Aya a Ilaya niyo na so Tao a Skaniyan na sii ko Kababaan iyo!

Aya a Ilaya niyo na so Tao a Skaniyan na sii ko Kababaan iyo! عَنْ أَبِي هُرَيْرَةَ رضي الله عنه قَالَ: قَالَ رَسُولُ اللَّهِ صلى الله عليه وسلم: "انْظُرُوا إِلَى مَنْ هُوَ أَسْفَلَ مِنْكُمْ، وَلَا تَنْظُرُوا إِلَى مَنْ هُوَ فَوْقَكُمْ؛ فَإِنَّهُ أَجْدَرُ أَنْ لَا تَزْدَرُوا نِعْمَةَ اللَّهِ عَلَيْكُمْ". (رواه مسلم: 4/2275 ، رقم 2963). Miyakapoon a Thotol ko Abu Hurairah (R.A.) Pitharo iyan: Pitharo o Rasulullah (S.A.W.): "Ilaya niyo so Tao a skaniyan na sii ko Kababaan iyo, na di Niyo Pagilaya so Tao a skaniyan na sii ko Kapurowan iyo; ka Mataan aya! a Aya rkano Patot a Phakarn ko Kapnanaytowa ko Limo o Allah sii rkano" (Piyanothol i Muslim: 4/2275, No. 2963). Osayan: Aya a Zabotn sa Hadith anan na Piyakarayag iyan so Okit a di Kaikmat o Manosiya ko Doniya, a Nggolalan sa di niyan Kapakasabar ko Pkisogaton a Examin o Allahu Taala. Kinanglan ko Muslim a Kasabara niyan ko mga Tpngon o Allah. Lagid o Kapkhawafat o Madasg, Kasasakit, Kapopobri, kamrmr, goso Salakaw san. So Pobri na Kinanglan a aya a Pagilayn iyan na so Lbi ron a Pobri, Di niyan Pagilaya so Kawasa, Ka O Kabaya o Allah na Khapakay man a Balowin ka niyan a dadn a Bangka Bagiyan a Nganin san. Ugaid na Panalamat ka ko Allah ka Inpd ka niyan ko Tao a adn a rkiyan apiya pn Maito. Adn a Pobri a dadn a Rkiyan apiya so Kniyan ko Salongan iyan, a Ska na Mas Mapiya ka i Btad adi skaniyan. Na Panalamatingka so Allah go Podi angka skaniyan ka Inpd ka niyan ko adn a rkiyan apiya pn Maito. Dingka Pagilaya so mga Kawasa; Ka Khatonda ka niyan ko Rarangit o Allah go Khatonda ka niyan ko Dingka Kakhasowat ko Takdir rka o Allah, a aya a Matharooka na: Ino ako Mbaloya o Allah a Datar i Polano a Pobri a da ako Mabaloy a pd ko mga Kawasa?. Giyanan na da a Sangkaanon a Aya a Mituturo anan a Maana na Giingka Pnanaytoon so Limo rka o Allah, na Mala anan a Ipkhararangit o Allah. Upama ka ayangka Ilaya na so Tampar sa Kababaan ka na Giyoto i Phakasugo rka sa Kapakapanalamat ka ko Allah, ka so Btad ka na Lagid dn o Btad o Kadaklan ko mga Tao. So Tao a Mapipiya a Ginawa niyan na Ilaya niyan so Tao a Pkhasakit, ka Miyakapanalamat ko Allah. Na so Tao a Pkhasakit na aya a Ilaya niyan na so Tao a Lbi ron a Mitataralo sa Sakit ka Miyakapanalamat skaniyan ko Allah Sabap ko daon Thagorar so Sakit iyan. Thanodan: Giyanan so Makapantagon ko Kaoyagoyag ko Doniya. So pman so Makapantagon ko mga Simba na aya a Pagilayn tano na so Lbi a Mapiya. Knaba aya a Pagilayn tano na so mga Tao a Madaraynon odi na mga Lolobay, Ugaid na aya a Ilayn tano na so Lbi a mga Kakasag ko gii Kanggalbka ko Simba. So Simba na aya a Pagilayn tano na so Tampar tano sa Kapurowan ko Kapagagama. Izaingka a Ginawangka: Inongka skaniyan da Malagid ko Simba? Inongka da Pananayani so mga Shalih? Inongka da Pananayani so mga Ulama ka angka mambo Makathontot sa Ilmo? والله أعلم! وصلى الله وسلم على حبيبنا محمد

Pd sa Paparangayan ko mga Darpa a Phagontodan ago gii Thimotimoan!

