So Osayan ko Kapakallbi o Kasiyapa ko mga Sogowan o Allah goso mga Lalangan iyan!

So Osayan ko Kapakallbi o Kasiyapa ko mga Sogowan o Allah goso mga Lalangan iyan! عَنْ ابْنِ عَبَّاسٍ -رَضِيَ اللهُ عَنْهُمَا- قَالَ: كُنْتُ خَلْفَ النَّبِيِّ -ﷺ- يَوْمًا فَقَالَ: ”يَا غُلَامُ: إِنِّي أُعَلِّمُكَ كَلِمَاتٍ: احْفَظْ اللَّهَ يَحْفَظْكَ, احْفَظْ اللَّهَ تَجِدْهُ تُجَاهَكَ, إِذَا سَأَلْتَ فَاسْأَلْ اللَّهَ, وَإِذَا اسْتَعَنْتَ فَاسْتَعِنْ بِاللَّهِ...“ رَوَاهُ التِّرْمِذِيُّ, وَقَالَ: حَدِيْثٌ حَسَنٌ صَحِيْحٌ. Miyakapoon a Thotol ko Ibn Abbas (R.A.) a Pitharo iyan: Sisii ako ko Talikodan o Nabi (S.A.W.) ko Miyakaisa a gawii, na Pitharo iyan: "Hay Bagowa Mama: Mataan a sakn na adn Ipagndao akn rka a mga Katharo: Siyapangka so Allah ka Siyapn ka niyan, Siyapangka so Allah ka Khatoon ka skaniyan a Babid ka, Igira a Miyamangni ka na Pangni ka ko Allah, go Igira a Miyangni ka sa Tabang na Pangni ka sa Tabang ko Allah…" Piyanothol i Tirmidhi, go Pitharo iyan a: Hadith a Hasan a Sahih. OSAYAN: Isa a Miyapanothol sa Hadith na so Ibn Abbas na sisii skaniyan ko Talikodan o Nabi (S.A.W.) a Khokoda siran sa Himar a so Ibn Abbas na Wata skaniyan pn sii ko Masa o Nabi (S.A.W.) a dapn Raota a Idad. "Mataan a sakn na adn Ipagndao akn rka a mga Katharo" Aya a Shabotn san na Patot so Kapamangthomai ko mga Kangodaan, Kagiya a so Nabi (S.A.W.) na gii niyan Pamangthomaan so mga Tao taman ko mga Bagowa Mama, go Pananagontamanan iyan siran, Lagid o Kiyapamangthomai o Nabi (S.A.W.) ko Omar Ibn Abi Salamah a Patalilowan o Nabi (S.A.W.), a skaniyan na Bagowa Mama, na Kagiya a Makaoma so Omar ka Khan na Tigon o Nabi (S.A.W.) a: "يَا غُلامُ: سَمِّ اللَّهَ، وَكُلْ بِيَمِينِكَ، وَكُلْ مِمَّا يَلِيكَ" "Hay Bagowa Mama: Mbismillah ka, go Kan`n ka so Kawanan ka, go Aya a Kan angka na so Marani rka" Piyamangthomaan skaniyan o Nabi (S.A.W.) a skaniyan na Wata, Na Tiyarima o Omar so Thomawn o Nabi (S.A.W.) a Badi skaniyan na Wata, ago Miyapamola oto ko Poso iyan, Ka so man so Bagowa Mama na Ptharima sa Thoma, ago di niyan Khalipatan so Thomawn, na Misabap san na Kinanglan so Kasiyapa tano ko mga Wata, Pitharo o Nabi (S.A.W.): "مُرُوا أَوْلادَكُمْ بِالصَّلاةِ وَهُمْ أَبْنَاءُ سَبْعِ سِنِينَ وَاضْرِبُوهُمْ عَلَيْهَا وَهُمْ أَبْنَاءُ عَشْرٍ وَفَرِّقُوا بَيْنَهُمْ فِي الْمَضَاجِعِ" "Sogoon iyo ko mga Wata iyo so Sambayang ko siran na Pito Ragon, na Dan`gn iyo kiran ko siran na Sapolo Ragon, go Pakamblablaga niyo siran sa mga Igaan" Ugaid na Kinanglan a Mindao tano kiran so Okit a Kashoti odi na Kapagabdas, ko Masa a siran na mga Iito siran pn ka an siran Makashambayang, Kinanglan o mga Wata so Ndaowan ka Limpiyo pn so Pamikiran iran, so Panarima iran na Limpiyo a da a Saninsaning iyan a Pphakararadon so mga Thomawn, Pitharo o Nabi (S.A.W.): "كُلُّ مَوْلُودٍ إِلاَّ يُولَدُ عَلَى الْفِطْرَةِ، فَأَبَوَاهُ يُهَوِّدَانِهِ أَوْ يُنَصِّرَانِهِ أَوْ يُمَجِّسَانِهِ" "Langon o Inimbawata na Inimbawata a Da a Saninsaning iyan, na so Mbala a Loks iyan i Pkhasabapan sa Kapkhabaloy niyan a Yahodi, odi na Christian, odi na Majosi". So gii Kambiata ko mga Wata na Mala anan a Sangan o mga Loks, Opama ko Mapiya a gii ron Kambiata na Pmbaloy a da a Saninsaning iyan a Pphagintao ko Mapiya a Kapagintao, na Opama ko aya a Kiyambiatawn na Marata na Khabinasa so Kapphantao niyan, ka Khaolog ko Marata a Parangay ago Ka-Khafir ago Kadadag. "Hay Bagowa Mama" Makanggogonanao ini sa Mataan a so Rasolollah (S.A.W.) na gii niyan Pamangndaon so mga Wata. "Mataan a sakn na adn Ipagndao akn rka a mga Katharo" Aya a Maana anan na Maito a Katharo, Kagiya a so Pphamangndao na diron Patot a Kapakagdama niyan sa Margn ko Pphangndaon iyan, ka aya a Okit a Kaphangndaowa niyanon na Maito Maito a mga Ndaowan ka an Milangag o Pphamangndaon iyan a Pamola ko Otk iyan, Di Khapakay ko Pphamangndao oba niyan Timbla sa Makaisa so Ipphamangndao niyan ko Pphangndaon iyan, Kinanglan na Maito Maito. Giyangkai a Miyaaloy o Nabi (S.A.W.) a mga Katharo na Pat Taga a Katharo: 1."Siyapangka so Allah ka Siyapn ka niyan": Aya a Maana na Siyapangka so mga Sogowan o Allah go Pananggilaingka so mga Lalangan iyan, sa Lagid o Kiyatharowaon o Allahu Taala: ﴿وَالْحَافِظُونَ لِحُدُودِ اللَّهِ وَبَشِّرِ الْمُؤْمِنِينَ﴾ التوبة: 112. {Go Khisisiyapn iran so mga taman o Allah, na Pphamanotholingka sa mapiya so Miyamaratiyaya} At Tawbah: 112. Go Pitharo iyan pn: ﴿هَـٰذَا مَا تُوعَدُونَ لِكُلِّ أَوَّابٍ حَفِيظٍ﴾ ق: 32. {Giyaya so Ididiyandi rkano a rk o oman i Pphananangoran (ko Allah) a Masiyapn} Qaf: 32. Aya a Maana a Ayat anan na Sisiyapn iyan so ma Tamana o Allah. Aya pman a Pipikirn sa Giyangkanan a Kasiyapa ko Allah na: So Kasiyapa ko Agama niyan a Islam ago so mga Sogowan iyan, ago so mga Lalangan iyan, na aya Mambo a Balas iyan na: "Siyapn ka niyan"; Kagiya a so Galbk i Towanga o Balas, Shiyapn ka niyan ko Agamangka, ago Shiyapn ka niyan ko Doniya aka, ago Shiyapn ka niyan ko Agamangka sa dingkawn Karibat, ago dikawn Mapokas, ago dikawn Kabinasaan, Kagiya a so Allah na Shiyapn ka niyan ko mga Fitnah, ago so mga Rarata, ago Shiyapn iyan pn so Badan ka ko dingka Khababayaan, ago Shiyapn ka niyan ko langon a gii rka nggolawla sa mga Rarata, ago Shiyapn ka niyan ko Mangankan a mga Pangangayamn, ago so Langon o Phakabinasa rka, Mataan a so Allah na Sisiyapn iyan so Oripn ko mga Rarata ago mga Piligro. Pitharo o Allahu Taala: ﴿لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ...﴾ الرعد: 11. {(So manosiya) Na adn a Pphamagilisaon (a mga Malaikat) sii ko Onaan iyan go sii ko Oriyan iyan a Sisiyapn iran skaniyan phoon sa Sogoan o Allah…} Ar Ra`d: 11. Aya a Maana a Ayat anan na: Adn a mga Pd iyan a mga Malaikat a Somisiyapon ko mga Rarata, ago mga Kabinasaan, ka odabo so Siyapon o Allah na Mataan a Miyabinasa skaniyan dn ko Paganay pn, Ogaid na so Allah na sisiyapn iyan skaniyan ko Agama niyan, ago so Badan iyan, ago so Tamok iyan, Matatatap so Tamok iyan a da a ba niyanon Khagdam a Kabinasaan, Lagid o Kapamankhaw ago so Salakaw san, Giyanan i Risulta o Kiyasiyapawn o Allahu Taala. 2."Siyapangka so Allah ka Khatoon ka skaniyan a Babid ka": Aya a Maana anan na pd ka so Allah, Kagiya a so Allah na pd o mga Oripn iyan lngon, Moslim antaa ka Kafir, Phipiyapiya antaa ka Lalong, na pd siran o Allah, Aya a Maana niyan na Katawan o Allah ago Phagilayn iyan so mga Galbk iran, Pkhailay niyan siran, Pkhan`g iyan so mga Katharo iran, Pkhaitong iyan siran goso mga Galbk iran, Totonggowan iyan siran, Giyanan na Rangkom anan ko mga Moslim ago so mga Kafir agoso Khipipiyapiya agoso mga Lalong. So pman so Kababaloy o mga Moslim agoso Miphipiyapiya Pd iyan siran na aya a maana niyan na Pthabangan iyan siran ago Sisiyapn iyan siran ago Pthawfiqan iyan siran ko Agama a Islam. Pitharo o Allahu Taala: ﴿قَالَ لَا تَخَافَا إِنَّنِي مَعَكُمَا أَسْمَعُ وَأَرَىٰ﴾ طه: 46. {Pitharo (o Allah): Di kano Khalk, Mataan! a Sakn na Babid iyo, Pkhan'g akn go Pkhaylay akn (so Khasowa iyo)} Taha: 46. Siyangor o Mosa goso Haron so Fir`awn a da a Lawan iyan a Mabagr a Miyaminasa ko Liyawao o Lupa na Pitharo iran a Dowa: ﴿قَالَا رَبَّنَا إِنَّنَا نَخَافُ أَن يَفْرُطَ عَلَيْنَا أَوْ أَن يَطْغَىٰ﴾ طه: 45. {Pitharo iran a Dowa: "Kadnan ami! Mataan! a skami na Ipkhalk ami oba kami niyan Sakotikaa, odi na Magoman a Kapphangakowala niyan} Taha: 45. Ino iran anan Miyatharo kagiya a so Fir`awn na Mabagr, ago sisii sa Tangan iyan so Langowan taman, na so Mosa ago so Haron na Dowadowa siran, a dadn a pd iran, na Tominidg siran sa Hadapan o Fir`awn na Pitharo kiran o Allah: ﴿قَالَ لَا تَخَافَا إِنَّنِي مَعَكُمَا أَسْمَعُ وَأَرَىٰ﴾ طه: 46. {Pitharo (o Allah): Di kano Khalk, Mataan! a Sakn na Babid iyo, Pkhan'g akn go Pkhaylay akn (so Khasowa iyo)} Taha: 46. Antunaa i Risolta? Miyabinasa so Fir`awn na raks a Miyagombasay so Bagr iyan goso Kadato iyan, Tiyabangan o Allah so Mosa ago so Haron (A.S.), Giyanan i Risolta o Kababaloy o Allah a Babid o mga Oripn iyan, Giyanan so Babid a Mappnto ko Miyamaratiyaya, Pitharo o Allahu Taala: ﴿إِنَّ اللَّهَ مَعَ الَّذِينَ اتَّقَوا وَّالَّذِينَ هُم مُّحْسِنُونَ﴾ النحل: 128. {Mataan! a so Allah na Babid o siran a Miyamananggila, go so siran a Miphipiyapiya} An Nahl: 128. Giyanan i Maana o Kiyatharowaon o Nabi (S.A.W.) a: "Siyapangka so Allah ka Khatoon ka skaniyan a Babid ka". 