•Aya a Kaongangn o Tao na so Karrnk iyan!•

•Aya a Kaongangn o Tao na so Karrnk iyan!• عَنْ أَنَسٍ -رَضِيَ اللهُ عَنْهُ- قَالَ : قَالَ رَسُولُ اللَّهِ -ﷺ-: "الصَّمْتُ حِكْمَةٌ وَقَلِيلٌ فَاعِلُهُ" أَخْرَجَهُ الْبَيْهَقِي. Miyakapoon a Thotol ko Anas (R.A.) Pitharo iyan: Miyan`g akn so Rasolollah (S.A.W.) a gii niyan Tharoon: "So Karrnk na Ongan, na Miyakaitoito so gii ron Nggalbk" Piyakaliyo i Bayhaqi. OSAYAN: "So Karrnk na Ongan, na Miyakaitoito a so gii ron Nggalbk" •Miyapanothol a Giyangkai a Hadith na Miyakapoon ko Nabi (S.A.W.) ogaid na aya a Correct na pdai sa Katharo o Loqman Al Hakim. •So Loqman na isa skaniyan a Mama a Kiyagraran sa Maongangn a Mama, a Tag skaniyan a Habashah, a Maitm a Mama, na Bigan skaniyan o Allah sa Ilmo ago Kaongangn, Miyabaloy so Katharo iyan a Ongangn, adn a Miyaaloy o Allah sii ko Qur-an a mga Wasiyat iyan ko Wata iyan, Aya a Dalil sa Kaongan o Loqman na so Katharo o Allaho Taala: ﴿وَلَقَدْ آتَيْنَا لُقْمَانَ الْحِكْمَةَ أَنِ اشْكُرْ لِلَّهِ...﴾ لقمان: 12. {Na Sabnsabnar a Inibgay ami ko Loqman so Ongangn (na Pitharoon a): Panalamat ka ko Allah…} Loqman:12. •Adn a Miyapanothol a so Loqman na Miyaoma niyan so Dawd (A.S.) a gii Mbaal sa mga Rabn a Potaw, aya a Miyaaloy sa Qur-an na Piyakalmkon o Allah so Potaw, Na gii Mbaal so Dawd sa mga Rabn a Psholotn o mga Pathitidawa, a Ipklong iran ko mga Sandiyata, Na Miyontod so Loqman ko Obay o Dawd a so Dawd na Gagalbkn iyan so Potaw, na Iniishaon o Loqman o Antonaa i Ikidi iyan sa Giyoto a Potaw? Ogaid na da skaniyan Masmbag o Dawd sa Taman sa Miyapasad o Dawd so Galbkn iyan a Potaw a Pimbaalan iyan a Rabn, Oriyan o Kiyapakapasad o Dawd, na Kiyatokawan o Loqman a aya bs a gii niyan mbaalan na Rabn, Kagiya a Katokawan o Loqman na Tigiyan a: "الصَّمْتُ حِكْمَةٌ وَقَلِيلٌ فَاعِلُهُ" "So Karrnk na Ongan, na Miyakaitoito so gii ron Nggalbk" Aya a Maana na Niyayaw niyan a Kiyapasada o Dawd ko Potaw na aya bs a gii niyan mbaalan na Rabn, Opama ka dadn Pakaisha so Loqman ka niyayaw niyan a Kapakapasad o Dawd na Khatokawan iyan bo o Antonaa i Ikidii o Dawd sangkoto a Potaw apiya pn da niyan ishaan. Giyanan i Kiyatharowa niyanon sa so Karrnk na Ongangn. •Giyangkai a Hadith na Mlagid o sii Miyakapoon ko Nabi (S.A.W.) antaa ka sii ko Loqman Al Hakim na aya a Shabotnon na so Kisosogoon ko Kasiyapa ko Dila ko Kadakl a Katharo, Maiyaaloy anan ko Madakl a Hadith a Miyakapoon ko Nabi (S.A.W.), Pitharo o Nabi (S.A.W.): "مَنْ كَانَ يُؤْمِنُ بِاللَّهِ وَالْيَوْمِ الْآخَرِ فَلْيَقُلْ خَيْرًا أَوْ لِيَصْمُتْ" "Sadn sa Tao a Paparatiyayaan iyan so Allah goso Alongan a Mawri na Tharo sa Mapiya odi na Rrnk" Opama ka aya a Ilayan ka ko Ptharoon ka na adn a Gona niyan odi na Mapiya a Pagondasan iyan na Tharowangk, na o da a Gonawn na bakadn ggnk, Siyapangka so Dila aka, Pitharo o Nabi (S.A.W.) ko Mo`adh: "هَلْ يَكُبُّ النَّاسَ فِى النَّارِ عَلَى وُجُوهِهِمْ أَوْ عَلَى مَنَاخِرِهِمْ إِلاَّ حَصَائِدُ أَلْسِنَتِهِمْ" "Baadn a Mala a Kakhaklid o mga Bontal o mga Tao ko Naraka odi na so mga Paras iran a rowar ko Miyangararagon o mga Dila iran". •So Katharo na da a sangkaanon a Piligro sii ko Tao Inonta bo o ma Control iyan ago Masiyap iyan, a dadn a Ptharoon iyan a rowar sa adn a Gona niyan, So Katharo na Igira na Pkhaolog sa Kapanakoto, Igira na Kapamaganta, Kashoriyan (Modol Patrol), Igira na Pkhaolog sa Kapamaninta, So Dila na Matatago ko Piligro, Gii Tharoon o Nabi (S.A.W.): " مَنْ يَضْمُنُ لِي مَا بَيْنَ لَحْيَيْهِ وَرِجْلَيْهِ أَضْمُنُ لَهُ الْجَنَّةَ " "Sadn sa Nggarantiyan iyan rakn so Pagltan o Dowa a Sompa iyan goso Pagltan o Dowa a ski niyan na Pnggarantiyan akn ko Sorga". "Miyakaitoito so gii ron Nggalbk" •Aya a Kadaklan ko mga Tao na di Phakasabar, Miyakaitoito ko mga Tao a gii Makashabar ago Pkhagnggn iyan so Dila iyan, Kinanglan ko Tao a Kalbati niyan ko Madakl a Katharo, Inonta so Adn a Gona niyanon a Mapiya. •Pphangnin tano ko Allah a Masiyap so mga Dila tano, ago Siyapn tano niyan ko mga Katharo tano, Pangninta a Balowin iyan so mga Katharo tano a adn a gona niyan, ago sii Maosar ko Mala a gonaon ko Agama tano goso Akhirat tano. والله أعلم! وصلى الله وسلم على حبيبنا محمد

Baloyangka a Ginawangka ko Doniya a Lagid o Mananangga!

