ko kawiya-wiyag o Rasulullah (Sallallahu ‘Alayhi Wasallam), giyoto so Al-Isra ago Mi’raj. ﺳﺒﺤﺎﻥ ﺍﻟﺬﻱ ﺃﺳﺮﻯ ﺑﻌﺒﺪﻩ ﻟﻴﻼ ﻣﻦ ﺍﻟﻤﺴﺠﺪ ﺍﻟﺤﺮﺍﻡ ﺇﻟﻰ ﺍﻟﻤﺴﺠﺪ ﺍﻷﻗﺼﻰ ﺍﻟﺬﻱ ﺑﺎﺭﻛﻨﺎ “Soti so (Allah a) piyakalalakaw Niyan so oripn Iyan (a Mohammad) ko kagagawii phoon ko Masjid Al-Haram sii ko Masjid Al-Aqsa, so piyakandaklan Ami sa mapiya so mliliyota on, - ka phakaylayn Ami skaniyan ko manga tanda Ami: Mataan! a so Allah so Pphakan´g, a Pphakaylay.” [Surah Al-‘Isra 17:1] Madakel ko manga Ulama na da iran pagayon-ayoni o anda so kiyawla-ola o Al-Isra wal Mi’raj. So sabaad na aya tindeg iran na so kiyawafat o bapa iyan (s.a.w.) a Abu Talib, so peman so sabaad na so kiyawafat o darodopa iyan a Khadijah (Radiallaho ‘Anha). So peman so sabaad na kataya so tindeg iranon: 1.Miyatharo a so kagagawii a Isra na miyawla-ola ko gawii a kiyabaloy o Rasulullah (Sallallahu ‘Alayhi Wasallam) a Nabi o Allah na giyaya so tindeg a makapopoon ko At-Tabari. 2. Miyatharo a miyawla-ola so Al-Isra wal Mi’raj sii ko ikalima ragon a kababaloy niyan a Nabi na giyaya so tindeg o Imam An- Nawawi ago Al-Qurtubi. 3. Miyatharo a miyawla-ola so Al-Isra wal Mi’raj sii ko kagagawii o ikadowapolo ago pito ko bolan a Rajab ko ikasapolo ragon a kababaloy niyan (s.a.w.) a Nabi na giyaya so tindeg o Al-‘Allamah Al-Mansoor Furi. 4.Miyatharo a miyawla-ola sii ko ikasapolo ago nem olan a da niyan (s.a.w.) pen kapakawma sa Madinah sii ko bolan a Ramadhan a ikasapolo ago dowa a kiyabaloy niyan (s.a.w.) a Nabi. 5.Miyatharo a miyawla-ola ko dowa olan a da niyan (s.a.w.) pen kapakawma sa Madinah, bolan a Muharram sii ko ikasapolo ago telo ragon a kababaloy niyan (s.a.w.) a Nabi 6. Miyatharo a miyawla-ola saragon a a da niyan (s.a.w.) kapakawma sa Madinah, sii ko bolan a Rabi’ul Awwal a ikasapolo ago telo ragon a kababaloy niyan (s.a.w.) a Nabi. So kiyaaloya ko miyawna a telo a tindeg na sabap ko kiyawafat o darodopa iyan (s.a.w.) a so Khadijah (Radiallaho ‘Anha) sii ko bolan a Ramadhan, sii ko ikasapolo ragon a kababaloy niyan (s.a.w.) a Nabi, a so kiyawafat iyan na dapen minggolalan so lima a waqto a sambayang. Na so kiyawajib o lima waqto a sambayang minisogo sii ko kagagawii o Al-Isra. So peman so telo a miyalamba a tindeg na da miyatoon a mabager a daleel iyan inonta so miya-aloy sa Qurah a Al-Isra a miyanggolawla ko miyawri a manga ragon a kababaloy a Nabi o Rasulullah (Sallallahu ‘Alayhi Wasallam) Piyanothol o Ibn Qayyim (Radiallaho ‘Anhu): Ko kagagawii, somiyong so Rasulullah (Sallallahu ‘Alayhi Wasallam) sa Baytul Maqdis sa Jerusalem iphoon sa Masjid Al-Haram. Sii ko pageletan o kapakanaw ago katotoroga rakaniyan na kiyalkaan so atep o walay niyan sa Makkah na miyakawma so Jibril (‘Alayhis Salam) a ped iyan so Mikaeel ago so Israfeel (‘Alayhimus Salam), sa maawid siran sa datar a palanggana a bolawan sa likaan o Jibril (‘Alayhis Salam) so rareb iyan sa inonaban iyanon so poso iyan na pino iran a ‘ilmo ago paratiyaya. Piyakada iran sa pangangayamen a pembethowan sa Al-Buraq (maputi a pangangayamen a datar o koda) a ped iyan so Jibril (‘Alayhis Salam) na miyanog siran sa Baytul Maqdis (Masjid Al-Aqsa). Initambed iyan (s.a.w.) so Al-Buraq sii ko matiboron a datar o sising a matatago ko paytaw o Masjid. Somiyoled sekaniyan (s.a.w.) sa Baytul Maqdis sa Jerusalem na miyawma niyan roo so manga Nabi. Taros a mizambayang siran ped so manga Nabi sa sekaniyan i Imam. So kiyapakapasad iran zambayang na inenatan sekaniyan o Jibril (a.s.) sa inomen a pakabereg, gatas ago teneb taros sa aya kinowa