3."Igira a Miyamangni ka na Pangni ka ko Allah": Igira a Miyamangni ka Pantag ko mga Awida Akal ka na sii ka Pangni ko Allah, Kagiya a so Makhikinanglan ka na Palaya sisii sa Tangan o Allah, sisii sa Tangan iyan so Langon o Khabayaan ka, Pitharo o Allahu Taala: ﴿وَإِن مِّن شَيْءٍ إِلَّا عِندَنَا خَزَائِنُهُ وَمَا نُنَزِّلُهُ إِلَّا بِقَدَرٍ مَّعْلُومٍ﴾ الحجر: 21. {Na da a Nganin a ba ami di Mipapaar so Khitatagoanon, go da a Phakatoronn ami ron a ba di Madidiyangka a Mappnto} Al Hijr: 21. Pangni ka ko Allah, Dingka Phalada so mga Tao, Kagiya a so Kapalada ko mga Tao na Kapakaito ago Kapaka Rondan sii ko Kaadn, Pangni angka ko Allah so Langon o Khabayaan ka a Mapiya ko Doniya ago sa Alongan a Mawri, ka so Allah na Ipkhababaya iyan a Kapphamangningkawn, na so Mbawataan o Adam na Pkhararangitan ko Kapphaladangkawn. So Allah na Pkhararangitan igira a dikawn Phamangni, na so Mbawataan o Adam na Pkhararangitan igira a Piyalad a badi so Allah na Pkhababayaan iyan so Pphamamangni ron, Miyaaloy sa Hadith Qodsi a so Allah a Soti na Pthpad sa Langit ko Tomampar ko Doniya sa Katpad a Domadait ko Kala iyan ko Mori ko Gagawii na Tharoon iyan: "هَلْ مِنْ سَائِلٍ فَأَعْطِيه؟" "Ba adn a Phamangni ka Bgan akn skaniyan?" Sisii sa Tangan o Allah so Langowan taman, a skaniyan na Kawasa a Malimo a Maginawa, na Pangni kawn sa Nggolalan sa Ikhlas ko Niyat ka ago Kapananangoran sii rkaniyan, ka so Allah na Marani rka a Ptharima sa Pangni, Pitharo o Allahu Taala: ﴿وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ...﴾ البقرة: 186. {Go igira a Iniiza ako rka o mga Oripn akn, na Mataan! a sakn na Marani, Tharimaan akn so Pangni o Phangni igira a Miyangni rakn…} Al Baqarah: 186. Aya a sisan na Kinanglan a Lalayon Mikokoniksiyon so Babaya tano ko Allah, ago sii tano Iphagapas ko Allah so mga Awida Akal tano di Patot oba tano Palada so mga Tao, Kagiya a o Pangnin ko mga Tao na Kapakarondan kiran, ago so pn so Kapalada ko mga Tao na Kapakaito kiran. Amay pman ko Makhinanglan o Manosiya a Kapalada niyan ko mga Tao na Phamangni kiran sa sobo so Diyangka a Kailangan iyan, Ogaid na aya a Taralbi ago Mapiya na di kiran dn Phamangni. 4."Igira a Miyangni ka sa Tabang na Pangni ka sa Tabang ko Allah": So Allah na aya Pphanabang, Igira a Miyakakinanglan ka sa Tabang na Pangni ka sa Tabang ko Allah, Pitharo o Allahu Taala: ﴿إِيَّاكَ نَعْبُدُ وَإِيَّاكَ نَسْتَعِينُ﴾ الفاتحة: 5. {Skabo i Phzoasoatn ami, go Skabo i Phangniyan ami sa Tabang} Al Fatihah: 5. So Kapangni sa Tabang na Dowa: 1.So Kapangni sa Tabang ko Kaadn sa Shayi a da a Phakagagawn a rowar ko Allah, Lagid o Kapakapiyaa ko Paniyakit, goso Kapamangni sa Mori a Tao, giyanan na Pkhiitong anan sa Kapanakoto a Mala. 2.So Kapamangniya ko mga Tao ko Shayi a Khagaga iran, Lagid o Tamok, odi na Shayi a Khapakay, ogaid na so disan a Kapnggolawlaa na aya Taralbi. So Kapamangni sa Tabang ko mga Tao ko Khagaga iran na da a Karata iyan, Lagid Ibarat o adn a Prorann ka ko Trak ka ago so Salakaw san, Pd anan ko Kapamagogopa ko Mapiya, Pitharo o Allahu Taala: ﴿وَتَعَاوَنُوا عَلَى الْبِرِّ وَالتَّقْوَىٰ وَلَا تَعَاوَنُوا عَلَى الْإِثْمِ وَالْعُدْوَانِ...﴾ المائدة: 2. {Na Thatabanga kano ko Mapiya go so Kapananggila, go di kano Pthatabanga ko Dosa goso Kapriridoay…} Al Maidah: 2. Go gii Tharoon o Nabi (S.A.W.): "وَاللهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ..." "So Allah na Pthabangan iyan so Oripn ko Kapthabangi o Oripn ko Pagari niyan..." So Kapamagogopa ko Phakanggay a Gona na aya Taralbi. والله أعلم! وصلى الله وسلم على حبيبنا محمد!.