Pd sa Paparangayan ko mga Darpa a Phagontodan ago gii Thimotimoan! عن ابن مسعود -رضي الله عنه- قال: قال رسول الله صلى الله عليه وسلم: "إِذَا كنتم ثلاثةً، فلا يتناجى اثنان دون الآخر، حتى تختلطوا بالناس؛ من أجل أن ذلك يحزنه" متفق عليه، واللفظ لمسلم. Miyakapoon a Thotol ko Ibn Mas'oud (R.A.) a Pitharo iyan: Pithro o Rasulullah (S.A.W.): "Igira a Miya Tlo kano na di Pphagtonga so Dowa a diron pd so Isa, Taman sa di kano Misaog ko mga Tao Kagiya a Khasabapan oto sa gii Kakharata a Ginawa niyan" Piyagayonan i Bokhari go si Muslim, so Lapiyat iyan na sii ki Muslim. OSAYAN: Giyangkai a Hadith na pdai sa Manonompang ko Paparangayan ko mga Darpa a Phagontodan ago Pkhatimoan sa Tao, So Matitimo a Tlo Katao na Isasapar kiran so Kapagtonga a diran pd so Isa kiran. Upama ka Magtonga so Dowakatao a diran pd so Isa kiran na Pkharata a Ginawa niyan Sabap sa Khapikir iyan a skaniyan i gii ran Pagtongaan, odi na Khapikir iyan a gii ran Pnanaytoon, odi na gii ran Sodiin, odi na gii ran Pamagantaan, na giyoto na Pphakararadon oto sa Rata a Ginawa. Pd sa Paparangayan ko mga Darpa a Phagontodan odi na Pkhatimoan sa Tao a Kinanglan a Marayag so Bitiyarawn, knaba Sobo so Dowa i gii mbitiyarai a diran pd so Isa kiran. Upama pman ka Madakl a Tao a Matatago ko Darpa ka Kasosobraan so Tlo Katao, na Da a Karata o gii Kapagtonga o Dowa Katao Sabap ko da a Khararadan iran sa Rata a Ginawa ka Madakl siran, na da a Khaadn ko mga Ginawa iran a Pangantap ko gii ran Pagtongaan. Giyanan i pd sa Paparangayan ko mga Darpa a Phagontodan odi na Pkhatimoan sa Tao. Makanggogonanao Angkai a Hadith sa Kahaharam o Kapagtonga o Dowa Katao a diran pd so Isa kiran. Ago Makanggogonanao pn sa O Kasobrai so Tlo Katao sa Kadakl na da a Karata o gii Kapagtonga o Dowa Katao sabap ko Kiyatharowaon o Nabi (S.A.W.): "حتى تختلطوا بالناس" "Taman sa di kano Misaog ko mga Tao" THANODAN: Pd san pn a Isasapar so gii Kambitityarai o Dowa Katao a adn a Ikatlo iran a aya a Phagosarn iran na so Basa a di Zabotn o Ikatlo iran. Ibarat iyan: Dowakatao a Mranao a gii Mbitiyarai a adn a pd iran a Maguindanaon a di Zabot sa Mranao na aya a gii ran Kambitiyarai na Mranao. Giyanan na pd anan a Inisapar Sabap sa Makapmamaana anan sa gii Kapagtonga o Dowakatao a diran pd so Isa Kiran. والله أعلم! وصلى الله وسلم على حبيبنا محمد.

So Osayan ko Kaphiyapiya goso Kadostaan!

