TOTHOLAN KO KIYAPAKA PHANTAG O ABU DHAR GOSO BILAL (R.A.):

TOTHOLAN KO KIYAPAKA PHANTAG O ABU DHAR GOSO BILAL (R.A.): ============================================= ====== . Miyaka isa Alongan na mithimo-timo so mga Sahaba (r.a.) a sirambo ka diiran maapud so Rasolollah (salallaho ‘alaihe wassallam). Miyamangontod siran, Miyontod so Khalid bin Alwaleed, miyontod so ‘Awuf, miyontod so Bilal, go miyontod so Abu Dhar (r.a.)… Oriyan iyan na mindiscuss siran, mimbubugaya siran sa mapiya pamikeran mipantag ko kaphagawidi ko Agama, omani isa na pumbgay sa mapiya mosawir nago mapiya pamikeran, oriyan iyan na so Mosawir o Abu Dhar mipantag ko mga Sondaro o mga Muslim na dawon masoat so Bilal sa miyatharo iyan a giyaki Abu Dhar a Mosawir kanan na rebat. . Sabap roo na tabiat o tao a kababaloy niyan a manosiya na da magung-gun o Abu Dhar a ginawa niyan na miyaka tharo sa masakit sa miyaka girao ko Bilal a opamari wata a Kolitum (pakatopo a oripun) na apiya suka na putharoon ka a rebat ako? Oriyanoto na sabap mambo ko kababaloy a manosiya o Bilal na daniyandun mipaar na miyagombasay a puso iyan sa rata a ginawa na miyatharo iyan a mataandun ka ipurepot akunai ko Rasolollah (salallaho ‘alaihe wasallam). . Oriyanoto na pakagaanunta sa somiyongdun so Bilal ko Rasolollah (salallaho ‘alaihe wasallam), na rakusa piyanothol iyanon so kiyapaka phantag iran ko Abu Dhar na goso mga basa niyanon adi mapiya na sodun so kiyanugawon o Rasolollah (salallaho ‘alaihe wasallam) na miririga a paras iyan sa kiyapakagudam iyan sa rarangit sabap ko kinipanonongkaan o Abu Dhar ko Bilal sa kaitum iyan a mama a miilat ko bangsa niyan adi mapiya pakatopo niyan. . Oriyanoto na minilakit ko Abu Dhar a kiyararangiti ko Rasolollah (salallaho ‘alaihe wasallam) ko oriyano kiyanuga niyan ko mga ondor-ondoron o Bilal na aya miyasowa iyan na miyaka palalagoy sa Masjed a siyongowan iyan so Rasolollah (salallaho ‘alaihe wasallam) na rakusa siyalam iyan. Oriyanoto na petharo o Rasolollah (salallaho ‘alaihe wasallam) ko Abu Dhar: hay Abu Dhar, opama na inipanonongka aka ko Bilal si Ina iyan? Mataan a suka na miyakanggalubuk ka sa ola-ola a Jahil, (da sabot iyan). Sabap roo na miyaka goraok dun so Abu Dhar na rakusa dii mamanguni sa rela ko Rasolollah (salallaho ‘alaihe wasallam) nago petharo iyanon a pangunin iyan sa rela ko Allah sabap sangkotowa kiyapaka tharo iyan sa di mapiya mipantag ko Bilal. . Oriyan iyan na lominiyodun sa Masjed a punggoraok a siyongowan iyan so Bilal na kay ko masombak iyan so Bilal na minigadun ko lalan na rakusa inibutad iyan a paras iyan ko lopa na rakusa mizapa ko Bilal sa diniyandun iphoro a Bontal iyan taman sa di dapoan o Bilal sa paras ko kibubutadun niyanon ko lopa, na rakusa dii niyan tharoon a sakunaki e daa pakaid iyan na Mama na sukay kokormatun. . Sabap roo na giyakus o Bilal a olo o Abu Dhar a punggoraok dun mambo sa mala a phakagirao: anda manayaduni kakharawi ko domapo ko bontal a ipsoJuod ko Allah, ibut dun ko kaporo o Allah ka dikodun karawan obako kadapoi so bontal o pagariyakun a bontal iphangadap nago ipsoJuod ko Allah. Sabap roo na piyakatindug iyan so Abu Dhar na mirilai siran a magari sa piyaka lipatan iran so dairan kazinabotai sa lagidun oba daa miyasowa na rakusa tiyakup iran a diiran kangginawai. . Imanto na ikompir tanosan so butad tano igera aduna datano kazisinabotai ko kababaloy tanowa manosiya na goso kababaloy tanowa mga Muslim? Igera ana damakazinabota imanto na aya dii zinabota na Sontok ago sinapang taman sa pukhapolangan sa tao, kunaoba matag dapo a dikharawan ka timbak mismo na maluboda tantowa kapukharawaono sabaad. Subhanallah, panguninta ko Allah a matago rukutano so sipat o mga Sahaba a giyotoi sipat a tarotop a Mo’min / Muslim, muririlai tano nago taobat tano ko Allah nago ompiyaan tano so butad tano sabap sa di pagompiyaan o Allah so butad o pagtao taman sa diserani mompiya sa mga ginawa iran, dataro kiyatharo awono Allah sa Qur’an: ﺇﻥ ﺍﻟﻠﻪ ﻻ ﻳﻐﻴﺮ ﻣﺎ ﺑﻘﻮﻡ ﺣﺘﻰ ﻳﻐﻴﺮﻭﺍ ﻣﺎ ﺑﺄﻧﻔﺴﻬﻢ]ﺍﻟﺮﻋﺪ11:[ .