Pd sa mga Sabap a Kakhababayai o Allah ko Oripn!

Pd sa mga Sabap a Kakhababayai o Allah ko Oripn! عَنْ سَعْدٍ بْنِ أَبِي وَقَّاصٍ -رَضِيَ اللهُ عَنْهُ- قَالَ: سَمِعْتُ رَسُوْلَ اللهِ -ﷺ- يَقُوْلُ: "...إِنَّ اللَّهَ يُحِبُّ الْعَبْدَ التَّقِيَّ الْغَنِيَّ الْخَفِيَّ" أَخْرَجَهُ مَسْلِمٌ. Miyakapoon a Thotol ko Sa`d Ibn Abi Waqqas (R.A.) Pitharo iyan: Miyan`g akn so Rasolollah (S.A.W.) a gii niyan Tharoon: "…Mataan! a so Allah na Pkhababayaan iyan so Oripn a Masanggila, a Kawasa i Poso, a Masoln i Galbk" Piyakaliyo i Moslim. OSAYAN: So Sa`d Ibn Abi Waqqas na isa skaniyan ko miyangaoona a somiyold ko Islam ago tomiyogalin sa Madinah, ago isa skaniyan ko miyapanothol o Rasolollah (S.A.W.) a sapolo katao a phamakasold ko Sorga a mga oyagoyag pn. "Mataan! a so Allah na Pkhababayaan iyan so Oripn a Masanggila, a Kawasa i Poso, a Masoln i Galbk" Tlo a miyaaloy sangkai a Hadith a mga Sifat a ipkhababaya o Allahu Taala sii ko tao a giyanan i Sifat iyan, ago miyaaloy sangkai a Hadith a Mataan a pd sa Sifat o Allah so Babaya a Domadait ko Kala iyan a Soti: ❶"Pkhababayaan iyan so Oripn a Masanggila" : Giyanan so to a sisifat sa Kasanggila ago Kalk, so Kalk ko Allah: na gii nggolalan sa gii Kanggalbka ko mga Sogowan iyan sa arap ko balas iyan, ago so Kapananggilai ko mga Lalangan iyan sa Kalk ko Siksa iyan. So Katharo a Kalk odi na Sanggila (TAQOWA) na Katharo anan na Makararangkom ko langowan a sifat a Mapiya, Pitharo o Allahu Taala: ﴿...وَمَن يَتَّقِ اللَّهَ يَجْعَل لَّهُ مَخْرَجًا۞وَيَرْزُقْهُ مِنْ حَيْثُ لَا يَحْتَسِبُ...﴾ الطلاق: 2-3. {…Na sa tao a Ikalk iyan so Allah, na Snggayan iyan sa Milidas iyan ko Margn(2)Go Mbgan Iyan sa Pagpr a di niyan Mapipikir…} At Talaq: 2-3. Ago Pitharo iyan pn: ﴿...وَمَن يَتَّقِ اللَّهَ يَجْعَل لَّهُ مِنْ أَمْرِهِ يُسْرًا﴾ الطلاق: 4. {…Na sa tao a Ikalk iyan so Allah, na Snggayan iyan ko Okit iyan sa Malbod} At Talaq: 4. Pitharo iyan pn: ﴿...إِنَّهُ مَن يَتَّقِ وَيَصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ﴾ يوسف: 90. {…Mataan aya! a sadn sa Mananggila, go Phantang na mataan! a so Allah na di niyan Pagilangn so Balas ko Miphipiyapiya} Yosof: 90. So Kalk ko Allah na Isasangkoton o Allah so Kapakaapas ko Naraka sa Alongan a Mawri, Pitharo iyan: ﴿ثُمَّ نُنَجِّي الَّذِينَ اتَّقَوا وَّنَذَرُ الظَّالِمِينَ فِيهَا جِثِيًّا﴾ مريم: 72. {Oriyan iyan na Sabtn ami so Miyamananggila, na Ibagak ami roo so mga Darowaka, a Pkhidola iran a lb iran} Mariyam: 72. Giyanan i Pmbthowan sa Kalk odi na Kasanggila, na so Allah na Pkhababayaan iyan so Kipanananggila odi Khikaalkn, sa Lagid o Kiyaaloy niyan sa Qur-an, Pitharo o Allah a Soti: ﴿...إِنَّ اللَّهَ يُحِبُّ الْمُتَّقِينَ﴾ التوبة: 4. {…Mataan! a so Allah na Pkhababayaan iyan so Khipanananggila} At Tawbah: 4. Lagid iyan mambo a Pkhababayaan iyan so mga Baratawbat, Pitharo iyan: ﴿...إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ﴾ البقرة: 222. {…Mataan! a so Allah na Pkhababayaan iyan so mga Baratawbat go Pkhababayaan iyan so mga Barasoti} Al Baqarah: 222. ❷"Kawasa i Poso" : Aya a Pipikirn san a Kawasa na Kawasa so Poso iyan, Masosowat ko Rizki ron o Allah apiya pn i Kaito iyan, Pitharo o Nabi (S.A.W.): "لَيْسَ الْغِنَى عَنْ كَثْرَةِ الْعَرَضِ وَلَكِنَّ الْغِنَى غِنَى الْقَلْبِ" "Kna oba aya a Kawasa na so Madakl i Barandiya, Ogaid na aya a Kawasa na so Kawasa i Poso" Adn a Khatoon ka a Tao a Kawasa apiya pn Maito i Tamok, Sabap sa o adn a Miyomawn a Rizki apiya i Kaito iyan na Masosowaton, na adn pman a Khatoon ka a Tao a Kawasa sa Tamok na Pobri so Poso iyan, Sabap sa di Khapno a Potay niyan, Makakowa sa Magatos Nggibo na Makangnangna sa ma Dowagatos Nggibo. ❸"Masoln i Galbk" : Giyanan so Tao a Masoln i Galbk a di niyan Khababayaan so Kapayag o Galbk iyan ko Pangilayalayan o mga Tao, Sisikriton iyan so Galbk iyan sa Ikhlas sii ko Allahu Taala, Di niyan Khababayaan so Bantogan, Ikakagowad iyan a Kabantogawn o mga Tao, gii skaniyan Nggalbk sa mga Pipiya ogaid na knaba niyan pphakiilay ko mga Tao, Giyanan i Galbk a Pkhababayaan o Allah sabap sa Mawatan ko Kapakiilaylayn na Marani ko Kapag Ikhlas, Giyanan so Tao a di niyan Khababayaan so Kapangangarig, goso Bantoganon o mga Tao, aya a Pkhababayaan iyan na so Kasosowat o Allah ago so Iphakarani niyanon, Giyanan i Ipkhababaya o Allah. Aya sisii sangkai a Hadith na pd sa Ropaan o Allah so Babaya a Domadait ko Kala iyan a Soti, ago Ndodon pn so Kapakallbi angkai a Tlo a mga Sifat: Kalk odi na Kasanggila, Kakawasaan o Poso, Ikhlas ko Allah ko mga Katharo ago mga Galbk ago so Katawaranga ko Bantogan a phoon ko mga Tao, di niyan Kailangan so Bantoganon o mga Tao Ogaid na aya a Kailangan iyan na so Kasosowat o Allah apiya pn Kiyararangitan skaniyan o mga Tao. والله أعلم! وصلى الله وسلم على حبيبنا محمد

Pangoyat ko Kipanagontamann ko Mapiya!

Pangoyat ko Kipanagontamann ko Mapiya! ﻋﻦ ﺟﺎﺑﺮ -ﺭﺿﻲ ﺍﻟﻠﻪ ﻋﻨﻪ- ﻗﺎﻝ: ﻗﺎﻝ ﺭﺳﻮﻝ ﺍﻟﻠﻪ -ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ- ﻗﺎﻝ" :ﻛﻞ ﻣﻌﺮﻭﻑ ﺻﺪﻗﺔ" ﺃﺧﺮﺟﻪ ﺍﻟﺒﺨﺎﺭﻱ . Miyakapoon a Thotol ko Jaber (R.A.) Pitharo iyan: Pitharo o Rasulullah (S.A.W.): "So Langowan o Mapiya na Sadaqah" Piyakaliyo i Bukhari. OSAYAN: "So Langowan o Mapiya na Sadaqah" So Mapiya na Soranga o Marata, go so Mapiya na gii Nggolalan sa Tamok ago Mnang ago gii Nggolalan sa Katharo a Mapiya, Langon o Shayi a Ndodon so Kaphiyapiyai ko Muslim na Mapiya, Mlagid o Katharo antaa ka Galbk, So Katabangi ko Makakikinanglan na Mapiya, na so Kasolve'a ko Awida Akal o Makakikinanglan sa Tamok na Mapiya. Lagid iyan mambo a pd sa Mapiya: So Mapiya a gii Nggolalan sa Mnang a Giyoto so Kakhabaloy niyan a Phakaogop ko Kakowaa o Makakikinanglan ko mga Tao ko Awida Akal iran, Pitharo o Allahu Taala: { ﻣﻦ ﻳﺸﻔﻊ ﺷﻔﺎﻋﺔ ﺣﺴﻨﺔ ﻳﻜﻦ ﻟﻪ ﻧﺼﻴﺐ ﻣﻨﻬﺎ ﻭﻣﻦ ﻳﺸﻔﻊ ﺷﻔﺎﻋﺔ ﺳﻴﺌﺔ ﻳﻜﻦ ﻟﻪ ﻛﻔﻞ ﻣﻨﻬﺎ{... ﺍﻟﻨﺴﺎﺀ85 : . {Sadn sa Mangongogopan sa Kapangongogopan a Mapiya na adn a Kipantag iyanon, go Sadn sa Mangongogopan sa Kapangongogopan a Marata na adn a Bagiyan iyanon...