Baloyangka a Ginawangka ko Doniya a Lagid o Mananangga! ﻋﻦ ﺍﺑﻦ ﻋﻤﺮ -ﺭﺿﻲ ﺍﻟﻠﻪ ﻋﻨﻬﻤﺎ- ﻗﺎﻝ: ﺃﺧﺬ ﺭﺳﻮﻝ ﺍﻟﻠﻪ -ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ- ﺑﻤﻨﻜﺒﻲ ﻓﻘﺎﻝ" :ﻛﻦ ﻓﻲ ﺍﻟﺪﻧﻴﺎ ﻛﺄﻧﻚ ﻏﺮﻳﺐ ﺃﻭ ﻋﺎﺑﺮ ﺳﺒﻴﻞ"، ﻭﻛﺎﻥ ﺍﺑﻦ ﻋﻤﺮ ﻳﻘﻮﻝ: ﺇﺫﺍ ﺃﻣﺴﻴﺖ ﻓﻠﺎ ﺗﻨﺘﻈﺮ ﺍﻟﺼﺒﺎﺡ ﻭﺇﺫﺍ ﺃﺻﺒﺤﺖ ﻓﻠﺎ ﺗﻨﺘﻈﺮ ﺍﻟﻤﺴﺎﺀ ﻭﺧﺬ ﻣﻦ ﺻﺤﺘﻚ ﻟﻤﺮﺿﻚ ﻭﻣﻦ ﺣﻴﺎﺗﻚ ﻟﻤﻮﺗﻚ" ﺃﺧﺮﺟﻪ ﺍﻟﺒﺨﺎﺭﻱ . Miyakapoon a Thotol ko Ibn Omar (R.A.) a Pitharo iyan: Kiyaptan o Rasolollah (S.A.W.) a Barokan akn na Pitharo iyan: "Baloyangka so Katatagooka ko Doniyan a Lagid o Mananangga odi na (Lagid o) Somasagad sa Lalan", Aya a Btad o Ibn Omar na gii niyan Tharoon: Igira a Kiyagabiyangka na Dingka Pnayawa so Mapita, na Igira a Kiyapitaangka na Dingka Pnayawa so Magabi, go Kowa ka ko Kapipiya a ginawangka sa para ko Kasasakit ka, go Kowa ka ko Kaoyaoyag ka Para ko Kaphatay ngka" Piyakaliyo i Bukharie. OSAYAN: Giyangkai a Hadith na Aya a Mapapadalmon na so Kaito a Babaya ko Doniya, a Kinanglan ko Manosiya a di Mabimban ko Doniya, Aya a Patot rkaniyan na aya niyan Masangor so Alongan iyan a Mawri, goso Kapakaapas iyan roo, Ugaid na Knaba aya a Maana anan na ba niyan Thargn so Kambabanoga ko Rizki o Allah, Ka aya a Maana anan na Pmbabanogn iyan so Rizki o Allah ko Okit a Halal a Mawsar iyan ko Onot ko Allah, Ugaid na Kinanglan a di Mabimban ko Doniya, aya a Patot na aya a Ipthontot iyan ko Doniya iyan na para ko Alongan iyan a Mawri. "Baloyangka so Katatagooka ko Doniyan a Lagid o Mananangga" Aya a Maana a Mananangga: na Ikksa, odi na di Tao ko Ingd, Knaba Tatap a Ipphagintao niyan ko Darpa, ka Makaphikir na Mbaling bo ko Darpa iyan, odi na Pira ka Oras na Mbaling bo, na Giyanan i Maana a Mananangga, Na Lagid anan so Manosiya a Mananangga ko Doniya a Ngganatan iyan bo, ka Knabaon Tatap, na so Mo'min na aya a Tatap a Darpa iyan na so Alongan a Mawri, aya a Lalayon a Bantak a Pikir iyan na so Kapakatogalin iyan sa Alongan a Mawri, a aya a Btad iyan sangkai a Doniya na Lagid o Mananangga. So pman so Kafir na aya a Ingd iyan na so Doniya, da a Darpa a Bagiyan iyan sa Alongan a Mawri, Giyanan i Sabap a Kitataloga iran ko Doniya, na Lagid anan mambo so Monafiq a aya a Matatago ko Poso iyan na so Inam ko Doniya, na di niyan dn Khatadman a Alongan a Mawri, Didn Kikdi ko Pamikiran iyan a Alongan a Mawri ka Langon Doniya a Mibbnskon. Na o Kabaya aka a Katokawan ka o Antaa i Mama ko Doniya ago Antaa i Mama ko Akhirat? Na Ilayangka so Btad o mga Tao sangkai a Doniya, ka so Mo'min na Maito so Babaya iyan ko Doniya, di niyan