o Rasulullah (s.a.w.) na so gatas sa tig o Jibril (a.s.) a “miyapili ka so iniganat sa Dalem a Kandang, o peman o miyapili ka na so pakabereg na sabnar a khadhadag so Ummat ka.” Na mapasad oto na kiyaptan sekaniyan o Jibril (‘Alayhis Salam) sa lima sa miyangimporoan siran sa kababaan a pangkatan o langit. So Jibril (‘Alayhis Salam) na ini-odas iyan so Rasulullah (Sallallahu ‘Alayhi Wasallam) a makasoled taros a kiyalkaan na miyakasoled sekaniyan (s.a.w.). Miyaylay niyan roo so Adam (‘Alayhis Salam) na somiyalam sekaniyan sa kalilintad sa simbag mambo o Adam (‘Alayhis Salam) so salam iyan, a pzaksian iyan so kababaloy a Nabi o Rasulullah (Sallallahu ‘Alayhi Wasallam). Piyaki-ilay rekaniyan (s.a.w.) o Allah so manga niyawa o manosiya a zasagorompong a siran so phamakasorga ko mbawataan o Adam na sa diwang na zasagorompong so manga manosiya a phamaka-Naraka ko mbawataan o Adam. Mapasad oto na miyangimporo-an siran ko Jibril (a.s.) sa ikadowa Langit na miyawma iran so Nabi Yusuf (‘Alayhis Salam) [a wata o Zakariyyah] ago so Nabi ‘Isa (‘Alayhis Salam) [a wata o Maryam], taros a siyalam iyan siran na simbag iran mambo so salam iyan, a pzaksian iran so kababaloy a Nabi o Rasulullah (Sallallahu ‘Alayhi Wasallam). Na mapasad oto na miyangimporoan siran ko Jibril (a.s.) sa ikatelo a Langit taros a miyawma iran roo so Nabi Yusuf (‘Alayhis Salam) na siyalam iyan sa simbag mambo o Nabi Yusuf (a.s.) so salam, a pzaksian iyan so kababaloy a Nabi o Rasulullah (Sallallahu ‘Alayhi Wasallam). Mapasad oto na miyamngimporoan siran ko Jibril (a.s.) sa ikapat a langit na miyawma iran roo so Nabi Idris (‘Alayhis Salam) na siyalam iyan sa simbag mambo o Nabi Idris (a.s.) so salam, a pzaksian iyan so kababaloy a Nabi o Rasulullah (Sallallahu ‘Alayhi Wasallam). Mapasad na miyangimporoan siran ko Jibril (a.s.) sa ikalima a langit na miyawma iran roo so Nabi Haron (‘Alayhis Salam) na siyalam iyan sa simbag mambo o Nabi Haron (a.s.) so salam, a pzaksian iyan so kababaloy a Nabi o Rasulullah (Sallallahu ‘Alayhi Wasallam). Mapasad na miyangimporoan siran ko Jibril (a.s.) sa ikanem a langit na miyawma iran roo so Nabi Musa (‘Alayhis Salam) na siyalam iyan sa simbag mambo o Nabi Musa (a.s.) so salam, a pzaksian iyan so kababaloy a Nabi o Rasulullah (Sallallahu ‘Alayhi Wasallam). Na so kiyalpasa o Rasulullah (Sallallahu ‘Alayhi Wasallam) ko Musa (‘Alayhis Salam) na miyakasghad sekaniyan na inisha-an ingkainoto na tig iyan a: “Giyanan so Muhammad (s.a.w.) a siyogo o Allah sii ko Ummat a oriyan aken na mas madakel a phakasoled sa Sorga a Ummat iyan adi saken”. [tanto a malay limo so manga Nabi ko manga Ummat iran sa di siran di melalawana o antaway madakel a phakasoled sa Sorga ko manga Ummat iran] Mapasad oto na miyangimporoan siran ko Jibril (a.s.) sa ikapito a langit na miyawma iran roo so Nabi Ibrahim (‘Alayhis Salam) na siyalam iyan sa simbag mambo o Nabi Ibrahim (a.s.) so salam, a pzaksian iyan so kababaloy a Nabi o Rasulullah (Sallallahu ‘Alayhi Wasallam). Oriyan niyan na iniporo sekaniyan (s.a.w.) sa Sidratul Muntaha (mala a kayo [lotus tree] a sisii sa kawanan o Allah a di pelepasen o manga Malaikat). Roo na piniki-ilay rekaniyan so Al-Baytul Ma’mur (walay a di zambayangan sa ikapito lapis o langit, roon pezoled so pitopolong gibo [70,000] a manga Malaikat gawi gawii a sa miyawri kiran na diden phakakasoy taman sa di mawma so Alongan a Mawri, maana salakaw so 70,000 a zoled imanto a gawii na salakaw peman so zoled a 70,000 mapita). Oriyan oto na iniporo