So Osayan ko Kaphiyapiya goso Kadostaan! عن النواس بن سمعان رضي الله عنه قَالَ: سَأَلْتُ رَسُوْلَ الله صلى الله عليه وسلم عَنِ الْبِرِّ وَالْإِثْمِ؟ فَقالََ: "الْبِرُّ حُسْنُ الْخُلُقِ، وَالْإِثْمُ مَا حَاكَ فِي صَدْرِكَ، وَكَرِهْتَ أَنْ يَطَّلِعَ عَلَيْهِ النَّاسُ" رواه مسلم (2553) . Miyakapoon a Thotol ki An Nawwas bin Sam'an (R.A.) a Pitharo iyan: Piyakaizaan akn so Rasulullah (S.A.W.) Makapantag ko Kaphiyapiya ago so Dosa? Na Pitharo iyan: "Aya Kaphiyapiya: Na so Kapiya i Parangay, Na aya a Dosa: Na so Matatago a Sangkaan ko Puso oka go Ipkhagowad ka oba Kasawai ko mga Tao" (Piyanothol i Muslim 2553). OSAYAN: So Basa a Kaphiyapiya: na Mararangkom iyan so Langowan o Ropaan o Mapiya. Pitharo o Allahu Taala: {لَيْسَ الْبِرَّ أَنْ تُوَلُّوا وُجُوهَكُمْ قِبَلَ الْمَشْرِقِ وَالْمَغْرِبِ وَلَكِنَّ الْبِرَّ مَنْ آمَنَ بِاللَّهِ وَالْيَوْمِ الْآخِرِ وَالْمَلائِكَةِ وَالْكِتَابِ وَالنَّبِيِّينَ وَآتَى الْمَالَ عَلَى حُبِّهِ ذَوِي الْقُرْبَى وَالْيَتَامَى وَالْمَسَاكِينَ وَابْنَ السَّبِيلِ وَالسَّائِلِينَ وَفِي الرِّقَابِ وَأَقَامَ الصَّلاةَ وَآتَى الزَّكَاةَ وَالْمُوفُونَ بِعَهْدِهِمْ إِذَا عَاهَدُوا وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ أُولَئِكَ الَّذِينَ صَدَقُوا وَأُولَئِكَ هُمُ الْمُتَّقُونَ} سورة البقرة: 177. {Kna a ba Kaphiyapiya so Khipagadapn iyo ko mga Paras iyo ko Tampar sa Sbangan go sa Tampar sa Sdpan; Ugaid na aya a Miphiyapiya na so Tao a Miyaratiyaya ko Allah goso Alongan a Mawri, goso mga Malaikat, goso mga Kitab, goso mga Nabi, Go Bigan iyan ko Tamok iyan ko Kapkhababayai niyanon so mga Tunganay niyan, goso mga Wata a Ilo, goso mga Miskin, goso gii Mlayalayag (a Makakhakailangan a Miyakawang sa Lalan), goso Pphamangni, goso Pphamangaon sa Ginawa niyan, go Inipamayandg iyan so Sambayang, go Initunay niyan so Zakat, go Ipthoman iran so Diyandi iran Igira a Miyakandiyandi siran, go mga Papantang ko Masakit, goso Kapaka Thatalogdam, goso Masa a Kapanananggolo o Kambonowai, Na siran man so Miyamangimbnar, go siran man na siran so Miyamananggila} Al Baqarah: 177. So Kaphiyapiya na Matitimoon so mga Ropaan o Mapiya, na Aya a Soranga iyan na Dosa. So Kadostaan na Matitimoon so Langon o Marata. So Langon o Kanggalbk sa di Mapiya na Dosa. Giyoto a Kiyatharowaon o Nabi (S.A.W.) sa Aya a Kaphiyapiya na so Kapiya a Parangay na aya a Ilat oto na Pd ko Lbi a mga Pupuro ko Ropaan o Kaphiyapiya so Kapiya a Parangay. Knaba aya a Maana niyan na ba aya bo a Kaphiyapiya na so Kapiya a Parangay, Ugaid na so Kapiya a Parangay na Pd anan ko mga Pupuro ko Ropaan o Kaphiyapiya. So Parangay na pd anan ko Ropaan a Inibgay o Allah ko mga Manosiya, Upama ka aya a Ropaan iyan na Mapiya na Mapiya, na O Aya a Ropaan iyan na Marata na Marata mambo. Aya a Kapiya a Parangay: na so Kapakalangasa ko Buntal, goso Kipanagontamann ko Mapiya, goso