Pagilangn so Omor iyan ko Doniya, go di ron Mattmbang, Knaba aya Bantak a Pikir iyan na so Doniya ka aya a Awida Akal iyan na so Akhirat iyan, na so Knaba Mo'min na Shoranga siran san, a Dadn a Labot iyan ko Alongan a Mawri. "Baloyangka so Katatagooka ko Doniyan a Lagid o Mananangga odi na (Lagid o) Somasagad sa Lalan" So gii Mlayalayag na Igira a Tomipad ko Pag'daan iyan ka ndkha ko Atag o Kayo na di skaniyan roo Pshonor ago diron Pthatap ka Ndayon bo ko Lalakaw niyan, na Datar anan so Tao a Miyatomo iyan so Akhirat iyan a aya bo a Indapo iyan ko Darpa na di Khathay ka Thogalin sa Alongan a Mawri, aya a Lalan iyan na Para ko Alongan a Mawri, sa Lagid o gii Mlayalayag a Ndkha na Makadkha na Idadayon iyan so Lalakaw niyan. Pitharo o Nabi (S.A.W.): " ﻣﺎﻟﻲ ﻭﻟﻠﺪﻧﻴﺎ، ﻣﺎ ﺃﻧﺎ ﻓﻲ ﺍﻟﺪﻧﻴﺎ ﺇﻟﺎ ﻛﺮﺍﻛﺐ ﺳﺎﺭ ﻓﻲ ﻳﻮﻡ ﺻﺎﺋﻒ، ﻓﺎﺳﺘﻈﻞ ﺗﺤﺖ ﺷﺠﺮﺓ ﺳﺎﻋﺔ ﻣﻦ ﻧﻬﺎﺭ ﺛﻢ ﺭﺍﺡ ﻭﺗﺮﻛﻬﺎ" "Da sii rakn ago sii ko Doniya, Da ko Katatago akn ko Doniya Inonta na Lagid o Khokoda a Lomiyalakaw sa Miyakasalongan ko gawii a Khakayaw, na Sominirorong ko Atag o Kayo sa Miyaka isa ka Oras a Domikha oriyan iyan na Giyanatan iyan" Datar anan so Nabi (S.A.W.) ko Katatago iyan ko Doniya. Oriyan iyan na Pitharo o Ibn Omar (R.A.): "Igira a Kiyagabiyangka na Dingka Pnayawa so Mapita, na Igira a Kiyapitaangka na Dingka Pnayawa so Magabi" Aya a Maana anan na: Dingka Thamana sa Planongka ko Doniya, Dingka gii Nggowamaya so Galbk ka, Pamakotingka ka ayabo a Bagiyan ka ko Doniya na so Masa a Katatagowan rka imanto, ka so Mapita na Dingka Katawan i Mapnggolawla. "Kowa ka ko Kapipiya a ginawangka sa para ko Kasasakit ka" So Kapipiya Ginawa na Knaba Tatap, na Kinanglan ko Tao a Kanggonaan iyan so Kapipiya Ginawa niyan, Kinanglan a Maosar ko Simba ko Allah, sii ko Qiyamul Layl, Kapamowasa ko Kadaondaw, sii ko mga Galbk a mga Pipiya, sii ko Jihad ko Lalan o Allah, Kagiya a amay ko Masakit skaniyan na di niyan Khagaga a Kanggalbka niyan san. "Go Kowa ka ko Kaoyaoyag ka Para ko Kaphatay ngka" Sii ko Kababaloy ngka a Bibiyag pn sangkai a Doniya na Osarangka oto ko Onot ko Allah, ka O Matay ka na Miyapotol rka so Koniksiyon ka ko Doniya, Miyaaloy sa Hadith a Pitharo Nabi (S.A.W.): " ﺇﺫﺍ ﻣﺎﺕ ﺍﻟﺈﻧﺴﺎﻥ ﺍﻧﻘﻄﻊ ﻋﻤﻠﻪ ﺇﻻ ﻣﻦ ﺛﻼﺙ: ﻣﻦ ﺻﺪﻗﺔ ﺟﺎﺭﻳﺔ، ﺃﻭ ﻋﻠﻢ ﻳﻨﺘﻔﻊ ﺑﻪ، ﺃﻭ ﻭﻟﺪ ﺻﺎﻟﺢ ﻳﺪﻋﻮ ﻟﻪ" "Igiraa Miyatay so Manosiya na Miyapotol so Galbk iyan Inonta bo so Tlo: So Ka-Sidqah sa Phagondas, Odi na so Ilmo a Kiyanggonaan, Odi na so Wata a Bilanga Tao a Mipphamangni niya skaniyan". ﻭﺍﻟﻠﻪ ﺃﻋﻠﻢ! ﻭﺻﻠﻰ ﺍﻟﻠﻪ ﻭﺳﻠﻢ ﻋﻞ ﺣﺒﻴﺒﻨﺎ ﻣﺤﻤﺪ !.

