Pangoyat ko agama islam na isa anan a kakhakuwaa tanu ko sindao siko turoan o allah.paliyogat ko ipzakatawan a maknal iyan so agama tanu a islam..
Tuesday, 8 December 2015
So Kapakallbi o Kasapngi ko Paawing o mga Muslim, goso Kapakalbodi kiran, goso Kasolve'a ko mga Awida Akal iran!
So Kapakallbi o Kasapngi ko Paawing o mga
Muslim, goso Kapakalbodi kiran, goso Kasolve'a
ko mga Awida Akal iran!
ﻋﻦ ﺃﺑﻲ ﻫﺮﻳﺮﺓ -ﺭﺿﻲ ﺍﻟﻠﻪ ﻋﻨﻪ- ﻗﺎﻝ: ﻗﺎﻝ ﺭﺳﻮﻝ ﺍﻟﻠﻪ -ﺻﻠﻰ ﺍﻟﻠﻪ
ﻋﻠﻴﻪ ﻭﺳﻠﻢ" :- ﻣﻦ ﻧﻔﺲ ﻋﻦ ﻣﺴﻠﻢ ﻛﺮﺑﺔ ﻣﻦ ﻛﺮﺏ ﺍﻟﺪﻧﻴﺎ ﻧﻔﺲ ﺍﻟﻠﻪ ﻋﻨﻪ
ﻛﺮﺑﺔ ﻣﻦ ﻛﺮﺏ ﻳﻮﻡ ﺍﻟﻘﻴﺎﻣﺔ، ﻭﻣﻦ ﻳﺴﺮ ﻋﻠﻰ ﻣﻌﺴﺮ ﻳﺴﺮ ﺍﻟﻠﻪ ﻋﻠﻴﻪ ﻓﻲ
ﺍﻟﺪﻧﻴﺎ ﻭﺍﻟﺂﺧﺮﺓ، ﻭﻣﻦ ﺳﺘﺮ ﻣﺴﻠﻤﺎ ﺳﺘﺮﻩ ﺍﻟﻠﻪ ﻓﻲ ﺍﻟﺪﻧﻴﺎ ﻭﺍﻟﺂﺧﺮﺓ، ﻭﺍﻟﻠﻪ
ﻓﻲ ﻋﻮﻥ ﺍﻟﻌﺒﺪ ﻣﺎ ﻛﺎﻥ ﺍﻟﻌﺒﺪ ﻓﻲ ﻋﻮﻥ ﺃﺧﻴﻪ"... ﺃﺧﺮﺟﻪ ﻣﺴﻠﻢ .
Miyakapoon a Thotol ko Abu Hurairah (R.A.) a
Pitharo iyan: Pitharo o Rasulullah (S.A.W.): "Sadn
sa Tao a Pakaluagan iyan so Muslim a
Kasisimpitan na Pluagan skaniyan o Allah ko
Masimpit a pd ko mga Sisimpit sa Alongan a
Qiyamah, go Sadn sa Tao a Pakalbodan iyan so
Karrgnan na Phakalbodan skaniyan o Allah sa
Doniya go sa Alongan a Mawri, go Sadn sa Tao a
Sapngan iyan (so Paawing) o Muslim na
Shapngan o Allah (so Paawing iyan) sa Doniya go
sa Alongan a Mawri, na so Allah na Pthabangan
iyan so Oripn ko Kapthabangi o Oripn ko Pagari
niyan..." Piyakaliyo i Muslim.
OSAYAN:
Giyangkai a Hadith na Matatagoon Angkai a Pat
ka Klasi a Kaphiyapiya:
1."Sadn sa Tao a Pakaluagan iyan so Muslim a
Kasisimpitan na Pluagan skaniyan o Allah ko
Masimpit a pd ko mga Sisimpit sa Alongan a
Qiyamah"
Mataan a giyanan na Lbi a Mapiya a Tabang ko
Muslim, ka so Allah na Imbalas iyanon a
Kapluagi niyanon sa Alongan a Qiyamah; ka sii
sa Alongan a Qiyamah na tanto roo a Mitataralo
so Kasimpit o Kapagintao adi sii ko Doniya, na
sadn sa Tao a Kabaya iyan a Kaluagi ron o Allah
sa giyanan a mga Sisimpit na Pakaluagi niyan so
mga Pagari niyan ko Doniya, Igira a Miyailay
niyan so Kasisimpiti ko mga Muslim na
Panamari niyan i Kaluagi ron odi na Kapokas
iyan sangkoto a Masimpit ka anon Kabalasi sa
Alongan a Mawri.
