Pd sa Paparangayan "Adab" ko Kainom ago Kakan!

Pd sa Paparangayan "Adab" ko Kainom ago Kakan! Paganay a Hadith: عَنْ أَبِيْ هُرَيْرَةَ -رَضِيَ الله عَنْهُ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: "لَا يَشْرَبَنَّ أَحَدٌ مِنْكُمْ قَائِمًا" أخرجه مسلم. Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Didn Paginom so Isa rkano a Tumitindg" Piyakaliyo i Muslim. OSAYAN: Giyangkai a Hadith na pdai sa Paparangayan "Adab" ko Kainom, a aya a Taralbi ko Kaphaginom o Manosiya na Moontod, sa Lagid o Kiyanggalbkawn o Nabi (S.A.W.). Pd pn sa Paparangayan "Adab" ko Kainom a Kinanglan ko Phaginom na Makatlo niyan Miginawa so Kaphaginom iyan knaba Makisaisa Miginawa sa Lagid o Khaphaginom o Onta, na Phagawatn iyan a Ngari iyan ko Baso oman gominawa, Di Khapakay oba niyan Phagiyopa so Baso; sabap sa Kharzikan iyan so Baso ko Ikadowa odi na Ikatlo niyanon Minom. Kinanglan pn ko Kapaginom iyan na Moontod skaniyan ka giyoto i Taralbi, ka so Kainom a Tumitindg na Makroh knaba Haram; Kagiya a so Nabi (S.A.W.) na adn a Miyapanothol a Correct a Hadith a Mininom skaniyan a Tumitindg kagiya a Pphakarayagn iyan a Khapakay so Kainom a Tumitindg, Aya a Maana na so Kainom a Tumitindg na Makroh knaba Haram. Miyapanothol a Somiyong so Nabi (S.A.W.) ko Zamzam ko Kiyapakapasad iyan Thawaf sa Tawaful Ifadah ko Yawm An Nahr na Mininomon skaniyan a Tumitindg; aya a Sabap a Kiyainom iyan a Tumitindg na Pphayagn iyan ko mga Ummat iyan a Khapakay so Kainom a Tumitindg, Ugaid na aya a Taralbi ko Kainom na Pagontod so Tao. Hadith a Ikadowa: وَعَنْهُ -رَضِيَ الله عَنْهُ- أَنَّ رَسُولَ اللَّهِ -صَلَّى اللَّهُ عَلَيْهِ وَسَلَّمَ- قَالَ: "إِذَا أَكَلَ أَحَدُكُمْ فَلْيَأْكُلْ بِيَمِينِهِ، وَإِذَا شَرِبَ فَلْيَشْرَبْ بِيَمِينِهِ، فَإِنَّ الشَّيْطَانَ يَأْكُلُ بِشِمَالِهِ، وَيَشْرَبُ بِشِمَالِهِ" أخرجه مسلم. Miyakapoon pn a Thotol ko Abu Hurairah (R.A.) a Mataan a so Rasulullah (S.A.W.) na Pitharo iyan: "Igira a Kumiyan so Isa rkano na aya a Kan'n iyan na so Kawanan iyan, go Igira a Mininom na aya a Inomn iyan na so Kawanan iyan, ka Mataan a so Shaitan na aya a Ipkhan iyan na so Diyawang iyan, ago aya a Iphaginom iyan na so Diyawang iyan" Piyakaliyo i Muslim. OSAYAN: Giyangkai a Hadith na pdai sa Paparangayan "Adab" ko Kakan ago so Kainom, a Kinanglan a aya a Ipkhan o Tao ago Iphaginom iyan na so Kawanan a Lima niyan. Aya a sisii sa Hadith ini na Piyakarayag iyan so Kisasaparn ko Kakan ago so Kainom a Diyawang a Lima, aya a Sabap na so Shaitan na aya a Ipkhan iyan ago Iphaginom iyan na so Diyawang a Lima niyan. Na sktano n Isasapar rktano so Kapananayani ko Shaitan. THANODAN: Giyanan a Kinisaparn ko Kainom a Tumitindg na Knaba Haram ka Makruh; aya a Sabap na so Nabi (S.A.W.) na Mininom a Tumitindg, pd san pn so Kakan. Ikadowa na so Kakan ago Kainom a Diyawang a Lima na Haram; sabap sa so Shaitan na Pkhan ago Phaginom a Diyawang na Haram rktano so Kapapanayani ko Shaitan. والله أعلم! وصلى الله وسلم على حبيبنا محمد