} An Nisa: 85. So Kakhabaloy o Tao a Phakaogop ko mga Awida Akal o mga Tao a Kipakakikinanglan sa Kasolve iyan na pd ko Mapiya, ago pd ko Lbi ko mga Pipiya, So Katharo sa Mapiya na pd ko Mapiya, Igira a Inimbitiyarai ngka so Pagaringka sa Katharo a Mapiya ago Siyalam ka skaniyan na pd anan ko Mapiya. Lagid iyan mambo a pd ko Mapiya: So Kaintad o Buntal, a giyoto so Kapakalangas angka ko Buntal ka ko Pagari ngka; Kagiya a so Langon o Iphakapiya a Ginawa o Pagari ngka na pd sa Mapiya, Apiya i Kaito iyan. Dingka Pnanaytowa so Mapiya apiya i Kaito iyan i Balas, Pitharo o Nabi (S.A.W.) ko Kiyapanotholawn o Abu Dhar (R.A.): { ﻻ ﺗﺤﻘﺮﻥ ﻣﻦ ﺍﻟﻤﻌﺮﻭﻑ ﺷﻴﺌﺎ، ﻭﻟﻮ ﺃﻥ ﺗﻠﻘﻰ ﺃﺧﺎﻙ ﺑﻮﺟﻪ ﻃﻠﻖ} {Dingka dn Ppnanaytowa so Shayi a Mapiya, Apiya giyabo a Khitoonaan ka ko Pagaringka sa Kalangas a Buntal} Piyanothol i Muslim. ﻭﺍﻟﻠﻪ ﺃﻋﻠﻢ! ﻭﺻﻠﻰ ﺍﻟﻠﻪ ﻭﺳﻠﻢ ﻋﻠﻰ ﺣﺒﻴﺒﻨﺎ ﻣﺤﻤﺪ !.

Pd sa Kapiya o Kapagi-Islam o Tao!

Pd sa Kapiya o Kapagi-Islam o Tao! عَنْ أَبِيْ هُرَيْرَةَ -رَضِيَ اللهُ- عَنْهُ قَالَ: قَالَ رَسُوْلُ اللهِ -ﷺ- : ”مِنْ حُسْنِ إِسْلامِ المَرْءِ تَرْكُهُ مَا لاَيَعْنِيْهِ“ رَوَاهُ التِّرْمِذِيُّ, وَقَالَ: حَسَنٌ. Miyakapoon a Thotol ko Abu Horairah (R.A.) Pitharo iyan: Pitharo o Rasolollah (S.A.W.): "Pd sa Kapiya o Kapagi-Islam o Tao so Kibagakn iyan ko diron Phakanggay a Gona" Piyakaliyo i Moslim, go Pitharo iyan a Hasan. OSAYAN: Giyangkai a Hadith na pdai ko mga Pasodan o Islam sa Lagid o Miyaosay tano ko Miyaona a Mini Post tano a Pat a mga Pasodan o Islam ko Bandingan ko "Kapakallbi o Kasiyapa ko mga Sogowan o Allah goso mga Lalangan iyan". "Pd sa Kapiya o Kapagi-Islam o Tao so Kibagakn iyan ko diron Phakanggay a Gona" Kinanglan ko Manosiya a Kibagakn iyan ko da a Gona niyanon ko Agama niyan goso Alongan iyan a Mawri, Kinanglan a aya a Matayod iyan na so Kapnggonaan iyan ko Agama niyan goso Akhirat iyan. So Islam na aya a Maana niyan na: Skaniyan so Kambayorantang ko Allah ko Kaisaisa niyan goso Kasondong rkaniyan sa Kapangongonotan. Giyangkanan a Maana a Islam na Mararangkom iyan so mga Sifat a mga Pipiya a mga Ala, Langon o Inisogo o Allah na pd sa Islam, goso Langon o Inisapar iyan ago Piyakipananggilaan iyan na pd sa Islam. Aya a Islam na: so Kanggalbk ko mga Galbk sa Kapangongonotan, ago so Kapananggila sa Dosa ago so Inisapar, Miyaaloy sa Hadith a Pitharo o Nabi (S.A.W.): "الْمُسْلِمُ مَنْ سَلِمَ الْمُسْلِمُونَ مِنْ لِسَانِهِ وَيَدِهِ وَالْمُهَاجِرُ مَنْ هَجَرَ مَا نَهَى اللَّهُ عَنْهُ" "Aya a Moslim na so Tao a Iplintad a Mokarna o mga Moslim so Katharo iyan goso Galbk iyan, ago aya a Tao a Tomiyogalin na so Tao a Tiyalikodan iyan so nganin a Inisaparon o Allah" والله أعلم! وصلى الله وسلم على حبيبنا محمد!.

So Kaphiyapiyai ko Siringan Apiya pn i Kaito iyan a Shayi!