sekaniyan (s.a.w.) ko Allah sa piyakarani sekaniyanon sa taman aya karani niyanon na datar o pageletan a dowa pana odi na mas marani pen. Iniwahi rekaniyan o Allah so kisogoon ko Ummah o Rasulullah (Sallallahu ‘Alaihi Wasallam) a lima polo (50) a sambayang ko oman gawii. Oriyan iyan na miyanog sekaniyan (s.a.w.) sa kiyasagadan iyan so Nabi Musa (a.s.) na pitharo iyan: “Antonay inisogo reka o Kadnan ka?” Tig o Rasulullah (s.a.w.): “Limapolo a sambayang ko oman gawii”. Tig o Musa: “Kasoy ko Kadnan na pangniyang ka on a lebati Niyan ka di khagaga o Ummat ka”. Na dominingil sekaniyan ko Jibril (a.s.) sa datar oba phangni sa mosawir taros sa mitinyas so Jibril (a.s.) a maana Oway! Na komiyasow sekaniyan sa iniporo sekaniyan o Jibril (a.s.) sii ko Allah. Piyangni niyan a lebati Niyan taros sa libatan sa sapolo. Na miyanog peman sa siyagadan iyan pharoman so Musa (a.s.) na pitharo iyan peman a pikilebati niyan pharoman taros sa komiyasow peman so Rasulullah (Sallallahu ‘Alaihi Wasallam) na miyaparak sa miyakapira pira maka-kasoy ko Allah sa puro taman sa miyabaloy a lima a wakto oman gawii. Sa kiyapakasagad iyan (s.a.w.) peman ko Musa (a.s.) na pitharo ron o Musa (a.s.) a “pikilebateng ka” na somimbag sekaniyan (s.a.w.) a “tanto ak den a pkhaya ko Kadnan aken o ba ken pikilebati ogaid na mapiya den aya”. Miyaaloy i Ibn Qayyim so mbida bida a tindeg a kiyaylaya niyan ko Kadnan, ago miyaaloy ko katharo o Ibn Taymiyyah so datar ini. Ogaid na so kiyaaloya sa kiyaylaya niyanon sa mata na daden a miyatoon a mabager a daleel sa apiya so manga Sahabah na da iran pen maaloy. Pitharo o Allah: “Oriyan iyan na miyakarani (so Jibril ko Mohammad), go domiyazg” [Surah An-Najm 53:8] Somiyaaloy a “miyakarani” sa ayat na kenaba so miyakarani a miyaaloy sa Surah Al-Isra. Maana so miyakarani a miyaaloy sa Surah An-Najm na so kiyapakarani o Jibril (a.s.) ago so kiyapanog iyan. Sii ko kiyalalakaw o Rasulullah (Sallallahu ‘Alaihi Wasallam) ko kagagawii a Al-Isra wal Mi’raj na madakel a miyaylay niyan ago miyawla-ola a piyakamemesa. Ped sii na giyaya manga khaaloy: 1. Kiyapili niyan ko inipaganaon a gatas. 2.Miyaylay niyan so pat a lawasayg sa Sorga: dowa a maylay ago dowa a mitatapok. So dowa lawasayg a maylay na so Nile ago so Euphrates a mapephemaana angkoto a kaylaya on na mipephanolon iyan ago maphakalangkap iyan sa lopa ago sa inged so manga manosiya a phanolon sa agama Islam. Ogaid kenaba aya maana niyan na so ig a ipthoga iyan na pthoga a phoon sa Sorga. 3. Miyaylay niyan so Malaikah a so Malik a tomothonggo ko Naraka, sekaniyan na kenaba pzinga ago di khaylay ko paras iyan oba khababaya. 4. Miyaylay pen o Rasulullah (s.a.w.) so Sorga ago so Naraka. 5. Miyaylay niyan so siran oto a pheken iran so tamok o manga wata ilo a aden a manga ngari iran a datar o manga ngari o onta a aya iphagami iran ko manga modol iran na apoy a miyakariga sa kayaw niyan a pelambas taman sa manga pitot iran. 6.Miyaylay niyan so manga pheken iran so Riba a manga ala i tiyan sa di siran den makaphagalibet ko katatagoan kiran sabap ko di iran khagaga so kapened iyan raot sa zagadan siran o manga pagtaw o Fir’awn sii ko kazoled iran ko apoy taros a ndapoan siran roo sa apoy. 7. Miyaylay niyan so manga kawlit a karne a manga pipiya ago so manga miyawsang a manga ado a karne. Pheken iran so manga ado ago miyawsang a karne na ipembhagak iran so manga pipiya a karne. 