Karna ko Phakaringasa ko mga Tao, goso Langon o Galbk Ndodon so Kaphiyapiyai ko mga Tao na Pd oto ko Kapiya a Parangay, Sabnar a Biyantog o Allah so Nabi (S.A.W.) sa Tigiyan: {وَإِنَّكَ لَعَلَى خُلُقٍ عَظِيم} القلم: 4. {Go Mataan a Ska na Thito a Thatakna ko Parangay a Mala} Al Qalam: 4. So Kapiya a Parangay na Sipat anan a Mapuro a Ipphamamili o Allahu Taala ko mga Oripn iyan, adn oto a so Kapiya a Parangay na Ittnay dn ko Tao, Adn pman oto a Pkhabago ko Tao Sabap ko Kaplayama niyanon ko Ginawa niyan. Aya a Kiyatnsanon na so Kapiya a Parangay na Sipat a Mapiya. Sadn sa Tao a Rizkiyan o Allah sa Kapiya a Parangay na Thawfiqan o Allah ko Kanggalbk sa mga Pipiya. So Kapiya a Parangay na Sipat anan a Mapiya a sii Khasokat o Tao ko Kapangongonotan ko Allah. Na so Karata a Saatan na Pkhapapas iyan ko Tao so Langon o Mapiya, Nago Pagawatn go Phananggilaan o mga Tao. So pman so Kiyatharowaon o Nabi (S.A.W.) sa so Dosa na skaniyan so Matatago a Sangkaan ko Puso goso di Kathatakna o Puso ko Sugoan a pd ko mga Sugoan a giyanan so Soranga ko Kaphiyapiya, go Ipkhagowad ka oba rka mazagipa o mga Tao, na Giyanan i Katimbl o Dosa. Upama ko Mailayngka ko Ginawangka so Sangkaan ko Shayi na go di Tarimaan o Puso oka, go diron Thana so Puso oka na Bagakn ka, Ka Makanggogonanao oto sa Dosa. والله أعلم! وصلى الله وسلم على حبيبنا محمد.

Osayan ko Kisasaparn ko Kapakatindga o Tao ko Lagid iyan ko Ontoda iyan! عن ابن عمر -رضي الله عنهما- قال: قال رسول الله صلى الله عليه وسلم: "لا يقيم الرجل الرجل من مجلسه ثم يجلس فيه، ولكن تفسحوا وتوسعوا" رواه الإمام أحمد والشيخان. Miyakapoon a Thotol ko Ibn Omar (R.A.) Pitharo iyan: Pitharo o Rasulullah (S.A.W.): "Di Phakatindga o Mama so Isa a Mama ko Ontoda iyan oriyan iyan na Skaniyan i Pagontodon, Ugaid na Ploaloag kano go Plulugara kano" Piyanothol i Imam Ahmad goso Dowa a Shiekh. OSAYAN: Giyangkai a Hadith na pd pnai ko Paparangayan ko mga Darpa a Phagontodan ago Pkhatimowan sa Tao. Sadn sa Maona ko Darpa na skaniyan i Lbiron a Kikabnar, Na di Khapakay ko Pizakatawan oba niyan Pakatindga ko Ontoda iyan, Mlagid o sii sa Masjid anta ka sii ko mga Darpa o mga Tao a Makaliliyo sa Masjid, Lagid o mga Walay, odi na sii ko mga Darpa sa Padian. Sadn sa Maona ko Darpa a Makaontodon na skaniyan i Lbiron a Kikabnar. Ugaid na Upama ka Tomindg skaniyan a Awaan iyan so Ontoda iyan odi na Darpa iyan na Khapakay a Montodon so Salakaw rkaniyan, Kagiya a Miyapokas skaniyan ko Kabnar sa giyoto a Darpa, So Pman so Kapakatindgawn o Salakaw rkaniyan a di niyan Ikasusuat na Karibatan oto a Mala ago Kapanalimbot. Amay pman ka so Darpa na Maligt na aya a Sugoan ko mga Tao na Ploaloag siran ka an Makaontod so Phakaoma, Pitharo o Allahu Taala: { يٰأَيُّهَا ٱلَّذِينَ آمَنُواْ إِذَا قِيلَ لَكُمْ تَفَسَّحُواْ فِي ٱلْمَجَالِسِ فَٱفْسَحُواْ يَفْسَحِ ٱللَّهُ لَكُمْ...