bae ko sorga

OSAYAN KO MANGA BABAY SA DONYIA A PHAMAKA SORGA Surah Al-Waqiah: Innā Ansha’nā Hunnah Inshā’ā, Faja’alnā hunna abkārāa, Uruban Atrābā,… (35) Mataan a inadn Ami siran sa samporna a kaadn (so manga babay a phamakasorga (36) Na biyaloy ami siran a manga raga a da katamaki (37) A mabolayoka a mrzarza (sa omor). Giankaya a manga Ayat na sii panonompang ko manga babay ko Doniya a manga Sālihah a amay ka makasold siran ko Sorga na khasoy siran sa manga raga a da katamaki a manga tataid a manisan a di khaoma kirakira so pangatataid iran ka so dn so Allāh i mimbi-at ko kiaadna kiran, sa miaaloy anan ko Hadīth o Rasūlullāh (saw) a pitharo o Abd bin Humayid a miakaoma a sakataw a loks a babay ko Rasūlullāh (saw) na piangni niyan on a isold skaniyan o Allāh ko sorga, na pitharoon o Rasūlullāh (saw) - sa kazandag - a hay ina i polan da a phakasold ko Sorga a loks, na miakatalikhod skaniyan a pzgad, na pitharo o Rasūlullāh (saw) a tharoa niyo ron a da a phakasorga a loks ka khasoy sa kangongoda, na biatiya iranon a ayat aya na miaka pia bo a ginawa a Ba-i oto….. Miakapoon ko Ummu Salamah a pitharo iyan a: Pitharo akn a: Hay Rasūlullāh (saw) panothola nka rakn so katharo o Allāh (swt) a: Hūrun Īn, na thig iyan a: Midadari a mapoti a kamataan (a maroyo i kapmata ko kathitialok iyan) na pitharo akn a so katharo o Allāh (swt) a: A ndadatar o montiya a matotonkop. Na thig iyan a: So katanos iran na datar o katanos o montiya a matotonkop ko plak o gtik a da a miakazkho on a lima, na pitharo akn a so katharo iyan a: Datar siran o orak a manok a matotonkop, na thig iyan a datar siran o kaoml o dadanglisn a lawlawk a so pkhailay nka ko sold o orak a middkt ko lokhabang, na pitharo akn a so katharo o Allāh (swt) a Uruban Atrābā, na thig iyan a siran so manga babay ko doniya a miamatay siran na manga loks a miamangitolod a mikhrs so kobal iran na inadn siran o Allāh (swt) a manga raga a da katamaki a mabolayoka a mrzarza sa omor, na pitharo akn a hay Rasūlullāh (saw) so manga babay ko Doniya na lbi a mapiya a di so Midadari ko Sorga? Na thig iyan a so babay ko Doniya (a phakasorga) na lbi a mapiya a di so midadari sa datar o kapakallbi o mapapayag o dmpas a di so lapis iyan a misosoln, na pitharo akn a hay Rasūlullāh (saw) antonaa i sabap oto? Na thig iyan a sabap ko sambayang iran ago so powasa iran ago so simba iran ko Allāh (swt) a Maporo ago Mala, sa pnditaran o Allāh (swt) so manga paras iran sa tihaya, ago so manga lawas iran sa manga sotra, a manga popoti i warna a manga gadong i nditarn, a manga binaning i imbolawan, a aya manga igagama iran na montiya a aya salday ran na bolawan, a gii ran tharoon a skami so kakal sa dayon sa dayon sa di kami dn phamatay, ago skami so mangaooml a somasawit sa limo a di kami dn khawiswisan, ago skami so domadarkt a di kami dn phakatogalin, ago skami so masosoat a di kami dn khararangitan, na so sangat a mapiya na sii ko taw a miaadn kami a rk iyan ago miaadn skaniyan a rk ami, na pitharo akn a hay Rasūlullāh (saw) so manga babay ko Doniya na makaphangaroma sa dowa kataw a mama odi na tlo odi na pat na oriyan iyan na phatay na phakasold ko Sorga ago phamakasold siran mambo ko Sorga na antaon on i makapha-ngaroma on? Na thig iyan a hay Ummu Salamah skaniyan a babay na pakapzamiliin kiran na aya philiin iyan na sadn sa mapiya kiran i parangay, sa ptharoon iyan a hay Kadnan ko giai i mapiya rakn i parangay ko Doniya na pakipangaromaan ka rakn skaniyan, hay Ummu Salamah miataban dn o mapiya i parangay so mapiya ko Doniya ago so Akhirat. (pianothol o Abul Qāsim at Tabarānī). Go miaaloy ko Hadīth a: So manga taw ko sorga na igira liawasan iran so manga karoma iran na makakasoy siran bo a manga raga a da katamaki, sa di siran dn khabitowann. Go miakapoon ko Abū Hurayrah, a miatharo a hay Rasūlullāh (saw) ino khalawasan ami so manga karoma mi ko Sorga? Na pitharo iyan a: So sakataw a mama na phakalawas ko manga karoma niyan ko salongan sa magatos a raga a da katamaki. Panamar sa so manga babay-mama a phaka batiya sii na matakp sa gii nian kazoa-soata phiya pia ko Allah (swt) sii sanka ia kibabatog sa Doniya a matag sagad a para ko Akhirat tano a tatap sa dayon sa dayon…