8. Miyaylay iyan so manga babae a phikipangraw iran ko salakaw a mama so manga wata iran a kenaba wata o mama, siran a manga babae na khisasambir siran sa Naraka a aya misasambir na so manga suso iran. Miyatharo i Ibn Qayyim: “So kiyapita iyan na piyanothol o Rasulullah (Sallallahu ‘Alaihi Wasallam) so manga pinikiilay ron o Allah. Ogaid na baden kiyawmanan sa piyakambokhag iran so Rasulullah (Sallallahu ‘Alaihi Wasallam). Iniiza iranon antonaa so mambebetad a liyo o Baytul Maqdis sa Jerusalem na piyanothol iyan kiran sa langon a piyanothol iyan na daden a phakasangkaan sabap sa langon den benar so piyanothol iyan. Oriyan oto na piyanothol iyan a aden a manga onta a phoon sa Jerusalem sabap ko kakhawiyagan na pitharo iyan kiran antonaa oras a kaphakawma o manga Onta sa Makkah taros a benar den a miyakawma mambo so manga onta sii ko oras a miyapanothol iyan. Ogaid na da kawmani so pararatiyaya o manga kapir sa manga tanda a piyanothol iyan kiran.” ﻭﺇﺫﺍ ﺃﺭﺩﻧﺎ ﺃﻥ ﻧﻬﻠﻚ ﻗﺮﻳﺔ ﺃﻣﺮﻧﺎ ﻣﺘﺮﻓﻴﻬﺎ ﻓﻔﺴﻘﻮﺍ ﻓﻴﻬﺎ ﻓﺤﻖ ﻋﻠﻴﻬﺎ ﺍﻟﻘﻮﻝ ﻓﺪﻣﺮﻧﺎﻫﺎ ﺗﺪﻣﻴﺮﺍ, ﻭﻛﻢ ﺃﻫﻠﻜﻨﺎ ﻣﻦ ﺍﻟﻘﺮﻭﻥ ﻣﻦ ﺑﻌﺪ ﻧﻮﺡ ﻭﻛﻔﻰ ﺑﺮﺑﻚ ﺑﺬﻧﻮﺏ ﻋﺒﺎﺩﻩ ﺧﺒﻴﺮﺍ ﺑﺼﻴﺮﺍ “Na igira a kabaya Ami a kabinasa Ami ko phagingd, na sogo on Ami so manga nakoda rkaniyan (a nggolalan ko manga rasol) na ndarowaka siran roo; na mapatot on so katharo (a siksa): Na binasaan Ami skaniyan sa tarotop a kabinasa. Na madakl a bininasa Mi ko manga pagtaw a miyaoriyan o Noh. Na makatatarotop so Kadnan ka sii ko manga dosa o manga oripn Iyan a Kaip a Pphakaylay.” [Al-Isra 17:16-17] Al-Isra wal Mi'raj

KOKOMAN O KAKONOT SII KO SAMBAYANG A FAJR

KOKOMAN O KAKONOT SII KO SAMBAYANG A FAJR ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ Tonai maana a (ﻗﻨﻮﺕ) Konot? So Konot ( )ﻗﻨﻮﺕ na madakl i maana sa Lugah, na aya Lomalangkap a maana niyan sa Logah na kandowaa (kapamangni). ﻗﺎﻝ ﺍﻟﺰﺟﺎﺝ: ﺍﻟﻤﺸﻬﻮﺭ ﻓﻲ ﺍﻟﻠﻐﺔ ﺃﻥ ﺍﻟﻘﻨﻮﺕ ﺍﻟﺪﻋﺎﺀ، ﻭﺃﻥ ﺍﻟﻘﺎﻧﺖ ﺍﻟﺪﺍﻋﻲ. Pitharo o Azzajjaaj: “Aya Lomalangkap sa Logah a maana o Konot na kandowaa…” ﻗﺎﻝ ﺍﻟﻨﻮﻭﻱ: ﻳﻄﻠﻖ ﺍﻟﻘﻨﻮﺕ ﻋﻠﻰ ﺍﻟﺪﻋﺎﺀ ﺑﺨﻴﺮ ﻭﺷﺮ. Pitharo o Imam Nawawi: “ipmbtho so Qonoot sii ko kandowaa (kapamangni) sa mapiya ago marata”. Giyanan i pd a maana a konot sii sa Lugah a Kapamangni/Kandowaa. Na aya maana a Qonoot sii ko Istilah o mga Ulama na kapamangni sii ko sold o sambayang sii ko mattndo a darpa sii ko sold o sambayang. ﻗﺎﻝ ﺍﻹﻣﺎﻡ ﺍﺑﻦ ﻋﻼﻥ" :ﺍﻟﻘﻨﻮﺕ ﻓﻬﻮ ﺍﺳﻢ ﻟﻠﺪﻋﺎﺀ ﻓﻲ ﺍﻟﺼﻼﺓ، ﻓﻲ ﻣﺤﻞ ﻣﺨﺼﻮﺹ ﻣﻦ ﺍﻟﻘﻴﺎﻡ." ﺍﻫـ Pitharo o Imam Ibn Allaan: “So Konot na term anan a sii pakamomorada ko kandowaa sii ko sambayang, sii ko mattndo a katindg sii ko masa a sambayang”. MGA DARPA O KAKONOT So kakonot na tlo a kiyapagosayaon o Pat a Madhab: - Kakonot sii ko sambayang a Fajr (Sobh). - Kakonot sii ko last raka-at a witr. - Kakonot sii ko Last Raka-at o Langowan a Sambayang sii ko kapkitalmba o mga ala a Ragaor. Sii ko Madhab tano a Shafi’i na aya Tindg tano ko Kakonot sii ko sambayang a Fajr na Sunnah a opamaka bagakn o tao a misambayang sa Fajr na Taralbi a makasojod ska niyan sa Sojood Sawhi sa mlagid o Pitibaba iyan a kinibagakn iyanon antaaka da niyan tibabaa. Minipagayon tano san so mga Maliki a pkonot siran mambo sii ko Sambayang a Fajr. Na aya Tindg tano sa giyanan a kakonot sii ko Last raka’at a Witr na aya bo a kakonot tano ron na sii ko witr ko Kalooki Ramadan na giyoto o kapkonot tano ron sa taman dn sa kapopos o ramadan. Aya maana niyan na sii ko Kalooki ko Ramadan na giyoto i kaphagpoon tano Komonot sii ko sambayang a witr, knaba ba sii ko paganay pn a gawii ko ramadan na miyagpoon tano dn Komonot ko witr. Na sii pman sa giyanan a ikatlo na aya tindg tano san a mga Shafi’i na igira a adn a minitalmba a mga ragaor na