2."Sadn sa Tao a Pakalbodan iyan so Karrgnan
na Phakalbodan skaniyan o Allah sa Doniya go
sa Alongan a Mawri"
Aya a Karrgnan na so Tao a Migagald a Otang a
di Phakagaga Mayad sa Otang a skaniyan na
Miyaoma so Kaskati ron, na Sadn sa Tao a adn a
Makaomawn a Muslim na Ogopan iyan sa
Kapakabayad iyan sa Otang na Mataan a so
Allah na Phakalbodan iyan skaniyan ko Margn a
Khisogaton ko Doniyan ago sii sa Alongan a
Mawri, Upama ka adn a Otang iyan rka na o
Khagaga ngka a Maapn kawn na Maap angkawn,
na odi na Nayawangka dn sa Taman sa Kaluagi
ron odi na Kapakagaga niyan Mayad, Pitharo o
Allahu Taala:
{ﻭﺇﻥ ﻛﺎﻥ ﺫﻭ ﻋﺴﺮﺓ ﻓﻨﻈﺮﺓ ﺇﻟﻰ ﻣﻴﺴﺮﺓ ﻭﺃﻥ ﺗﺼﺪﻗﻮﺍ ﺧﻴﺮ ﻟﻜﻢ ﺇﻥ ﻛﻨﺘﻢ
ﺗﻌﻠﻤﻮﻥ{ ﺍﻟﺒﻘﺮﺓ280 : .
{Na amay ka adn a (Mbayad a) Karrgnan na
Manayaw sa Taman sa Kalowagan, na so Ki-
Sidqah-an iyo ron i Mapiya rkano o skano na
Katawan iyo} Al Baqarah: 280. Upama ko
Nayawn ka taman sa Kaluagi ron, na giyoto i
Kapakalbodi ron, na Upama pman ko Maapn
kawn a i-Sidqah ngkawn badn na giyoto i Lbi a
Kapakalbodi ron, na Mala a Balas a
Khaparolingka ko Allah.
3."Sadn sa Tao a Sapngan iyan (so Paawing) o
Muslim na Shapngan o Allah (so Paawing iyan)
sa Doniya go sa Alongan a Mawri"
So Kasapngi ko mga Awrat o mga Muslim na pd
sa Hadith aya. Upama ko adn a Mailay ngka ko
Pagari ngka a Muslim a Marata a Galbk na
Sapngingka na go Pamangthomaingka, di
ngkawn Pakiphanagopn ko Sharonsarongan o
Madakl a Tao, odi na o adn a Katokawan ka a
Sikrito niyan na Dingka Mbulgara ko mga Tao, go
Dingka Phayaga so Pakagagabnan iyan, ka
Giyanan i Kasapngi ko Paawing o Muslim, na o
Nggalbk angkanan na Imbalas rka o Allah a
Kashapngi niyan ko Paawing ka sa Alongan a
Mawri.
4."So Allah na Pthabangan iyan so Oripn ko
Kapthabangi o Oripn ko Pagari niyan"
Aya a Katharo o Allahu Taala:
{ ﻭﺗﻌﺎﻭﻧﻮﺍ ﻋﻠﻰ ﺍﻟﺒﺮ ﻭﺍﻟﺘﻘﻮﻯ ﻭﻟﺎ ﺗﻌﺎﻭﻧﻮﺍ ﻋﻠﻰ ﺍﻟﺈﺛﻢ ﻭﺍﻟﻌﺪﻭﺍﻥ{...
ﺍﻟﻤﺎﺋﺪﺓ2 : .
{Na Thatabanga kano ko Mapiya goso
Kapananggila, go di kano Pthatabanga ko Dosa
go Kapriridowai...} Al Maidah: 2.
So Manosiya na Makikinanglan iyan so
Tabangon o Pagari niyan ko Masisingayo iyan ko
Btad iyan, na so Allah na Pthabangan iyan so
Oripn iyan ko Kapthabangi niyan ko Pagari
niyan, Mlagid o Aya a Initabang iyanon na
Tamok odi na Katharo na Kiyatabangan iyan.
Aya a Mala a Kitabang iyanon na so Kailaya
niyan ko Karibatan iyan ko Agama na
Mapakatiyolin iyan, odi na Kaugopan iyan sa
Kaomani ko Sabot iyan ko Islam, Giyanan i Lbi a
Mala a Tabangiyanon adi so Tamok a Khibgay
niyanon, na Imbalason mambo o Allah a
Kathabangi niyanon ko Kapthabangi niyan ko
Pagari niyan.
Giyangkai a Hadith na Pangoyat ini ko
Kipanagontamann ko Mapiya ko mga Tao ago so
Balas iyan, ka so Galbk i Towanga o Balas.
ﻭﺍﻟﻠﻪ ﺃﻋﻠﻢ! ﻭﺻﻠﻰ ﺍﻟﻠﻪ ﻭﺳﻠﻢ ﻋﻠﻰ ﺣﺒﻴﺒﻨﺎ ﻣﺤﻤﺪ !.
Subscribe to:
Post Comments (Atom)
No comments:
Post a Comment