•So Kapananggilai ko Kapakasiig!•

•So Kapananggilai ko Kapakasiig!• عَنْ أَبِيْ هُرَيْرَةَ -رَضِيَ اللهُ عَنْهُ- قَالَ: قَالَ رَسُوْلُ اللهِ -ﷺ-: “إِيَّاكُمْ وَالْحَسَدَ, فَإِنَّ الْحَسَدَ يَأْكُلُ الْحَسَنَاتِ كَمَا تَأْكُلُ النَّارُ الْحَطَبَ“ أَخْرَجَهُ أَبُوْ دَاوْدُ. Miyakapoon a Thotol ko Abo Horairah (R.A.) Pitharo iyan: Pitharo o Rasolollah (S.A.W.): "Pananggilai niyo so Kapakasiig, ka Mataan a so Kapakasiig na Pkn iyan so mga Pipiya sa Lagid o Kapkhana o Apoy ko Itagon" Piyakaliyo i Abo Dawd. OSAYAN: •Pd ko mga Rarata a Paparangayan so Kapakasiig, Sabnar a Piyakipananggilaan anan o Nabi (S.A.W.) sa Pitharo iyan: “إِيَّاكُمْ وَالْحَسَدَ" "Pananggilai niyo so Kapakasiig" Oriyan iyan na Inaloy niyan so Kabinasaan o Kapakasiig a giyoto i Miyakabinasa ko Miyaonaan tano. •So Kapakasiig na aya a maana niyan na: So Kandingandingan sa Kada o Limo odi na Rizki ko Psiign, Igira a adn a Miyailay niyan ko Isa a Tao a Limoon o Allah na Makangnangna dn sa Mada a giyoto a Limoon o Allah, Giyanan i Kapakasiig. •So pman so Kandingandingana sa Kabaloy o Tao a adn a rkiyan a lagid o sisii ko salakaw ron na knaba oto Kapakasiig ka Kapangasigi oto, Sabnar a Miyaaloy o Nabi (S.A.W.) ko Katharo iyan: "لَا حَسَدَ إِلَّا فِي اثْنَتَيْنِ: رَجُلٌ آتَاهُ اللَّهُ الْكِتَابَ فَقَامَ بِهِ آنَاءَ اللَّيْلِ، وَرَجُلٌ آتَاهُ اللَّهُ مَالًا فَهُوَ يَتَصَدَّقُ بِهِ آنَاءَ اللَّيْلِ وَآنَاءَ النَّهَارِ" "Da a Kapangasigi Inonta bo ko Dowa: so Mama a Bigan o Allah (sa Knal) ko Kitab na Ininggolalan iyan ko Tnday o Kagagawii, goso Mama a Bigan o Allah sa Tamok a skaniyan na gii niyan Isha-Sadqah ko Tnday o Kagagawii go sii ko Tnday ko Kadaondaw" O adn a Mailay niyan a Mo`min na Mandingandingan iyan a Oba niyan bo Khalagid, na Knaba anan Kapakasiig, ka Bantogan pn o Tao a gii niyan Kandingandingana sa Kabaloy niyan a Lagid o gii nggalbk sa mga Pipiya, ago Pphananayanan iyan siran. •So Kapakasiig na aya Paganay a Dosa a Miyandosa sii ko Allah, Gowani ko Katagowan sa Siig so Iblis ko Adam, Kagiya a so Allah a Soti na Piyakalbi niyan so Adam ko Kiyaadna niyanon, Inadn skaniyan o Allah sa Minggolalan ko Lima niyan, Inindao niyanon so Langon o mga Ngaran, Inilbi niyan skaniyan ko mga Malaikat ko Katao, ago Inisogo iyan ko mga Malaikat a Kasojodi iranon sa Sakasakaw rkaniyan, Knaba pantag sa Simba rkaniyan, Kagiya a so Simba na sii bo Mappnto ko Allah, sa Lagid o Mbala a Loks o Yosof goso mga Pagari niyan a Siyojodan iran so Yosof sa Sakasakaw rkaniyan, Khapakay anan ko Sogowan ko Miyaonaan tano, Ogaid na sktano imanto na Isasapar rktano so Kasojodi ko Manosiya, Aya a Katimblai na Piyakalbi o Allah so Adam na Siniig skaniyan o Iblis, na Siyangka iyan a Kasojodi niyanon sabap ko Siig, na Siyopak iyan so Sogowan o Allah, na Inisiksaon mambo o Allah so Morka, goso Kiyabogawaon ko Sorga, goso Kiyaawat iyan ko Limo o Allah, Kagiya a Sopakn iyan so Sogowanon o Allah go somiyangka. •So Kapakasiig na skaniyan i Miyakatolod ko Wata o Adam sa Kiyabonowa niyan ko Pagari niyan, Pitharo o Allah a Maporo: ﴿وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ...﴾ المائدة: 27. {Na Pangadiingka kiran so Totholan ko dowa wata o Adam sii ko Bnar, Gowani a Khorban siran sa Korban, Na Tiyarima so phoon ko isa sa dowa oto, na da tarimaa so phoon ko pd iyan, Na Pitharo (o Qabil) a: Mbonoon ko ska dn…} Al Maidah: 27. So da kiran Tarimaa so Korban iyan na Pitharo iyan ko pdiyan a Tiyarima so Korban iyan a: Mbonoon akn skadn, Siniig iyan skaniyan ko Limoon o Allah a Soti, Biyono iyan so Pagari niyan sa Kaplalim ago Rido sabap ko Siig, a giyanan i Paganay a Miyaadn a Bono ko Liyawaw o Lopa, a Skaniyan i Pagampaganay a Minggalbk ko Kapamono, na Giyoto na Miyabaloy a Dosa niyan ko oman i Pmbonoon sa Kaplalim, na Giyanan na ayabo a Sabap iyan na Kasiig. •Lagid anan mambo so mga Yahodi gowani a Sogoon so Mohammad (S.A.W.), na so mga Arab ko masa niyan na Siniig iran skaniyan ko Limoon o Allah a giyoto so Kiyasogowaon, Kagiya a aya a Kabaya iran na sii Matago so Kana-Nabi-i ko Mbawataan o Israil, sa di iran Kabaya oba sii Matago ko Salakaw kiran, na Siniig iran so Nabi tano a Mohammad (S.A.W.) ago siyangka iran, Miyasogo siran o Kasiig sa Kiyaongkira iran ko Nabi (S.A.W.), a badi siran na Katawan iran a Mataan a skaniyan na Sogo o Allah, ago Makikilala iran skaniyan sa Lagid o Kakikilalaa iran ko mga Wata iran, Pitharo o Allah a Maporo: ﴿...