Sunnah a pphakakonot tano sii ko langowan a Sambayang a paralo. Aya pagosayin tano san na so Kakonot sii ko sambayang a Fajr ka sabap sa giyanan i mababaloy a Topic tano. SO KAKONOT SII KO SAMBAYANG A FAJR So kakonot sii ko oman sambayang a Fajr (Sobo) na Sunnah a dadn bagakn o Nabi (S) sa taman dn sa kiyawapat iyan, ago giyanan i titindgan o kadaklan ko mga Ulama ago so kadaklan ko mga Sahaba ago so mga Tabi’een ago so mga Tabi’uttabi’een. ﻭﻗﺎﻝ ﺍﻹﻣﺎﻡ ﺍﻟﻨﻮﻭﻱ ﺭﺣﻤﻪ ﺍﻟﻠﻪ ﻓﻲ ﺍﻟﻤﺠﻤﻮﻉ" :ﻣﺬﻫﺒﻨﺎ ﺃﻧﻪ ﻳﺴﺘﺤﺐ ﺍﻟﻘﻨﻮﺕ ﻓﻴﻬﺎ –ﺃﻱ ﺻﻼﺓ ﺍﻟﻔﺠﺮ- ﺳﻮﺍﺀ ﻧﺰﻟﺖ ﻧﺎﺯﻟﺔ ﺃﻭ ﻟﻢ ﺗﻨﺰﻝ، ﻭﺑﻬﺬﺍ ﻗﺎﻝ ﺃﻛﺜﺮ ﺍﻟﺴﻠﻒ ﻭﻣﻦ ﺑﻌﺪﻫﻢ ﺃﻭ ﻛﺜﻴﺮ ﻣﻨﻬﻢ، ﻭﻣﻤﻦ ﻗﺎﻝ ﺑﻪ ﺃﺑﻮ ﺑﻜﺮ ﺍﻟﺼﺪﻳﻖ ﻭﻋﻤﺮ ﺑﻦ ﺍﻟﺨﻄﺎﺏ ﻭﻋﺜﻤﺎﻥ ﺑﻦ ﻋﻔﺎﻥ ﻭﻋﻠﻲ ﻭﺍﺑﻦ ﻋﺒﺎﺱ ﻭﺍﻟﺒﺮﺍﺀ ﺑﻦ ﻋﺎﺯﺏ ﺭﺿﻲ ﺍﻟﻠﻪ ﻋﻨﻬﻢ." Pitharo o Imam Nawawi: “Aya titindgan ami (a mga Shafi’i) na Sunnah so Kakonot sii ko oman sambayang a Fajr sa mlagid o adn a minitalmba a ragaor antaaka da, na giyanan dn i tindgan o kadaklan ko mga Sahaba ago so mga miyamakatondog kiran a madakl a mga ulama. Aya pd a titindg ko kakonot sii ko sambayang a Fajr na so Abubakr, go Omar, go Uthman, go so Ali, go so Ibn Abbas, go so Al-Barra Bin 'Aazib (Radhiallahu anhum)”. Giyanan i katharo o imam nawawi. ﻗﺎﻝ ﺍﻟﺤﺎﺯﻣﻲ ﻓﻲ ﻛﺘﺎﺏ ﺍﻻﻋﺘﺒﺎﺭ " :ﻭﺍﺧﺘﻠﻒ ﺍﻟﻨﺎﺱ ﻓﻲ ﺍﻟﻘﻨﻮﺕ ﻓﻲ ﺻﻼﺓ ﺍﻟﺼﺒﺢ ﻓﺬﻫﺐ ﺃﻛﺜﺮ ﺍﻟﻨﺎﺱ ﻣﻦ ﺍﻟﺼﺤﺎﺑﺔ ﻭﺍﻟﺘﺎﺑﻌﻴﻦ ﻓﻤﻦ ﺑﻌﺪﻫﻢ ﻣﻦ ﻋﻠﻤﺎﺀ ﺍﻷﻣﺼﺎﺭ ﻋﻠﻰ ﺇﺛﺒﺎﺕ ﺍﻟﻘﻨﻮﺕ ﻓﻴﻬﺎ ، ﻗﺎﻝ : ﻓﻤﻤﻦ ﺭﻭﻳﻨﺎ ﺫﻟﻚ ﻋﻨﻪ ﻣﻦ ﺍﻟﺼﺤﺎﺑﺔ ﺍﻟﺨﻠﻔﺎﺀ ﺍﻟﺮﺍﺷﺪﻭﻥ ﺃﺑﻮ ﺑﻜﺮ ﻭﻋﻤﺮ ﻭﻋﺜﻤﺎﻥ ﻭﻋﻠﻲ ﺭﺿﻮﺍﻥ ﺍﻟﻠﻪ ﺗﻌﺎﻟﻰ ﻋﻠﻴﻬﻢ ﺃﺟﻤﻌﻴﻦ ، ﻭﻣﻦ ﺍﻟﺼﺤﺎﺑﺔ ﻋﻤﺎﺭ ﺑﻦ ﻳﺎﺳﺮ ، ﻭﺃﺑﻲ ﺑﻦ ﻛﻌﺐ ، ﻭﺃﺑﻮ ﻣﻮﺳﻰ ﺍﻷﺷﻌﺮﻱ ، ﻭﻋﺒﺪ ﺍﻟﺮﺣﻤﻦ ﺑﻦ ﺃﺑﻲ ﺑﻜﺮ ﺍﻟﺼﺪﻳﻖ ، ﻭﻋﺒﺪ ﺍﻟﻠﻪ ﺑﻦ ﻋﺒﺎﺱ ، ﻭﺃﺑﻮ ﻫﺮﻳﺮﺓ ، ﻭﺍﻟﺒﺮﺍﺀ ﺑﻦ ﻋﺎﺯﺏ ، ﻭﺃﻧﺲ ﺑﻦ ﻣﺎﻟﻚ ، ﻭﺃﺑﻮ ﺣﻠﻴﻤﺔ ﻣﻌﺎﺫ ﺑﻦ ﺍﻟﺤﺎﺭﺙ ﺍﻷﻧﺼﺎﺭﻱ ، ﻭﺧﻔﺎﻑ ﺑﻦ ﺇﻳﻤﺎﺀ ﺑﻦ ﺭﺣﻀﺔ ، ﻭﺃﻫﺒﺎﻥ ﺑﻦ ﺻﻴﻔﻲ ، ﻭﺳﻬﻞ ﺑﻦ ﺳﻌﺪ ﺍﻟﺴﺎﻋﺪﻱ ، ﻭﻋﺮﻓﺠﺔ ﺑﻦ ﺷﺮﻳﺢ ﺍﻷﺷﺠﻌﻲ ، ﻭﻣﻌﺎﻭﻳﺔ ﺑﻦ ﺃﺑﻲ ﺳﻔﻴﺎﻥ ، ﻭﻋﺎﺋﺸﺔ ﺍﻟﺼﺪﻳﻘﺔ ، ﻭﻣﻦ ﺍﻟﻤﺨﻀﺮﻣﻴﻦ ﺃﺑﻮ ﺭﺟﺎﺀ ﺍﻟﻌﻄﺎﺭﺩﻱ ، ﻭﺳﻮﻳﺪ ﺑﻦ ﻏﻔﻠﺔ ﻭﺃﺑﻮ ﻋﺜﻤﺎﻥ ﺍﻟﻨﻬﺪﻱ ، ﻭﺃﺑﻮ ﺭﺍﻓﻊ ﺍﻟﺼﺎﺋﻎ ، ﻭﻣﻦ ﺍﻟﺘﺎﺑﻌﻴﻦ ﺳﻌﻴﺪ ﺑﻦ ﺍﻟﻤﺴﻴﺐ ، ﻭﺍﻟﺤﺴﻦ ﺑﻦ ﺍﻟﺤﺴﻦ ، ﻭﻣﺤﻤﺪ ﺑﻦ ﺳﻴﺮﻳﻦ ، ﻭﺃﺑﺎﻥ ﺑﻦ ﻋﺜﻤﺎﻥ ، ﻭﻗﺘﺎﺩﺓ ، ﻭﻃﺎﻭﺱ ، ﻭﻋﺒﻴﺪ ﺑﻦ ﻋﻤﻴﺮ ، ﻭﺍﻟﺮﺑﻴﻊ ﺑﻦ ﺧﻴﺜﻢ ، ﻭﺃﻳﻮﺏ ﺍﻟﺴﺨﺘﻴﺎﻧﻲ ، ﻭﻋﺒﻴﺪﺓ ﺍﻟﺴﻠﻤﺎﻧﻲ ، ﻭﻋﺮﻭﺓ ﺑﻦ ﺍﻟﺰﺑﻴﺮ ، ﻭﺯﻳﺎﺩ ﺑﻦ ﻋﺜﻤﺎﻥ ، ﻭﻋﺒﺪ ﺍﻟﺮﺣﻤﻦ ﺑﻦ ﺃﺑﻲ ﻟﻴﻠﻰ ، ﻭﻋﻤﺮ ﺑﻦ ﻋﺒﺪ ﺍﻟﻌﺰﻳﺰ ، ﻭﺣﻤﻴﺪ ﺍﻟﻄﻮﻳﻞ ، ﻭﻣﻦ ﺍﻷﺋﻤﺔ ﻭﺍﻟﻔﻘﻬﺎﺀ ﺃﺑﻮ ﺇﺳﺤﺎﻕ ، ﻭﺃﺑﻮ ﺑﻜﺮ ﺑﻦ ﻣﺤﻤﺪ ، ﻭﺍﻟﺤﻜﻢ ﺑﻦ ﻋﺘﻴﺒﺔ ، ﻭﺣﻤﺎﺩ ﻭﻣﺎﻟﻚ ﺑﻦ ﺃﻧﺲ ، ﻭﺃﻫﻞ ﺍﻟﺤﺠﺎﺯ ، ﻭﺍﻷﻭﺯﺍﻋﻲ ﻭﺃﻛﺜﺮ ﺃﻫﻞ ﺍﻟﺸﺎﻡ ، ﻭﺍﻟﺸﺎﻓﻌﻲ ﻭﺃﺻﺤﺎﺑﻪ ، ﻭﻋﻦ ﺍﻟﺜﻮﺭﻱ ﺭﻭﺍﻳﺘﺎﻥ ، ﻭﻏﻴﺮ ﻫﺆﻻﺀ ﺧﻠﻖ ﻛﺜﻴﺮ." ﺍﻫـ Pitharo o Imam Al-Hazimi: “Miyakambidabida so Tindg o mga Tao ko Kakonot sii ko sambayang a Sobo (Fajr), na aya pitindgan o kadaklan ko mga tao a Lagid o mga Sahaba ago so mga Tabi’een ago so miyamakatondog kiran a mga ulama ko omani ingd na aya pitindgan iran na pkonot a tao sii ko sambayang a Sobo, sa aya miyapanaothol a mitindg ko kakonot sii ko sambayang a sobo na so Pat a Khalifah a giyanan so Abubakr, go Omar, go Uthman, go Ali, ago Lagid o Ammar Bin Yasir, go Ubay bin ka’b, go Abumoosa Al-ash’ari, go Abdurrahman Bin Abibakr, go Abdullah Bin Abbas, go Abuhurairah, go so Al-Barra Bin Azib, go Anas Bin Malik, go Abuhaleemah Mu’ad Al-ansari, go Khuffaf Bin Ayma Bin Rahdha, go wahiban Bin Saify, go Sahl Bin Sa’id Assa’edi, go Arfajah bin Shuraih Al-ashja’i, go so Mu’awiyah Bin Abi Sufyan, go so Aisha... ago aya miya-aloy a mga Tabi’een a pkonot sii ko sambayang a Sobh na so Sa’eed Bin Al-Musayyab, go Al-Hasan Bin Al- Hasan, go Muhammad Bin Seereen, go Abban Bin Uthamn, go so Qatadah, go Tawoos, go Ubaid Bin Omair, go Arrabee’ Bin Khaytham, go Ayyoob Assakhtiyani, go Ubaida Assalmani, go Arwa Bin Azzubair, go Ziyad bin Uthman, go Abdurrahamn Bin Abilaylah, go Omar Bin