So Kasusuat o Allah na sisii ko Kasusuat o Mbala a Loks!

So Kasusuat o Allah na sisii ko Kasusuat o Mbala a Loks! عَنْ عَبْدِ اللهِ بْنِ عَمْرٍو بْنِ الْعَاصِ -رَضِيَ اللهُ عَنْهُمَا- عَنِ النَّبِيِّ -صَلَّى اللهُ عَلَيْهِ وَسَلَّمَ- قَالَ: "رِضَا اللَّهِ فِي رِضَا الْوَالِدَيْنِ، وَسَخَطُ اللَّهِ فِي سَخَطِ الْوَالِدَيْنِ" أَخْرَجَهُ التِّرْمِذِيُّ، وَصَحَّحَهُ ابْنُ حَبَّان وَالْحَاكِمُ. Miyakapoon a Thotol ko Abdullah Ibn Amr Ibn Al Ash (R.A.), Miyakapoon a Thotol ko Nabi (S.A.W.) a Pitharo iyan: "So Kasusuat o Allah na sisii ko Kasusuat o Mbala a Loks, goso Rarangit o Allah na sisii ko Rarangit o Mbala a Loks" Piyakaliyo i Tirmidhie, go Piyaka Sahih i Ibn Habban go si Al Hakim. OSAYAN: Miyaosay tano ko Miyaona a Minipost tano a Mataan a so Kaatowi ko mga Ina na Piyaka Haram o Allah, na sii Sangkai a Hadith a Inaloy tano na Inosay niyan so Kababaloy o Kasusuat o Allah a sisii ko Kasusuat o Mbala a Loks, na o Kabaya aka a Masuat rka so Allah na Panamaringka a Masuat rka so Mbala a Loks ka, na o Kabaya aka mambu a Kararangitangka o Allah na Nggalbk ka sa Ikhararangit rka o Mbala a Loks ka; Kagiya a so Balas i Risulta o Galbk. Giyanan i Makanggogonanao sa Kala a Kabnar o Mbala a Loks apiya pn siran na mga Kafer siran. Pitharo o Allahu Taala: {وَوَصَّيْنَا الإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَى وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ (14) وَإِن جَاهَدَاكَ عَلَى أَن تُشْرِكَ بِي مَا لَيْسَ لَكَ بِهِ عِلْمٌ فَلا تُطِعْهُمَا وَصَاحِبْهُمَا فِي الدُّنْيَا مَعْرُوفًا...} لقمان: 14-15. {Na Piyanginsana ami ko mga Manosiya so Mbala a Loks iyan, Kiyaawidan skaniyan o Ina iyan ko Kalmk, a Maliliyawaw ko Isa a Kalmk, Go Miyakagnk sumuso ko sold o Dowa Ragon, Panalamat ka rakn ago so Mbala a Loks ka, ka sii rakn so Khabolosan (14) Na oba ka iran Mbaasa sa Kisakoton ka rakn ko da a Rk kawn a Sabot, na Dingka siran Pagunoti, go Pakipagpda ka kiran sii ko Doniya sa Adat a Mapiya...} Luqman: 14-15. So Loks ka na Apiya Kafer pn na Kinanglan a Makipagpda kawn ko Doniya sii ko Adat a Mapiya, Nggolalan sa Pnggastowan ka, Pphiyapiyaan ka, Pagalimaan ka, Ugaid na Dingka siran Pagunoti ko Kambaradosa sii ko Allah. Pitharo o Nabi (S.A.W.): "لا طاعة لمخلوق في معصية الخالق" رواه أحمد. "Da a Kapangungunotan ko Kaadn ko Kapmbaradosai ko Miyangadn" Piyanothol i Ahmad. Go adn a Hadith a Miyapanothol o Ali Ibn Abi Talib (R.A.) a Aya a Lapiyat iyan na: : "لا طاعة في معصية. إنما الطاعة في المعروف" متفق عليه. "Da a Kapangungunotan ko Kambaradosa, Aya a Kapangungunotan na sii ko Mapiya" Piyagayonan i Bukhari go si Muslim. Upama ka aya a Izugo rka o Loks ka na Imbagak ka so Sambayang na Dingka Pagunoti, na o Isugo iyan rka So Kazigopan odi na Makiphamasa rka sa Sigopan na Dingka Pagunoti, ka giyanan na Dosa, Knaba anan pd sa Kaato sa Loks, Ka upama ko Onotingka skaniyan ko Dosa na giyoto i Kiyapd iyan ko Kaato sa Loks, Aya a Patot rka na sii ngka Pagunoti so Loks ka ko Mapiya, aya a Maana na Knaba sii ko Dosa. "So Kasusuat o Allah na sisii ko Kasusuat o Mbala a Loks, na so Rarangit o Allah na sisii ko Rarangit o Mbala a Loks" Miyakaisa a adn a Miyakauma a Mama ko Rasulullah (S.A.W.) a Pphamangni sa Idin ko Nabi (S.A.W.) sa KapnJihad iyan, na Pitharo o Iyanon: "Ba Oyagoyag so mga Lok's ka?" Tigiyan a: Oway, na Tigo Nabi (S.A.W.) a: "Sii ka kiran Jihad". Piyakandod iyan skaniyan ko mga Lok's iyan. Aya a Zabotn san na Inpd o Nabi (S.A.W.) so Kaphiyapiyai ko Mbala a Loks sa Jihad. Makanggogonanao pn anan sa Kinanglan so Kaodas ko Mbala a Loks ko Jihad. Miyaaloy pn o mga Ulama a aya a Pakaasal a Kukoman o Jihad na Fardu Kifayah, na Kinanglan a Pkhiodas ko Mbala a Loks, so Pman so Jihad a Miyaulog sa Fardu Ayn na didn Ipagodas ko Mbala a Loks. والله أعلم! وصلى الله وسلم على حبيبنا محمد