So Kaphiyapiyai ko Siringan Apiya pn i Kaito iyan a Shayi! ﻋﻦ ﺃﺑﻲ ﺫﺭ -ﺭﺿﻲ ﺍﻟﻠﻪ ﻋﻨﻪ- ﻗﺎﻝ: ﻗﺎﻝ ﺭﺳﻮﻝ ﺍﻟﻠﻪ -ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ" :ﺇﺫﺍ ﻃﺒﺨﺖ ﻣﺮﻗﺔ ﻓﺄﻛﺜﺮ ﻣﺎﺀﻫﺎ ﻭﺗﻌﺎﻫﺪ ﺟﻴﺮﺍﻧﻚ" ﺃﺧﺮﺟﻪ ﻣﺴﻠﻢ . Miyakapoon a Thotol ko Abu Dhar (R.A.) Pitharo iyan: Pitharo o Rasulullah (S.A.W.): "Igira a Tumininda ka sa Sawaw na Pakala angka so Ig iyan na Dawagingakwn so Siringan ka" Piyakaliyo i Muslim. OSAYAN: Giyangkai a Hadith na Makatutumpokai ko Miyaona a Minipost tano Pantag ko Kipanagontamann ko Mapiya. Na Dingka Ppnanaytowa so Mapiya apiya pn i Kaito iyan i Balas. Upama ka Tuminda ka sa Sawaw a Carne odi na Apiya Antunaa san na Pakadaklingka sa Ig na Bgingkawn so Siringan ka, na Dingkawn dn Ptharowa i: Apiya Maito na Bigan akn skano ron, ka Khapakay a apiya Maito a Mibgay ngka ko Siringan ka na Sabnar a Mapphakapiyangka a Ginawa niyan, na ay Dapat ka o aya a Midawag kawn na so Sobra pn ko Sawaw? Ibarat na Pangn'ngkn a Midawag kawn? Odi na Sapo a Carne? Odi na mga Onga a Sapad? Odi na mga Nditarn? Giyanan na Sobrawn anan a Iphakapiya a Ginawa niyan ago Sobra sa Kala a Balas. Aya a Pipikirn sa Hadith ini na Mataan a so Manosiya na di niyan Ppnanaytowa so Kaphiyapiyai ko Siringan sa Apiya Sawaw bo a Midawag iyanon. ﻭﺍﻟﻠﻪ ﺃﻋﻠﻢ! ﻭﺻﻠﻰ ﺍﻟﻠﻪ ﻭﺳﻠﻢ ﻋﻠﻰ ﺣﺒﻴﺒﻨﺎ ﻣﺤﻤﺪ

KOKOMAN O KA CELEBRATE SA CRISMAS

KOKOMAN O KA CELEBRATE SA CRISMAS Paganayron na kailangan a katokawan tano a gya angkanan a mga lagid anan a party na Bid'ah, HARAM sa Islam, Christmas, Birthday, Valintines day, Mothers day, Araw ng mga Patay, New year and Etc... so kapag Party sa angkanan a mga Occasion na Haram. na maka pantag sa angkanan a Pakaisha aka Kaka ami na kataya so rayagan anan: SO GIFT SII SA ANGKANAN A MGA OCCASION NA dOWA BARANG: 1. Gift a From Muslim to Kafir [ na aya Kokoman yan na Haram ] 2. Gift a From Kafir to Muslim... Na Khapakay a tarimaan o Muslim, oga-id na aya ni-at kawn na para maka piya a ginawa niyan a di marata a ginawa niyan, aya kaylaya niyan ko Islam na mapiya, magdam yan so kapiyangka i ginawa ka oba kalokalo na kababayaan yan so Islam na mag Islam. Gyanan i Tindg o mga Ulama o AhluSsunnah [ قال شيخ الإسلام ابن تيمية رحمه الله : " وأما قبول الهدية منهم يوم عيدهم فقد قدمنا عن علي بن أبي طالب رضي الله عنه أنه أتي بهدية النيروز فقبلها ] NOTE: Haram so kababaya-ingka ko Kafir, makikipag kaibigan ka lang s akanila para baka kung sakali na mg ISLAM sila. Kaizee at 11:16 PM 1- so kacelebrate ko crismas na daa anan siko islam sa pd anan sa bed'a, pud anan sa haram siko muslim obanyan anan gulawlaa.gyanan na ulawla a saruwang 'daa anan gulawla o mga sahabah'ka ulawla anan a knba muslim. na aya diiron kapananayanan ko diiron kanggolaolaa na so mga kafer ko kaphcelebrate iran sa new year go crismas na ruk anan a mga kafeer.. ________________________________Gya angkanan a ka Celebrate sa crismas na sii anan miya anad ko mga Sarowang a tao, na so Nabi "saw" na ini sapar yan so kapananayani ko mga Sarowang. Pitharo iyan: [ ﻣﻦ ﺗﺸﺒﻪ ﺑﻘﻮﻡ ﻓﻬﻮ ﻣﻨﻬﻢ ] Maana: sat ao a pananayanan yan so pagtao na sii kiran d'n p'dd. Hadith' Gyanan. A crismas na kaphananggilaan anan sabap sa mala a disan di manggulawla o mga saruwang a tao'madakla disan di makazina'kapaginum ka ndiscu ka pagidaida'na san pkipoon a di kapakanggalbk o mama babae go raga sa manguda a deran di kapakazina' Na pananggilaan tanu anan'ka mingisafar anan siko islam'oba tanu masuwa so mga kafeer' Pkhailanga so uras pkhada so tadm siko langun kanggalbk sa marata. Pangnin tanu ku allah a kasabutan tanu so islam'na go tunay haram go so halal. Ameeen