Abdul- aziz, go Humaid Attaweel, ago aya mitindgon ko mga Imam na so Abuishaq, go Abubakr Bin Muhammad, go Al-hakam bin Utaybah, go Hammad, go so Imam Malik, go so mga Ulama sa Hijaz, go so Al-Auza’i, go so kadaklan ko mga ulama sa Sham, go so Imam Shafi’i ago so mga ingnpda iyan, ago so Imam Atthauri sii ko ikadowa a Riyawah rka niyan, ago so salalaw kiran a da san ma-aloy ka tanto siran ko madakl a Titindg ko kakonot sii ko Sambayang a Fajr”. Giyanan i katharo o Imam Al-Hazimi. ﻗﺎﻝ ﺍﻹﻣﺎﻡ ﺍﻟﻨﻮﻭﻱ ﻓﻲ ﺷﺮﺡ ﺍﻟﻤﻬﺬﺏ" :ﺍﻟﻘﻨﻮﺕ ﻓﻲ ﺍﻟﺼﺒﺢ ﻣﺬﻫﺒﻨﺎ ﻭﺑﻪ ﻗﺎﻝ ﺃﻛﺜﺮ ﺍﻟﺴﻠﻒ ﻭ ﻣﻦ ﺑﻌﺪﻫﻢ ﺃﻭ ﻛﺜﻴﺮ ﻣﻨﻬﻢ." ﺍﻫـ Pitharo o Imam Nawawi: “So kakonot sii ko sambayang a Sobo na aya mi Titindgan ago aya titndgan o kadaklan ko mga Sahaba ago so mga Tabi’een ago Tabi’uttabi’een, ago aya titindgan o kadaklan ko mga ulama a miyamakatalondog kiran”. Giyanan i katharo o Imam nawawi. So Imam Abuhanifah (imam ko Madhab a hanafi) go so Imam Ahmad (imam ko madhab a Hambali) go so Ibnul-Mubarak, go imam Atthauri na aya Pitindgan iran na Daa Konot sii ko Sambayang a Sobo. Giyanan mambo i Tindg o Abdullah Bin Mas’ood ago so Abdullah Ibn Omar a pd ko mga Sahaba o Nabi (S). MGA DALIL O KAKONOT SII KO SAMBAYANG A SOBH ﻋﻦ ﺃﻧﺲ ﺭﺿﻲ ﺍﻟﻠﻪ ﻋﻨﻪ ﻗﺎﻝ ": ﻣﺎﺯﺍﻝ ﺭﺳﻮﻝ ﺍﻟﻠﻪ ﺻﻠﻲ ﺍﻟﻠﻪ ﻋﻠﻴﻪ ﻭﺳﻠﻢ ﻳﻘﻨﺖ ﻓﻲ ﺻﻼﺓ ﺍﻟﻐﺪﺍﺓ )ﺃﻱ ﺍﻟﻔﺠﺮ( ﺣﺘﻰ ﻓﺎﺭﻕ ﺍﻟﺪﻧﻴﺎ." ﺭﻭﺍﻩ ﺍﻟﺒﻴﻬﻘﻲ Pitharo o Anas (Radhiallahu anhu): “Didn maririntas a kapkonot o Rasoolullah sii ko sambayang a Sobo sa taman dn sa kiyablaga niyan ko Doniya”. Piyanothol o Imam Al-Bayhaqi. ﻋﻦ ﻣﺤﻤﺪ ﻗﺎﻝ" : ﺳﺌﻞ ﺃﻧﺲ ﺃﻗﻨﺖ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ ﻓﻲ ﺍﻟﺼﺒﺢ ؟ ﻗﺎﻝ : ﻧﻌﻢ ﻓﻘﻴﻞ ﻟﻪ : ﺃﻭ ﻗﻨﺖ ﻗﺒﻞ ﺍﻟﺮﻛﻮﻉ ؟ ﻗﺎﻝ ﺑﻌﺪ ﺍﻟﺮﻛﻮﻉ ﻳﺴﻴﺮﺍ ." ﺭﻭﺍﻩ ﺍﻟﺒﺨﺎﺭﻱ Miyakathitayan ko Muhammad, Pitharo iyan: inipakaiza ko Anas o ino ba pkonot so Nabi sii ko sambayang a Sobh? Na aya pitharo o Anas: Oway. Na inipakaizaon pman o Tonai kapkonot iyan sii ko di niyan pn kaproko sa Lb antaaka sii ko oriyan o kapakaroko iyan sa Lb? Na aya Pitharo o Anas: aya kapkonot iyan na sii ko oriyan o kapakaroko iyan sa Lb”. Piyanothol o Bukhari. ﻋﻦ ﺃﻧﺲ ﺭﺿﻲ ﺍﻟﻠﻪ ﻋﻨﻪ، " ﺃﻥ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ ﻗﻨﺖ ﺷﻬﺮﺍ ﻳﺪﻋﻮ ﻋﻠﻰ ﻗﺎﺗﻠﻲ ﺑﺌﺮ ﻣﻌﻮﻧﺔ، ﺛﻢ ﺗﺮﻙ ، ﻓﺄﻣﺎ ﻓﻲ ﺍﻟﺼﺒﺢ ﻓﻠﻢ ﻳﺰﻝ ﻳﻘﻨﺖ ﺣﺘﻰ ﻓﺎﺭﻕ ﺍﻟﺪﻧﻴﺎ ." ﺭﻭﺍﻩ ﺍﻟﺤﺎﻛﻢ ﺑﺈﺳﻨﺎﺩ ﺻﺤﻴﺢ. Miyakathitayan ko Anas (radhiallahu anhu): “Mataan a so Nabi (S) na sii ko sold o miyakasaolan na dii niyan gindowaa sa morka so mga tao a miyamono ko mga Sahaba niyan sii sa Bi’ro Ma’oonah, na oriyan o saulan na inignk iyan uto, na ogaid na sii ko sambayang a Sobo na didn maririntas a kapkonoton o Nabi sa Taman dn sa kiyablaga niyan ko Doniya”. Piyanothol o Hakim. ﻋﻦ ﺃﻧﺲ ﺑﻦ ﻣﺎﻟﻚ ﻗﺎﻝ": ﺻﻠﻴﺖ ﺧﻠﻒ ﺭﺳﻮﻝ ﺍﻟﻠﻪ ﺻﻠﻲ ﺍﻟﻠﻪ ﻋﻠﻴﻪ ﻭﺳﻠﻢ ﻓﻠﻢ ﻳﺰﻝ ﻳﻘﻨﺖ ﻓﻲ ﺻﻼﺓ ﺍﻟﺼﺒﺢ, ﺑﻌﺪ ﺍﻟﺮﻛﻮﻉ, ﺣﺘﻰ ﺗﻮﻓﺎﻩ ﺍﻟﻠﻪ, ﻭﺻﻠﻴﺖ ﺧﻠﻒ ﺃﺑﻲ ﺑﻜﺮ ﺍﻟﺼﺪﻳﻖ, ﻓﻠﻢ ﻳﺰﻝ ﻳﻘﻨﺖ ﻓﻲ ﺻﻼﺓ ﺍﻟﺼﺒﺢ ﺑﻌﺪ ﺍﻟﺮﻛﻮﻉ, ﺣﺘﻰ ﺗﻮﻓﺎﻩ ﺍﻟﻠﻪ, ﻭﺻﻠﻴﺖ ﺧﻠﻒ ﻋﻤﺮ, ﻓﻠﻢ ﻳﺰﻝ ﻳﻘﻨﺖ ﻓﻲ ﺻﻼﺓ ﺍﻟﺼﺒﺢ , ﺑﻌﺪ ﺍﻟﺮﻛﻮﻉ, ﺣﺘﻰ ﺗﻮﻓﺎﻩ ﺍﻟﻠﻪ ." ﺭﻭﺍﻩ ﺍﻟﺒﻴﻬﻘﻲ Miyakathitayan ko Anas Bin Malik, pitharo iyan: “Miyakaunot ako sa sambayang ko Rasoolullah na didn maririntas a kapkonot iyan sii ko sambayang a Sobo sii ko oriyan o Roko sa Lb sa taman dn uto kiyawapat iyan, go miyakaunot ako sa sambayang ko Abubakr na didn maririntas a kapkonot iyan sii ko sambayang a Sobo sii ko oriyan o Roko sa Lb sa taman dn uto kiyawapat iyan, go miyakaunot ak sa sambayang ko Omar na didn maririntas a kapkonot iyan sii ko sambayang a Sobo sii ko oriyan o Roko sa Lb sa taman dn uto kiyawapat iyan”. Piyanothol o Imam Al-Bayhaqi. ﻋﻦ ﺍﻟﺤﺴﻦ, ﻗﺎﻝ" : ﻛﺎﻥ ﺍﻟﻨﺒﻲ ﺻﻠﻲ ﺍﻟﻠﻪ ﻋﻠﻴﻪ ﻭﺳﻠﻢ ﻭﺃﺑﻮ ﺑﻜﺮ , ﻭﻋﻤﺮ, ﻳﻘﻨﺘﻮﻥ ﻓﻲ ﺍﻟﺼﺒﺢ, ﺑﻌﺪ ﺍﻟﺮﻛﻌﺔ, ﺣﺘﻰ ﻛﺎﻥ ﻋﺜﻤﺎﻥ." ﺭﻭﺍﻩ ﺍﻟﺒﻴﻬﻘﻲ Miyakathitayan ko Al-Hasan a Pitharo iyan: “Aya ulaola o Nabi ago so Abubakr ago so Omar na pkonot siran sii ko sambayang a sobo sii ko Last a Raka’at iyan, na taman ko Uthman na pkonot pn sii ko sobh”. Piyanothol o Imam Al-Bayhaqi. ﻋﻦ ﺍﻟﻌﻮﺍﻡ ﺑﻦ ﺣﻤﺰﺓ ﻗﺎﻝ" :ﺳﺄﻟﺖ ﺃﺑﺎ ﻋﺜﻤﺎﻥ ﻋﻦ ﺍﻟﻘﻨﻮﺕ ﻓﻲ ﺍﻟﺼﺒﺢ ؟ ﻓﻘﺎﻝ : ﺑﻌﺪ ﺍﻟﺮﻛﻮﻉ, ﻗﻠﺖ : ﻋﻤﻦ ؟ ﻗﺎﻝ: ﻋﻦ ﺃﺑﻲ ﺑﻜﺮ , ﻭﻋﻤﺮ, ﻭﻋﺜﻤﺎﻥ." ﺭﻭﺍﻩ ﺍﻟﺒﻴﻬﻘﻲ Miyakathitayan ko Al-Awwam Bin Hamza, pitharo iyan: “Inipakaiza akn ko Abu uthman so mipantag ko kakonot sii ko sambayang a Sobo, na aya Pitharo iyan: aya kakonot sii ko sobo na sii ko oriyan o roko sa Lb. Pitharo akn (maana so Al-awwam i gii tharo): anda anan miyakapoon a ulaola a kakonot anan sii ko Sobo? Tigo Abu uthman: Sii ko Abubakr ago Omar ago so Uthman”. Piyanothol o Imam Al-Bayhaqi. ﻋﻦ ﺃﺑﻲ ﺭﺍﻓﻊ" : ﺃﻥ ﻋﻤﺮ ﻛﺎﻥ ﻳﻘﻨﺖ ﻓﻲ ﺻﻼﺓ ﺍﻟﺼﺒﺢ. " ﺭﻭﺍﻩ ﺍﻟﺒﻴﻬﻘﻲ. ﻗﺎﻝ ﺍﻟﺒﻴﻬﻘﻲ" :ﻫﺬﺍ ﻋﻦ ﻋﻤﺮ ﺻﺤﻴﺢ, ﻭﻗﺪ ﺫﻛﺮﻧﺎ ﺷﻮﺍﻫﺪﻩ ﻓﻲ ﻛﺘﺎﺏ ﺍﻟﺴﻨﻦ." ﺍﻫـ Miyakathitayan ko Aburaafi’, Pitharo iyan: “Mataan a so Omar na aya ulaola niyan na pkonot sii ko Sambayang a Sobo”. Piyanothol o Imam Al-Bayhaqi. ﻋﻦ ﺳﻌﻴﺪ ﻗﺎﻝ" :ﻛﺎﻥ ﻋﻤﺮ ﺑﻦ ﺍﻟﺨﻄﺎﺏ ﺭﺿﻮﺍﻥ ﺍﻟﻠﻪ ﻋﻠﻴﻪ ﻳﻘﻨﺖ ﻓﻲ ﺻﻼﺓ ﺍﻟﻔﺠﺮ." ﺃﺧﺮﺟﻪ ﺍﻟﻄﺒﺮﻱ ﻓﻲ ﺗﻬﺬﻳﺐ ﺍﻵﺛﺎﺭ 604 Miyakathitayan ko Sa’eed a Pitharo iyan: “Aya maulaola o Omar Bin Al-Khattab (Radhiallahu anhu) na pkonot sii ko sambayang a Fajr”. Piyanothol o Attabari. ﻋﻦ ﻋﺒﻴﺪ ﺑﻦ ﻋﻤﻴﺮ, ﻋﻦ ﻋﻤﺮ" :ﺃﻧﻪ ﻗﻨﺖ ﻓﻲ ﺍﻟﺼﺒﺢ ." ﺭﻭﺍﻩ ﺍﻟﺒﻴﻬﻘﻲ Pitharo o Ubaid Bin Omair: “Mataan a so Omar na pkonot sii ko Sobo”. Piyanothol o Imam Al- Bayhaqi. ﻋﻦ ﺍﻷﺳﻮﺩ ﻗﺎﻝ : ﺻﻠﻴﺖ ﺧﻠﻒ ﻋﻤﺮ ﻓﻲ ﺍﻟﺤﻀﺮ ﻭﺍﻟﺴﻔﺮ ﻓﻤﺎ ﻛﺎﻥ ﻳﻘﻨﺖ ﺇﻻ ﻓﻲ ﺻﻼﺓ ﺍﻟﻔﺠﺮ ." ﺃﺧﺮﺟﻪ ﺍﻟﺒﻐﻮﻱ ﻓﻲ ﻣﺴﻨﺪ ﺍﺑﻦ ﺍﻟﺠﻌﺪ Miyakathitayan ko Al-Aswad, Pithato iyan: “Miyakaunot ako sa sambayang ko Omar a masa a knaba ko matatago sa Lakawan ago sii ko masa a matatago ako sa Lakawan na aya bo a kapkonot iyan na sii ko sambayang a Fajr”. ﻋﻦ ﺳﻮﻳﺪ ﺑﻦ ﻏﻔﻠﺔ ﻗﺎﻝ" :ﺻﻠﻴﺖ ﺧﻠﻒ ﻋﻤﺮ ﺑﻦ ﺍﻟﺨﻄﺎﺏ ﺍﻟﻔﺠﺮ ﻓﻘﻨﺖ." Miyakathitayan ko Suwaid Bin Gaflah, a pitharo iyan: “Miyakaunot ako sa sambayang ko Omar a wakto a Sobo na pkonot”. ﻋﻦ ﻫﺸﻴﻢ ﻗﺎﻝ ﺃﺧﺒﺮﻧﺎ ﺣﺼﻴﻦ ﻗﺎﻝ : ﺻﻠﻴﺖ ﺍﻟﻐﺪﺍﺓ ﺫﺍﺕ ﻳﻮﻡ ﻭﺻﻠﻰ ﺧﻠﻔﻲ ﻋﺜﻤﺎﻥ ﺑﻦ ﺯﻳﺎﺩ ، ﻗﺎﻝ : ﻓﻘﻨﺖ ﻓﻲ ﺻﻼﺓ ﺍﻟﺼﺒﺢ ﻗﺎﻝ : ﻓﻠﻤﺎ ﻗﻀﻴﺖ ﺻﻼﺗﻲ ﻗﺎﻝ ﻟﻲ : ﻣﺎ ﻗﻠﺖ ﻓﻲ ﻗﻨﻮﺗﻚ ؟ ﻓﻘﻠﺖ : ﺫﻛﺮﺕ ﻫﺆﻻﺀ ﺍﻟﻜﻠﻤﺎﺕ : ﺍﻟﻠﻬﻢ ﺇﻧﺎ ﻧﺴﺘﻌﻴﻨﻚ ﻭﻧﺴﺘﻐﻔﺮﻙ ﻭﻧﺜﻨﻲ ﻋﻠﻴﻚ ﺍﻟﺨﻴﺮ ﻭﻻ ﻧﻜﻔﺮﻙ ، ﻭﻧﺨﻠﻊ ﻭﻧﺘﺮﻙ ﻣﻦ ﻳﻔﺠﺮﻙ ، ﺍﻟﻠﻬﻢ ﺇﻳﺎﻙ ﻧﻌﺒﺪ ﻭﻟﻚ ﻧﺼﻠﻲ ﻭﻧﺴﺠﺪ ، ﻭﺇﻟﻴﻚ ﻧﺴﻌﻰ ﻭﻧﺤﻔﺪ ، ﻭﻧﺮﺟﻮ ﺭﺣﻤﺘﻚ ﻭﻧﺨﺸﻰ ﻋﺬﺍﺑﻚ ، ﺇﻥ ﻋﺬﺍﺑﻚ ﺑﺎﻟﻜﺎﻓﺮﻳﻦ ﻣﻠﺤﻖ ، ﻗﺎﻝ : ﻗﺎﻝ ﻟﻲ ﻋﺜﻤﺎﻥ : ﻛﺬﺍ ﻛﺎﻥ ﻳﺼﻨﻊ ﻋﻤﺮ ﺑﻦ ﺍﻟﺨﻄﺎﺏ ﻭﻋﺜﻤﺎﻥ ﺑﻦ ﻋﻔﺎﻥ. ﺃﺧﺮﺟﻪ ﺍﺑﻦ ﺃﺑﻲ ﺷﻴﺒﺔ ﻓﻲ ﻣﺼﻨﻔﻪ. Pitharo o Hushaim: “Piyanotholan kami o Haseen, Pitharo iyan: Miyakaisa a gawii na misambayang ako sa Sobo na miyonot rakn sa sambayang so Uthman Bin Ziyad, na Komiyonot ako sii ko sambayang a Sobo, na sii ko kiyapakapasad akn sambayang na aya Pitharo rakn o Uthman Bin Ziyad: Tonaa giyoto a inindowaa nga sii ko kiyakonot ka? Na inaloy aknon a aya inindowaa akn na giyai a mga Kalimat: Allaahumma innaa nasta’eenoka... (taman sa kaposan iyan). na oriyan uto na aya Pitharo rakn o Uthman Bin Ziyad: Giyanan dn i psowaan o Omar Bin Al-Khattab ago so Uthman Bin Affan a pkonot siran mambo sii ko sambayang a Sobo”. ﻋﻦ ﺟﻌﻔﺮ ﺑﻦ ﻣﺤﻤﺪ ﻋﻦ ﺃﺑﻴﻪ ": ﺃﻥ ﻋﻠﻴﺎ ﻛﺎﻥ ﻳﻘﻨﺖ ﻓﻲ ﺍﻟﺼﺒﺢ ﺑﻌﺪ ﺍﻟﺮﻛﻌﺔ ﺍﻷﺧﻴﺮﺓ. Miyakathitayan ko Ja’far Bin Muhammad a Pitharo i Ama iyan: “Mataan a so Ali Bin Abitalib na pkonot sii ko Sobo sii ko Last a Raka’at iyan”. ﻋﻦ ﻋﺒﺪ ﺍﻟﺮﺣﻤﻦ ﺑﻦ ﺃﺑﻲ ﻟﻴﻠﻲ" : ﺃﻥ ﻋﻠﻴﺎ ﻗﻨﺖ ﻓﻲ ﺍﻟﻔﺠﺮ, ﺑﻌﺪ ﺍﻟﺮﻛﻮﻉ ." Miyakathitayan ko Abdurrahman Bin Abilailah, pitharo iyan: “Mataan a so Ali na pkonot sii ko sambayang a Fajr sii ko oriyan o kapakaroko iyan sa