Antunaa i Lbi a Mala a Dosa?! عَنْ عَبْدِاللَّهِ بْنِ مَسْعُوْدٍ -رَضِيَ اللهُ عَنْهُ- قَالَ: سَأَلْتُ النَّيِيَّ -صَلَّى اللَّهُ عَلَيْهِ وَسَلَّمَ-: "أَيُّ الذَّنْبِ أَعْظَمُ عِنْدَ اللهِ؟ قَالَ: أَنْ تَجْعَلَ لِلَّهِ نِدًّا وَهُوَ خَلَقَكَ، قُلْتُ: إِنَّ ذَلِكَ لَعَظِيْمٌ، قُلْتُ ثُمَّ أَيٌّ؟ قَالَ: أَنْ تَقْتُلَ وَلَدَكَ تَخَافُ أَنْ يَطْعَمَ مَعَكَ، قُلْتُ: ثُمَّ أَيٌّ؟ قَالَ: أَنْ تُزَانِيَ حَلِيلَةَ جَارِكَ" مُتَّفَقٌ عَلَيْهِ. Miyakapoon a Thotol ko Abdullah Ibn Mas'oud (R.A.) a Pitharo iyan: Inipakaiza akn ko Nabi (S.A.W.) o : "Antunaa i Lbi a Mala a Dosa sii ko Allah? Pitharo iyan: So Kambaal ka sa Saginda o Allah a skaniyan i Miyadn rka, Pitharo akn: Mataan! A Thito anan a Mala, Pitharo akn: Oriyan iyan na Antunaa pman? Pitharo iyan: So Kabuno angka ko Wata aka sa Ikaalk ka a Kapakaatnuang iyan rka, Pitharo akn: Oriyan iyan na Antunaa pman? Pitharo iyan: So Kazinai ngka ko Karuma o Siringan ka" Piyagayonan i Bukhari go si Muslim. OSAYAN: So Simba na Kabnar anan o Miyangadn, da a Kabnaron o mga Kaadn, so Kiyatharowaon o Nabi (S.A.W.) sa: "Skaniyan i Miyadn rka" na Dalil anan ko di Kapapakay o Kapanakoto, Andamanaya i Kiplagidn ka ko Miyangadn ko Kaadn iyan?, Giyanan i Lbi a Mala a Dosa sii ko Allah, So Kapanakoto na Skaniyan i Lbi a Mala a Dosa sa dadn a Sangkot iyan. Oriyan iyan na so Kabunowa ko Ginawa sii ko di Ontol, Pd pn anan ko mga Ala a Dosa ko Oriyan o Kapanakoto, Pitharo o Allahu Taala: {وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا} النساء : 93. {Na sa Tao a Mamuno sa Miyaratiyaya a Pimbaba iyan, na Aya a Balas iyan na so Naraka Jahannam, Kakal roo, go Kararangitan skaniyan o Allah skaniyan go Pmorkaan iyan, go Thitiyagaran iyan sa Siksa a Mala} An Nisa: 93. Go Pitharo pn o Allah: {وَلاَ تَقْتُلُواْ النَّفْسَ الَّتِي حَرَّمَ اللّهُ إِلاَّ بِالحَقِّ...} الإسراء: 33. {Di niyo Mbunowa so Ginawa a so Piyka Haram o Allah so Kabunowaon Inonta bo sii ko Bnar...} Al Isra: 33. So Kabunowa ko Ginawa sii ko di Ontol na pd ko mga Ala a Dosa ko Oriyan o Kapanakoto, Na so Kabunowa ko Madasg na Aya Lbi a Mala ko Klasi a Kapamuno, Upama ko Bunowangka so Madasg ka na Dowa a Miyaoto ngka a Dosa: 1.Miyakapatay ka sa Niyawa sii ko di Ontol, 2. Minitulak ka so Tunganay ngka ago Miyaringasa aka. Upama ka aya a Bunoon o Tao na si Ama iyan (Pakawatann tano ron o Allah) odi na si Wata iyan, odi na si Pagari niyan, odi na so Madasg iyan, Na Giyana i Lbi a Mala ko Kapamomonowan, Ka so Kapamuno sa Niyawa sii ko di Ontol na Langon dn Haram ago Mala a Dosa, Ugaid na so Kabunowa ko Madasg i Minitaralo ron. Batagolabaw ron Igira a adn a Panarimaon o Tao a Binasa, Ibarat iyan na Ipkhawan iyan oba niyan di Mapr, dadn a Sangkaan san a Mataan a Marata anan a Panarima, Sa Lagid o Btad o Masa a Jahiliyyah a Pmbunoon iran so mga Wata iran sa Kalk sa Kamrmr. So pman so Kazina na Haram anan a dadn a Sangkot iyan, Pitharo o Allah: {وَلا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلا} الإسراء: 32. {Go di Kano Pagobay ko Kazina, Ka Mataan! Aya a Miyabaloy a Pakasisingay, go Miyakaratarata a Okit} Al Isra: 32. So Kazina na dadn a Sangkaanon a Haram, Ugaid na so Kazinai ko Karuma o Siringan na Minitaralo a Haram, Kagiya a so Siringan na Sasarigan ka niyan ko Kasisiringan, na o Triador angka ko Pamiliya niyan na Giyanan i Lbi a Mala ko Kapanriador. THANODAN: Giyanan a Kaoona o Kapanakoto na aya a Zabotn san na so Kapanakoto na da a Lawan iyan a Mala a Dosa. Ka di anan Iprilo Allah sa Tama sa di Thawbat so Tao. والله أعلم! وصلى الله وسلم على حبيبنا محمد