حَسَدًا مِّنْ عِندِ أَنفُسِهِم مِّن بَعْدِ مَا تَبَيَّنَ لَهُمُ الْحَقُّ...﴾ البقرة: 109. {…Kasiig a phoon ko mga Ginawa iran ko oriyan o Kiyapayag kiran o Bnar…} Al Baqarah: 109. •Sabap san na so Kapakasiig na skaniyan i Pkhasabapan ko Kapamono ago so Rido ko Ndolonan o mga Tao, Palaya dn aya a Sabap anan na Kapakasiig, so Kapakasiig na Sifat a Marata, aya a Wajib ko Moslim na kapananggilaan iyan, Igira a adn a Minikdi ko Poso iyan a Maito bo a Kasiig na Lindong skaniyan ko Allah, ago rna niyan a Ginawa niyan, di niyan Pnggolawlaa so Kasiig, ka so Makasiig na Pshorangn iyan so Allah ko Mapapasad a Okoran o Manosiya. •Oriyan iyan na so Kapakasiig na dadn a Khapapakaydanon a rowar sa Kapthotonga niyan sa Ginawa niyan, a Mbonoon skaniyan o Kasiig, ago Phakarondan skaniyan sabap sa apiya antonaa i sowaan iyan na di niyan kharn so Limo o Allah ko Oripn iyan, a skaniyan na Makangnangna dn sa Mapapas ko salakaw ron so Limo o Allah. •Aya a Lawan anan a tanto a Mitataralo na so mga Amal iyan a mga Pipiya na Pthotongn o Siig iyan ko pdiyan, sa Lagid o Kapthotonga o Apoy ko Itagon, sa Lagid angkai a Miyaaloy tano a Hadith, sabap ko Kasasangkaa niyan ko Miyapasad a Okoran. •Pananggilaan tano so Kasiig ago Kadngki, ka da a Khakowa tano ron a Rowar sa Sakit ago siksa ko Masa a Kaphangokom, Lomindong tano ko Allah ko Karataan o Kasiig, Phangnin tano ko Allah a Malimpiyo so mga Poso tano ko Kasiig, ago Awatn tano niyanon. والله أعلم! وصلى الله وسلم على حبيبنا محمد!.

•Aya a Thito a Mabagr na so Tao a Pkharn iyan a Ginawa niyan ko Rarangit!•

•Aya a Thito a Mabagr na so Tao a Pkharn iyan a Ginawa niyan ko Rarangit!• عَنْ أَبِيْ هُرَيْرَةَ -رَضِيَ اللهُ عَنْهُ- قَالَ: قَالَ رسُولُ اللهِ -ﷺ-: "لَيسَ الشَّدِيْدُ بِالصُّرْعَةِ, إِنَّمَا الشَّدِيْدُ الَّذِيْ يَمْلِكُ نَفْسَهُ عِنْدَ الْغَضَبِ” [مُتَّفَقٌ عَلَيْهِ]. Miyakapoon a Thotol ko Abo Horairah (R.A.) a Pitharo iyan: Pitharo o Rasolollah (S.A.W.): "Kna oba Mabagr so Mapasang i Kapakiploday, Aya a Thito a Mabagr na so Pkharn iyan a Ginawa niyan ko Rarangit" [Piyagayonan i Bokhari go si Moslim]. OSAYAN: •Pd sa mga Rarata a Paparangayan so Rarangit, so Rarangit na Tabiat anan o Manosiya a Pnggmaw ron Igira a Miyaadn so mga Sabap iyan, a aya dn a Kabaya iyan na Mitana iyan ko Pkhararangitan iyan, na so Kharn iyan a Ginawa niyan ko Kithanaan iyanon ko Pkhararangitan iyan na giyoto i Thito a Mabagr, "Kna oba Mabagr so Mapasang i Kapakiploday", a Iploday niyan ko mga Tao so Bagr o Lawas iyan, Ogaid na aya a Thito a Mabagr na so Pkharn iyan a Ginawa niyan ko Rarangit, a Di niyan Mipnggolalan so Rarangit iyan. •So Rarangit na Dowa Soson: ❶Opama ka so Rarangit na para ko Allah, na Rarangit anan a Mapiya, a Giyoto so Ikhararangit iyan so Kasogoka ko mga Lalangan o Allah, so Nabi (S.A.W.) na Ipkhararangit iyan so Kapkhasogoka ko mga Lalangan o Allah. ❷Rarangit a aya a Sabap iyan na Babaya ko Kitanaanon ko mga Tao Igira a adn a Miyakanggolawlaon sa Marata, Piyakay o Allah ko Pnggolawla ko Tao sa Marata a Kikitasnon, Pitharo o Allaho Taala: ﴿وَجَزَاءُ سَيِّئَةٍ سَيِّئَةٌ مِّثْلُهَا...﴾ [الشورى: 40]. {Na aya Balas o Marata na Marata a Lagid iyan…} [As Shora: 40]. Ogaid na Pkhababayaan o Allah so Kabgay a Maap, a Giyoto so Karna o Manosiya ko Gani niyan a Maapan iyan so Pkhararangitan iyan, Pitharo o Allaho Taala: ﴿...فَمَنْ عَفَا وَأَصْلَحَ فَأَجْرُهُ عَلَى اللَّهِ...