} المجادلة: 11. {Hay so Miyamaratiyaya! Na Igira a Pitharo rkano a Ploaloag kano ko mga Darpa na Ploaloag kano, ka Loagangkano o Allah...} Al Mujadalah: 11. Kinanglan ko mga Tao a Kaploaloag iran ko Darpa para ko mga Pagari iran. Batagolabaw ron so Darpa ko Simba go gii Paganadan sa Ilmo. Thanodan: So Darpa na sadn sa Maonawn na ayaon Kikabnar. Di Khapakay so Kaona ko Darpa oriyan iyan na Bitadan iyan sa Shayi para da a Phakaontodon, ka pd anan sa Kapzalimboti ko mga Tao ko Kabnar iran. Isa ini a di Tano Maiin'ngka ko mga Darpa goso mga Masjid, Batagolabaw ron ko Alongan a Jumu'ah a Phagona so Tao sa Masjid na Pndmpasan iyan so Darpa sa Sambayanga na Oriyan iyan na Inawaan iyan na Aya a Kaphakauma niyan na amay ko magaan Kamatan. Mala anan a Karibatan. والله أعلم! وصلى الله على حبيبنا محمد!.

Pd sa Paparangayan ko Kasalam!

Pd sa Paparangayan ko Kasalam! عَنْ أَبي هُرَيْرَة رَضِيَ اللّه عَنَّهُ قَالَ: قال رَسُولُ اللّه صَلَّى الله عَلَيْهِ وَسَلَّمَ: "لِيُسلِّمِ الصَّغِيرُ عَلَى الْكَبِيرِ، والمارُّ عَلَى القَاعِدِ، والْقَلِيلُ عَلَى الكَثِيرِ" متفق عليه. وفي رواية المسلم: "وَالرَّاكِبُ عَلَى الْمَاشِيْ". Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Salama o Maito i Idad so Mala i Idad, go (Salama o) Sumasagad so Moontod, go (Salama o) o Maito (i Bilangan) so Madakl" Piyagayonan i Bukharie go si Muslim. Go isa a Miyapanothol ko Muslim na: "Salama o Khokoda so Plalag". OSAYAN: Miyaosay tano ko Miyaona a Inipost tano so Hadith a pd sa Kabnar o Muslim ko Lagid iyan a Muslim a Kasalama niyanon Igira a Minithoona iyan. Mataan a so Kipangorawn ko Salam na pd anan ko Paparangayan ko Kasalam, go pd anan sa Pkhasabapan a Pkhisold ko Sorga, Lagid o Kapamagana sa Pangn'ngkn, Kapiya a Katharo, goso Ka Qiyamul Layl ko Masa a Tuturogn so mga Tao na Langon anan Pkhasabapan sa Pkhisold ko Surga. So Kipangorawn ko Salam: na giyanan so Kindadawagaanon ko Lt o mga Muslim, kagiya a aya a Resulta niyan na Kakhakababayai ago Kakhakalayama o mga Puso. So Tao a adn a Simokt iyan goso pdiyan na andadn i Kasalama niyanon na Miyada a giyoto a Matatago kiran a Simokt. Aya a Zabotn sa Hadith anan sa Kiyatharowa niyanon a: "Salama o Maito i Idad so Mala i Idad" na so Mala i Idad na Kabnar iyan ko Maito i Idad a Kasalama niyanon, Na amay ko di Sumalam so Mayto i Idad na aya a Salam na so Mala i Idad. Sabnar a so Nabi (S.A.W.) na Siyalam iyan so Bagowa Mama a sumiyagad kiran. Ugaid na aya a Taralbi na aya Sumalam so Maito i Idad ko Mala i Idad. THANODAN: Khapakay ko Madakl a Sumasagad a Isa kiran bo i Sumalam ko Zagadan iran, Na so mambu so Madakl a Siyalam na Miyakatiyokop kiran dn a Sakatao a Summbag kiran. والله أعلم! وصلى الله وسلم على حبيبنا محمد

Osayan ko Kisasaparn ko Kaphangonai Sumalam ko Ahlul Kitab (Yahudi ago Christian)!