Lb”. Aya Last a Dalil na Qaidah: ﺍﻹﺛﺒﺎﺕ ﻣﻘﺪﻡ ﻋﻠﻰ ﺍﻟﻨﻔﻲ Maana: So Dalil a makatotoro sa “Ithbat” na aya khakowa adiso Dalil a makatotoro sa “Nafyi”. Aya ibarat o dalil a makatotoro sa ithbat na datar o Hadith a aya mitotoro iyan na Pkonot so Nabi ago so mga Sahaba niyan sii ko sambayang a Fajr, na giyanan i pmbtowan sa Dalil a ithbat ka sabap sa tiyanto niyan a so Kakonot sii ko Fajr na ulaola o Nabi ago so mga Sahaba niyan. Na aya ibarat mambo o dalil a makatotoro sa Nafyi na datar o mambo o Hadith a aya mitotoro iyan na knaba pkonot so Nabi ago so mga Sahaba sii ko Fajr na aya sabap a kiyabthowi ron sa Nafyi na kay sabap sa piyakada iyan so Kakonot ko sambayang a fajr. Na aya kiyaopakatan ko mga ulama na basta a makaphantag so Dalil a Makatotoro sa Ithbat ago so Dalil a makatotoro sa Nafyi na aya khakowa na so Dalil a Ithbat ago aya maphakauna adiso Dalil a Nafyi. KATAYA SO MAKALLBI A DOWAA SII KO MASA A KAKONOT ﺃﻟﻠﻬﻢ ﺍﻫﺪﻧﺎ ﻓﻴﻤﻦ ﻫﺪﻳﺖ، ﻭﻋﺎﻓﻨﺎ ﻓﻴﻤﻦ ﻋﺎﻓﻴﺖ، ﻭﺗﻮﻟﻨﺎ ﻓﻴﻤﻦ ﺗﻮﻟﻴﺖ، ﻭﺑﺎﺭﻙ ﻟﻨﺎ ﻓﻴﻤﺎ ﺃﻋﻄﻴﺖ، ﻭﻗﻨﺎ ﺷﺮ ﻣﺎ ﻗﻀﻴﺖ، ﻓﺈﻧﻚ ﺗﻘﻀﻲ ﻭﻻ ﻳﻘﻀﻰ ﻋﻠﻴﻚ، ﻭﺇﻧﻪ ﻻ ﻳﺬﻝ ﻣﻦ ﻭﺍﻟﻴﺖ، ﻭﻻ ﻳﻌﺰ ﻣﻦ ﻋﺎﺩﻳﺖ ، ﺗﺒﺎﺭﻛﺖ ﺭﺑﻨﺎ ﻭﺗﻌﺎﻟﻴﺖ ﻓﻠﻚ ﺍﻟﺤﻤﺪ ﻋﻠﻰ ﻣﺎ ﻗﻀﻴﺖ ، ﻧﺴﺘﻐﻔﺮﻙ ﻭ ﻧﺘﻮﺏ ﺇﻟﻴﻚ ، ﻭﺻﻠﻰ ﺍﻟﻠﻪ ﻋﻠﻰ ﺳﻴﺪﻧﺎ ﻣﺤﻤﺪ ﻭ ﻋﻠﻰ ﺁﻟﻪ ﻭ ﺻﺤﺒﻪ ﻭ ﺳﻠﻢ Allahumma-hdina feeman Hadayt, Wa Aafina feeman Aafayt, wa tawallana feeman tawallayt, wa barik lanaa feema A’tayt, wa qina Sharrama Qadhayt, Fa innaka Taqdhi walaa Yuqdha Alayk, wa innahu Laa yadhillu man waa layt, wa laa ya’izzu man Aadayt, Tabarakta rabbana wa ta’aalayt, Fa Lakal Hamdu Ala Maa Qadhayt, Nasta-ghfiruka wa natoobu ilayk, Wa sal lallahu ala sayyidina Muhammad, wa ala Aalihi wa Sah- bihi wa sallam Note: Aya sunnah a sowa-an ka sa kakonot ka na thapnay ka sa imbayaw nga so mbala a lima nga na giyanan i mbatiyaan ka a giyanan a dowaa sa Konot, na makapasad ka Komonot na khapakay a isapo nga so mbala a palada Lima nga sa Paras ka, na ogaid na aya Makallbi na di nga dn zapoon sa paras ka sa aya sowaan ka na Diritso kadn a Sojod. ago aya pd a kailangan a kasabotan ka na Di khapakay iba nga saogi so Kapkonot ka sa pd a basa! dapat na basa Arabic bo a pkilapal o dila aka a dowaa sii ko sold o sambayang, ka pon ka saogi so sambayang ka salakaw ko basa arabic ka aya kiyakonot kana basa a mranao na sabnar a Miyabatal so Sambayang ka!. BA PHAKATANOGA SO KAKONOT ANTAAKA MASOLN? So Imam a konot sii ko sambayang a Fajr odi na sii ko witr ko kalooki ko ramadan na mapakatanog iyan a kapkonot iyan, sa mlagid o aya pisambayangan iyan na sambayang a matanogon so batiya odi na sambayang a masolnon so batiya na aya dn a okit iyan na maphakatanog iyan so kapkonot iyan ka para pkhan’g o mga Ma’mom iyan ka para iran pkha- amin. ﻗﺎﻝ ﺍﻟﺸﺒﺮﺍﻣﻠﺴﻲ : ﻭﺇﻧﻤﺎ ﻃﻠﺐ ﻣﻦ ﺍﻹﻣﺎﻡ ﺍﻟﺠﻬﺮ ﺑﺎﻟﻘﻨﻮﺕ ﻓﻲ ﺍﻟﺴﺮﻳﺔ ، ﻣﻊ ﺃﻧﻬﺎ ﻟﻴﺴﺖ ﻣﺤﻼ ﻟﻠﺠﻬﺮ ، ﻷﻥ ﺍﻟﻤﻘﺼﻮﺩ ﻣﻦ ﺍﻟﻘﻨﻮﺕ ﺍﻟﺪﻋﺎﺀ ، ﻭﺗﺄﻣﻴﻦ ﺍﻟﻘﻮﻡ ﻋﻠﻴﻪ ، ﻓﻄﻠﺐ ﺍﻟﺠﻬﺮ ﻟﻴﺴﻤﻌﻮﺍ ﻓﻴﺆﻣﻨﻮﺍ. ﺍﻫـ. Pitharo o Imam Al-Shabramalsi: “Aya Sabap a kaphakatanoga o Imam ko kakonot iyan sii ko sambayang a masolnon so batiya abadi so sambayang a masolnon so batiya na knabaon phakatanoga so batiya na aya sabap a kaphakatanoga niyan ko kakhonot iyanon na sabap sa aya Antap ko kakonot na Kandowaa ago para pkha-amin o mga ma’mom, na giyoto i sabap a kaphakatanoga niyan ko konot iyan ka para pkhan’g o mga ma’mom”. Giyanan i katharo o Imam Al-Shabramalsi Sii anan panonompang ko Imam, na so mipantag ko gii zambayang a tarambisa (infiradi) na aya Sunnah na misoln iyan a kapkonot iyan sii ko Langowan a Sambayang . ﻭﺻﻠﻰ ﺍﻟﻠﻪ ﻋﻠﻰ ﺳﻴﺪﻧﺎ ﻣﺤﻤﺪ ﻛﻤﺎ ﺫﻛﺮﻩ ﺍﻟﺬﺍﻛﺮﻭﻥ ﻭ ﻏﻔﻞ ﻋﻦ ﺫﻛﺮﻩ ﺍﻟﻐﺎﻓﻠﻮﻥ