﴾ [الشورى: 40]. {…Na sa Tao a Mmaap go Makiphasada (ko Ridoay niyan), na so Balas rkaniyan na Miyatangkd ko Allah…} [As Shora: 40]. Ago Pitharo pn o Allaho Taala: ﴿وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ۞وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ۞وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ إِنَّهُ هُوَ السَّمِيعُ الْعَلِيمُ﴾ [فصلت: 34-36]. {Na di Makaphagishan so Mapiya ago so Marata, Rnn ka (ko Marata) so Mapiya, Na Samawto na so adn a rido okaon na lagid oba Mataan a skaniyan na Ginawai a Madasg(34)Na da a Khabgan saya a rowar ko siran a Miphapantang, go da a Khabgan saya a rowar ko Khirk ko Ontong a Mala(35)Na amay ka Maphakasilay ka o Pangonsi a phoon ko Shaitan, na Lindong ka ko Allah, Mataan aya a Skaniyan so Pphakan'g, a Matao} [Fossilat: 34-36]. Igira a Kiyararangitan o Manosiya so isa a Tao a Knaba sabap ko Kiyasogoka ko Lalangan o Allah na aya a Patot rkaniyan na M`gay a Maap, ago Rna niyan a Ginawa niyan oba niyanon Mitana so Rarangit iyan, ka so Allah a Soti na aya a Katharo iyan: ﴿...وَالْكَاظِمِينَ الْغَيْظَ وَالْعَافِينَ عَنِ النَّاسِ...﴾ [آل عمران:134]. {…Go Itataknl iran a Ginawa iran ko Gani, go mga Nanapi ko mga Manosiya…} [Ali Imran: 134]. Giyanan i Bantogan o mga Papasang i Kanapi ko Salakaw, a Pkharn iran so mga Gani iran goso mga Rarangit iran. •Sabnar a adn a Miyanga Aaloy a Bolong sa Rarangit, na Pdon angkai a Pagalowin tano: ❶So Kalindong ko Allah ko Karataan o Shaitan, Giyoto so Katharowa ko: (A`odhobillahi Minas Shaitanir Rajim), Pitharo Allaho Taala: ﴿وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّهِ...﴾ [فصلت: 36]. {Na Amay ka Maphakasilay ka o Pangonsi a phoon ko Shaitan na Lindong ka ko Allah…} [Fossilat: 36]. ﴿...فَاسْتَعِذْ بِاللَّهِ مِنَ الشَّيْطَانِ الرَّجِيمِ﴾ [النحل: 98]. {…Na Lindong ka ko Allah phoon ko Shaitan a Phradiyamn} [An Nahl: 98]. Miyakaisa a adn a Miyaka Phawala ko Kapakamamasa o Nabi (S.A.W.) a Pkhailay niyan siran, na Kiyatantowan so Isa kiran sa taman sa Miririga a Bontal iyan, na Pitharo Nabi (S.A.W.): " إنِّي لَأَعْلَمُ كَلِمَةً لَوْ قَالَهَا لَذَهَبَ عَنْهُ مَا يَجِدُ: أَعُوذُ بِاللَّهِ مِنَ الشَّيْطَانِ الرَّجِيْمِ" "Mataan a adn a Katawan akn a Katharo a o Tharowa o Tao na Maphakada iyan so Matatagoon (a Rarangit): so Katharowa ko: A`odhobillahi Minas Shaitanir Rajim". ❷Igira a Kiyararangitan ka na Pagabdas ka odi na Phaigo ka, Kagiya a so Rarangit na phoon ko Shaitan, na so Shaitan na Inadn a phoon sa Apoy a Mayaw, na so Apoy na aya a Phakapadngon na Ig, na Igira a Kiyararangitan so Tao na Phaigo odi na Pagabdas sa Ig. ❸Opama ka so Pkhararangitan na Tomitindg na Ontod, na Opama ka Moontod na Iga, taman sa Mada so Rarangit iyan. •So Nabi (S.A.W.) Biyantog iyan sangkai a Hadith so Tao a Pkharn iyan a Ginawa niyan ko Rarangit, ago aya Lbi a Mabagr. والله أعلم! وصلى الله وسلم على حبيبنا محمد!.

●So Kapananggilai ko Kapligto!●

●So Kapananggilai ko Kapligto!● عَنْ جَابِرٍ -رَضِيَ اللهُ عَنْهُ- قَالَ: قَالَ رَسُولُ اللَّهِ -ﷺ-: "اتَّقُوا الظُّلْمَ، فَإِنَّ الظُّلْمَ ظُلُمَاتٌ يَوْمَ الْقِيَامَةِ، وَاتَّقُوا الشُّحَّ فَإِنَّهُ أَهْلَكَ مَنْ كَانَ قَبْلَكُمْ" [أَخْرَجَهُ مُسْلِمٌ]. Miyakapoon a Thotol ko Jabir (R.A.) a Pitharo iyan: Pitharo o Rasolollah (S.A.W.): "Pananggilai niyo so Kaplalalim, ka Mataan a so Kaplalalim na Malibotng sa Alongan a Mawri, ago Pananggilai niyo so Kapligto, ka Mataan a so Kapligto i Miyakabinasa ko Miyaonaan iyo" [Piyakaliyo i Moslim]. OSAYAN: ●Aya a sisii sangkai a Hadith na so Kisasaparn ko Dowa sa Sipat a pd ko mga Sipat a Marata a Paparangayan: ❶So Kaplalalim, Miyaosay tano anan ko Miyaona a Inipost tano. ❷So Kaligt, " Pananggilai niyo so Kapligt", Pitharo o Allaho Taala: ﴿...