•Pd sa Waraan a so Mbawataan o Adam na Pkharibat!•

•Pd sa Waraan a so Mbawataan o Adam na Pkharibat!• ﻋﻦ ﺃﻧﺲ -ﺭﺿﻲ ﺍﻟﻠﻪ ﻋﻨﻪ- ﻗﺎﻝ: ﻗﺎﻝ ﺭﺳﻮﻝ ﺍﻟﻠﻪ -ﷺ" : -ﻛﻞ ﺍﺑﻦ ﺁﺩﻡ ﺧﻄﺎﺀ ﻭﺧﻴﺮ ﺍﻟﺨﻄﺎﺋﻴﻦ ﺍﻟﺘﻮﺍﺑﻮﻥ" ﺃﺧﺮﺟﻪ ﺍﻟﺘﺮﻣﺬﻱ, ﻭﺍﺑﻦ ﻣﺎﺟﻪ . Miyakapoon a Thotol ko Anas (R.A.) Pitharo iyan: Pitharo o Rasolollah (S.A.W.): "So Langon o Mbawataan o Adam na Pkharibat, na aya a Mapiya ko Phangariribat na gii Thatawbat" Piyakaliyo i Tirmidhi ago si Ibn Majah. OSAYAN: •"So Langon o Mbawataan o Adam na Pkharibat" Aya a Maana anan na Waraan iyan a Kapkharibat iyan, Kagiya a so Manosiya na Malobay a Pkharibat, da sakatao bo a Badi Kharibat. •So Karibat: Na Igira na Pkhabaloy a Dosa, Igira na Pphakasogok so Manosiya sa Dosa, Ogaid na pd dn anan sa Tabiat o Manosiya a Kapkhadosa niyan, ka da a Sakatao bo a badi Khadosa, Ogaid na pd sa Limo o Allah ko Manosiya a Likaan iyanon so Pintoan o Kathawbat ka adn Makathawbat so Oripn iyan a Miyaribat. •"Aya a Mapiya ko Phangariribat na gii Thatawbat" Opama ka Makasogok so Manosiya sa Karibatan na Pamakot sa Kapaka Tawbat iyan. •Aya a Maana a Kathawbat na: Kambabalingan, aya a Pipikirn san na so Kambalingan ko Kapangongonotan, kagiya a dadn a Khatoon ko Mbawataan o Adam a ba niyan Khapalagowi so Karibat, na so Karibatan na Mbidabida, Oagida na aya a Patot ko Manosiya na o Makasogok sa Karibatan na Pamakot Thawbat ago Pamakot mamngni sa Rila ko Allah, ka so Kathawbat na Pkhaponas iyan so Miyaonaan iyan a Dosa, Pitharo o Allahu Taala: ﴿ ﺇﻧﻤﺎ ﺍﻟﺘﻮﺑﺔ ﻋﻠﻰ ﺍﻟﻠﻪ ﻟﻠﺬﻳﻦ ﻳﻌﻤﻠﻮﻥ ﺍﻟﺴﻮﺀ ﺑﺠﻬﺎﻟﺔ ﺛﻢ ﻳﺘﻮﺑﻮﻥ ﻣﻦ ﻗﺮﻳﺐ...﴾ ﺍﻟﻨﺴﺎﺀ17 : . {Aya bo a Tawbat a Matatangkd ko Allah (a Katharimaa niyanon) na so rk o siran a gii ran Manggolawla so Marata sabap ko di Katao, oriyan iyan na Pshambot siran Thawbat …} An Nisa: 17. Pphamakot siran Thawbat, Knaba iran gii nggowamaya so Tawbat iran, Pitaharo o Allah a Soti: ﴿ ﻭﺍﻟﺬﻳﻦ ﺇﺫﺍ ﻓﻌﻠﻮﺍ ﻓﺎﺣﺸﺔ ﺃﻭ ﻇﻠﻤﻮﺍ ﺃﻧﻔﺴﻬﻢ ﺫﻛﺮﻭﺍ ﺍﻟﻠﻪ ﻓﺎﺳﺘﻐﻔﺮﻭﺍ ﻟﺬﻧﻮﺑﻬﻢ ﻭﻣﻦ ﻳﻐﻔﺮ ﺍﻟﺬﻧﻮﺏ ﺇﻟﺎ ﺍﻟﻠﻪ ﻭﻟﻢ ﻳﺼﺮﻭﺍ ﻋﻠﻰ ﻣﺎ ﻓﻌﻠﻮﺍ ﻭﻫﻢ ﻳﻌﻠﻤﻮﻥ﴾ ﺁﻝ ﻋﻤﺮﺍﻥ135 : . {Go siran na Igira a Miyakanggolawla siran sa Pakasisingay, odi na Kasalimbotan iran so mga Ginawa iran, na Katadman iran so Allah, na mangni siranon sa Maap Makapantag ko mga Dosa iran, ka ba adn a Phakada ko mga Dosa a rowar ko Allah? go di iran Thatapn so Pinggolawla iran (a Marata) a siran na Katawan iran} Ali Imran: 135. •Giyangkai a Hadith na Pphanotholn iyan a so Kapkhasogoka ko mga Karibatan na pd anan sa Tabiat o Manosiya, Ogaid na sabap ko Gagaw go Limo o Allah na Likaan iyan ko Manosiya so Pintoan o Kathawbat ka adn Mkathawbat so Manosiya, Giyanan i Bolong ko Karibatan, Kathawbat sii ko Allah a Soti. ﻭﺍﻟﻠﻪ ﺃﻋﻠﻢ! ﻭﺻﻠﻰ ﺍﻟﻠﻪ ﻭﺳﻠﻢ ﻋﻠﻰ ﺣﺒﻴﺒﻨﺎ ﻣﺤ