Osayan ko Kisasaparn ko Kaphangonai Sumalam ko Ahlul Kitab (Yahudi ago Christian)! عَنْ أَبِيْ هُرَيْرَةَ -رَضِيَ الله عَنْهُ- قَالَ: قَالَ رَسُولُ الله -صَلَّى اللَّهُ عَلَيْهِ وَسَلَّمَ-: "لا تَبْدَؤوا الْيَهُوْدَ وَالنَّصَارَى بِالسَّلاَمِ، وَإِذَا لَقيتُمُوْهُمْ فى طَرِيقِِ فَاضْطَّرُّوْهُمْ إلَى أَضْيَقِهِ" أخرجه مسلم. Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Di niyo pagonai so mga Yahudi goso mga Christian Sumalam, na go amay ko Mabalak iyo siran ko Lalan na Tgln iyo kiran a (Kapakaokit iran ko) Masimpit (ko Lalan)" Piyakaliyo i Muslim. OSAYAN: Giyangkai a Hadith na pd ini ko Paparangayan "Adab" ko Kasalam a Kinanglan a Di tano Pagonaan Sumalam so mga Yahudi goso mga Christian goso mga Kafer; Kagiya a siran na mga Ridoay o Allah. So Salam na aya a Kikabnar san na so mga Muslim sa Lagid o Kiyaosaya tano ron ko Miyaona a Ini Post tano ko Osayan ko "Nm Timan a Kabnar o Muslim ko Lagid iyan a Muslim". So pman so Kafer na da a Kabnar iyan ko Salam, aya a Wajib rktano na Thalikodan tano siran, ago Khararangitan tano siran para ko Allah. Ugaid na o Salama tano iran na Phakakasowin tano kiran so Salam; Kagiya so Islam na Agama a Kambadala sa Mapiya. Sadn sa Makanggolawla rka sa Mapiya apiya pn Kafer na Badalingka sa Lagid iyan a Mapiya, Sabnar a Pitharo o Allahu Taala: {لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ} المتحنة: 8. {Da rkano Saparn o Allah so siran a da rkano Pakimbunowai Makapantag ko Agama, go da kano iran Bogawa ko mga Darpa iyo, ko Kaphiyapiyai niyo kiran, goso Kapaginontolani niyo kiran, ka Mataan! A so Allah na Pkhababayaan iyan so mga Oontol} Al Mumtahanah: 8. Giyanan so Makapantag ko Kambadala sa Mapiya; kagiya a aniran marn a Ginawa iran ko Ringasa rktano, Makipmbadala tano kiran ko Mapiya, Kagiya a so Islam na Kambadala sa Mapiya, na O Salama tano iran na Ikhasoy tano kiran so Salam iran. Aya a Ropaan a Kasmbaga tano ko Salam iran na Ptharoon tano a: Walaykom, knaba aya a Ptharoon tano na: Wa Alaykomossalam Warahmatullahi Wabarakatoh, ka Aya a Kikbnar san na so Lagid ka a Muslim, So pman so Kafer na amay ka Salamn ka niyan na aya a Ismbag kawn na: Wa Alaykom. Lagid anan a Pinggolawla o Nabi (S.A.W.) a Igira a Siyalam skaniyan o mga Yahudi na aya a Ipsmbag iyan kiran na: Wa Alayko. Go giyanan pn i Inisugo o Nabi (S.A.W.) ko Katharo iyan: "قولوا: وعليكم" "Aya a Tharowa niyo na: Wa Alaykom". THANODAN: Giyanan a Kiyatharowaon o Nabi (S.A.W.) sa: "وَإِذَا لَقيتُمُوْهُمْ فى طَرِيقِِ فَاضْطَّرُّوْهُمْ إلَى أَضْيَقِهِ" "Go amay ko Mabalak iyo siran ko Lalan na Tgln iyo kiran a (Kakaokit iran ko) Masimpit (ko Lalan)" na aya a Maana anan na: O Mabalak ka sa Lalan na sii ka Pagokit sa Look ka an iyan Mitgl sa Ginawa niyan a Kapaokit iyan sa Kilid. Upama ka Mag'da ka sa Trak na siingka Pkaokita sa Look so Trak ka knabangka Ndasangi, aya a Sabap na an sii Makaokit sa Kilid ka giyoto i Masimpiton a Lalan. والله أعلم! وصلى الله على حبيبنا محمد

Pd sa Paparangayan "Adab" ko Kandiditaran!