وَمَن يُوقَ شُحَّ نَفْسِهِ فَأُولَـٰئِكَ هُمُ الْمُفْلِحُونَ﴾ [الحشر: 9] {…Na sa Tao a Ipilak iyan so Kaligt o Ginawa niyan, na siran man na siran i Phamakaslang sa Maliwanag} [Al Hashr: 9] Sii sangkai a Surah Al Hashr na Inaloy ron o Allah so Ropaan o mga Ansar (R.A.), Pitharo o Allaho Taala: ﴿وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ وَمَن يُوقَ شُحَّ نَفْسِهِ فَأُولَـٰئِكَ هُمُ الْمُفْلِحُونَ﴾ [الحشر: 9] {Go so Khitatakna ko Ingd, go so Paratiyaya a Miyaonaan iran na Pkhababayaan iran so Miyamagoyag kiran, go da a Khatoon iran ko mga Rarb iran a Siig phoon ko Inipamgay kiran, go Inilawan iran ko mga Ginawa iran, apiya pn adn a Shisii kiran a Kamiskin. Na sa Tao a Ipilak iyan so Kaligt o Ginawa niyan, na siran man na siran i Phamakaslang sa Maliwanag} [Al Hashr: 9] Aya a Miyaaloy ko pd Ayat na: ﴿...وَأَنفِقُوا خَيْرًا لِّأَنفُسِكُمْ وَمَن يُوقَ شُحَّ نَفْسِهِ فَأُولَـٰئِكَ هُمُ الْمُفْلِحُونَ﴾ [التغابن: 16] {…Go Pphammgay kano sa Mapiya a rk o mga Ginawa niyo, Na sa Tao a Ipilak iyan so Kaligt o Ginawa niyan, na siran man na siran i Phamakadaag} [At Taghabon: 16]. ●So Kaligt na Sipat ago Paparangayan a Marata, So Kaligt na Isapn anan a Kiyasabapan sa Kiyapakaprirdowai o mga Tao, a Pmbonoon o sabaad so sabaad, So Nabi (S.A.W.) na Piyakipananggilaan iyan so Kaligt, na Kinanglan ko Manosiya a Kapananggilaan iyan, na o adn a Pkhagdam o Tao a Kaligt na Pangni ko Allah sa Kalompiyowa niyan ko Poso iyan ko Kaligt. ●Aya a Batd o Abdur Rahman Ibn Awf (R.A.) na Mintin ko gii niyan Kathawaf sa Baytollah, ago kaphagokof iyan sa Arafah a gii niyan Katharowa ko: اللَّهُمَّ قِنِي شُحَّ نَفْسِي Ya Allah na Lidasn akongka ko Kaligt o Ginawa ko. Gii niyan anan Khakasokasowin ko Pangni niyan, na Pamangni ka ko Allah sa Kada o Kaligt ko Ginawangka ka andadn i Kapakalidas ka ko Kaligt na Miyakalidas ka ko Kaplalalim ago so Kapakithotolaka, sabap ko Katharo o Allaho Taala: ﴿...وَمَن يُوقَ شُحَّ نَفْسِهِ فَأُولَـٰئِكَ هُمُ الْمُفْلِحُونَ﴾ [الحشر: 9] {…Na sa Tao a Ipilak iyan so Kaligt o Ginawa niyan, na siran man na siran i Phamakaslang sa Maliwanag} [Al Hashr: 9] Andadn i Kada o Kaligt rktano na Miyada so Kaplalalim, ago so Kapriridowai, ago so Kathototlaka, sabap sa o Mada ko Tao so Kaligt na Phakasowa Sidqah, Phakasowa M`gay sa Zakah, Pphiyapiyaan iyan so mga Tao, na amay pman ka Matagoon so Kaligt na Phakadalm a Tngo iyan, apiya giya a Ginawa niyan na Pkhoripotan iyan, na Plalimn iyan so Tamok o mga Tao. والله أعلم! وصلى الله وسلم على حبيبنا محمد!.

So Kabnar o Muslim ko Lagid iyan a Muslim:

So Kabnar o Muslim ko Lagid iyan a Muslim: عن أبي هريرة رضي الله عنه قال: قال رسول الله صلى الله عليه وسلم: "حَقُّ الْمُسْلِمِ عَلَى الْمُسْلِمِ سِتٌّ: إِذَا لَقِيتَهُ فَسَلِّمْ عَلَيْهِ، وَإِذَا دَعَاكَ فَأَجِبْهُ، وَإِذَا اسْتَنْصَحَكَ فَانْصَحْ لَهُ، وَإِذَا عَطَسَ فَحَمِدَ اللَّهَ فَشَمِّتْهُ، وَإِذَا مَرِضَ فَعُدْهُ، وَإِذَا مَاتَ فَاتْبَعْهُ" رَوَاهُ مسلم. Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Aya a Kabnar o Muslim ko Lagid iyan a Muslim na Nm: Igira a Miyabalak ka skaniyan na Salamangka, go Igira a Inimbitar ka niyan na Tarima angka (So Imbitar iyan), go Igira a Miyangni rka sa Thoma na Thomaingka, go Igira a Miyakambaan a Podiin iyan so Allah na Tharoangkawn so: (Yarhamokallah), go Igira a Miyasakit na Bntln ka, go Igira a Miyawafat na Dologn ka ko (Kobor iyan)" Piyanothol i Muslim. Giyangkai a Hadith na Rayaganai o Kabnar o Muslim ko Lagid iyan a Muslim. So mga Muslim na adn a Kabnar o Sabaad kiran ko Sabaad ko Kukoman o Islam. Pitharo o Allahu Taala: (إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ وَاتَّقُوا اللَّهَ لَعَلَّكُمْ تُرْحَمُونَ) الحجرات: 10. (So Miyamaratiyaya na ayabo Magariari, Na Tanora niyo so mga Pagari niyo, go Kalkn iyo so Allah, Ka angkano Mipangalimo) Al-Hujurat: 10. Piyakisabotan angkanan a Ayat a Kababaloy o mga Muslim a Magariari siran ko Agama a Islam. So Kababaloy iran a Magariari ko Islam na Mas Lbi adiso Kaphapagariya ko Bangsa. Misabap san na So Muslim na adn a mga Kabnar iyan ko Lagid iyan a Muslim a Miyaaloy o Nabi (S.A.W.) na pdon Angkai a Nm Timan a Miyaaloy sangkai a Hadith: 1. (Igira a Miyabalak ka skaniyan na Salamangka): So Kasalam na pd anan ko mga Kabnar o mga Muslim ko Sabaad kiran ko Sabaad, Kagiya an da a Khaadn ko mga lt iran a Kapriridoay, Kanddngkiya, Kathitipowa goso Salakaw san a pd sa Pkhibodiyok o Shaitan ko mga Lt iran. Wajib ko Muslim a Kasalama niyan ko Pagari niyan a Muslim upama ko Mitholaka siran. Na aya a Lbi kiran a Mapiya na sadn sa Maona Somalam. Salamangka skaniyan apiya pn adn a da niyo Kasinabotai, ka Mapphakada iyan so Kadngki ko Ltiyo, go Mapphamola niyan ko Puso iyo so Kambbgaya sa Gagaw. 