Pd sa Paparangayan "Adab" ko Kandiditaran! عَنْ أَبِي هُرَيْرَةَ -رَضِيَ الله عَنْهُ- قَالَ: قَالَ رَسُولَ اللَّهِ -صَلَّى اللَّهُ عَلَيْهِ وَسَلَّمَ-: "إِذَا انْتَعَلَ أَحَدُكُمْ فَلْيَبْدَأْ بِالْيَمِيْنِ، وَإِذَا نَزَعَ فَلْيَبْدَأْ بِالشِّمَالِ، لِتَكُنِ الْيُمْنَى أَوَّلَهُما تُنْعَلُ، وَآخِرَهُمَا تُنْزَعُ" متفق عليه. Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Igira a Mitsinilas so Isa rkano na Panagipoon sa Kawanan, na Igira a In'ndaan iyan na Panagipoon sa Diyawang, Baloya niyan so Kawanan iyan a aya Paganay ko Katsinilas, na aya Mori ko Kapagndai ron" Piyagayonan i Bukhari go si Muslim. عَنْ أَبِي هُرَيْرَةَ -رَضِيَ الله عَنْهُ- قَالَ: قَالَ رَسُولَ اللَّهِ -صَلَّى اللَّهُ عَلَيْهِ وَسَلَّمَ-: "لَا يَمْشِ أَحَدُكُمْ فِي نَعْلٍ وَاحِدَةٍ ، لِيُحْفِهِمَا جَمِيعًا، أَوْ لِيُنْعِلْهُمَا جَمِيعًا أَوْ لِيَخْلَعْهَا جَمِيْعًا" متفق عليه. Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Di Plalakawn o Isa rkano so Satiman a Tsinilas, Baloya niyan a Langon Tiniil (a Ski niyan), odi na Palaya niyan Tsinilasi (a Ski niyan) odi na Ndai niyan langon" Piyagayonan i Bukhari go si Muslim. OSAYAN: Pd sa Paparangayan ko Kandiditaran so Kasulot sa: Tsinilas, Talompa, Sandal, goso salakaw san a Ipsulot sa Ski. Kinanglan ko Kasulot sa Tsinilas odi na Talompa odi na Sandal a aya a Pagonaan na Kawanan gobo pman so Diyawang, na sii pman kapagndai ron na aya a Pagonaan na so Diyawang na gobo pman so Kawanan. Kagiya a so Kandiditaran na pd anan sa Slasla ko Ginawa ago Kathanos sa Ginawa na Kinanglan a aya a Pkhaonaan ko Kasulotawn na Kawanan. So Kawanan na sii Phagosara ko mga Pipiya, Lagid o Kakan go Kainom, ago so Khawaan go Kapammgayan, ago so Kasold sa Masjid goso Kaliyo sa CR., goso pd a Kandiditaran. So pman so Diyawang na sii Phagosara ko Kaplimpiyowi ko Marzik, go sii ko Kaliyo sa Masjid, goso Kasold sa CR. So Pman so Kasulot sa Bangkala odi na Saroar na aya a Paganay a Isulot kawn na so Kawanan ka, na amay ko Pagndaan ka na so Diyawangka i Pagonaan ka. Ago pd pn sa Paparangayan "Adab" ko Kandiditaran a Kinanglan na Mbala so Tsinilas ka odi na Talompa odi na Sandal, Inisapar o Nabi (S.A.W.) so Kilalakawn ko Sasabala a Tsinilas odi na Talompa, Upama ko Sasabala so Tsinilas ka na Mas Tumo a Ndaingka ka giyoto i Sugoan rktano o Nabi (s.A.W.). Adn a Miyapanothol a so Shaitan na aya a Iplalakaw niyan na Sasabala a Tsinilas. والله أعلم! وصلى الله وسلم على حبيبنا محم