2. (Igira a Inimbitar ka niyan na Tarimaangka so Imbitar iyan rka): Upama ko Imbitarngka o Pagaringka a Muslim ko Kandori iyan na Tarimaangka, odi na o Imbitaraka niyan ko Nganin san a da Pakarataa o Islam na Tarimaangka. Upama ka aya a Iimbitar iyan rka na Kandori sa Kapangaroma na Wajib a Katarimaangkawn, na so Salakaw ron na Sunnah. 3. (Igira a Miyakipangthoma rka na Thomaingka): Upama ka Maki Mosawir rka ko mga Btad, Lagid ko Kandadarodopa, Kaplayalayag, Kandagang, na Tharowangkawn so Katawan ka a Mapiya a Thoma, Dingkawn Phagmaa so Mapiya a Thomangkawn, Dingka skaniyan Pagakala odi na Limpanga a aya a Mimosawir kawn na so Phakabinasawn. Pitharo o Nabi (S.A.W.): الدين النصيحة، قلنا: لمن يا رسول الله؟ قال: لله ولكتابه ولرسوله ولأئمة المسلمين وعامتهم. So Agama na Thoma, Ptharo ami: Antai Kirkon Ya Rasulallah? Pitharo iyan: Rk o Allah, goso Kitab iyan, goso Sugo iyan, goso Ulowan o mga Muslim, goso Kalangowan iran. 4. (Igira a Miyakambaan na Podiin iyan so Allah na Tharowangkawn so: (Yarhamokallah): So Kapakambaan na Limo anan a Poon ko Allah; Kagiya a Giyanan i Phakarn ko Paniyakit a Pphakapoon ko Ngirong o Manosiya, Lagid o Abog nagoso Salakaw ron. Na Pkharn anan Sabap ko Kapphakambaan o Manosiya. 5. (Igira a Miyasakit na Bntln ka): Upama ka Masakit skaniyan na Kinanglan a Mibntl ka skaniyan ka so Kibntln kawn na Pphakalowag rkaniyan Sabap sa Pphakapiya a Ginawa niyan. Makawma kawn na Salamangka, Aya a Phanotholn kawn na so Iphakapiya a Ginawa niyan a Thotol ka Mapphakakhap iyan so Maggdam iyan. 6. (Amay ko Mawafat skaniyan na Dologn ka (ko Kobor iyan): So Kidologn ko Miyawafat goso Kindowaanon goso Kapakadarpa ko Pbnganon na pd anan sa Kabnar o Muslim. Giyai i mga Btad a kinanglan ko Muslim a Manggalbk iyan. Giyangkai a Haditha na Makanggogonanao sa Kababaloy o Miyamaratiyaya a Magariari. والله أعلم! وصلى الله على محمد

Kowaka sii sa Ndao!

Kowaka sii sa Ndao! قَالَ الحَسَنُ البَصْرِيُّ رَحِمَهُ الله: "العَامِلُ عَلَى غَيْرِ عِلْمٍ كَالسَّالِكِ عَلَى غَيْرِ طَرِيقٍ، والعَامِلُ عَلَى غَيْرِ عِلْمٍ يُفْسِدُ أَكْثَرُ مِمَّا يُصْلِحُ، فَاطْلُبُوا العِلْمَ لا تَضُرُّوا بِالعِبَادَةِ واطْلُبُوا العِبَادَةَ طَلَباً لا تَضُرُّوا بِالعِلْمِ فَإِنَّ قَوْمَاً طَلَبُوا العِبَادَةَ وَتَرَكُوا العِلْمَ حَتَّى خَرَجُوا بِأَسْيَافِهِمْ عَلَى أُمَّةِ مُحَمَّدٍ صَلَّى الله عَلَيْهِ وَسَلَّمَ وَلَوْ طَلَبُوا العِلْمَ لَمْ يَدُلَّهَمْ عَلَى مَا فَعَلُوا". Pitharo i Al Hasan Al Basharie -Rahimahullah-: So gii Nggalbk a da a Ilmo iyan na Lagid o Plalakaw a da a Lalan iyan, goso gii Nggalbk a da a Ilmo iyan na Mala a Kaphakabinasa niyan adi so Kaphakaompiya niyan, Na Thontota niyo so Ilmo na di niyo Mbinasai so Simba, go Thontota niyo so Simba sa Kathontot a di niyo Kabinasaan so Ilmo, ka Mataan! A adn a Pagtao a Pithontot iran so Simba na Inibagak iran so Ilmo taman sa Iniliyo iran so mga Pdang iran a (Imbono iran) ko mga Ommat o Muhammad (S.A.W.) ka o Pithontot iran so Ilmo na di niyan siran Matonda ko Pinggolawla iran. Isa ini a Kasasabapan sa Kabibinasa a Masa tanowai a Kharawan o Sabaad a Katdaka niyan ko Rugo o Pagari niyan a Muslim, a ayadn a Kapkhailaya o sabaad ko sabaad na Kafeer a Miyapatot a Kabonowaon, Soti so Allah! Tanto ini a Mala a Fitnah a Misosogat rktanowai. Mndod tano ko Ilmo ko Qur-an goso Sunnah ko Saboton o mga Salaf sa Mokit sa Kasombak sa Ilmo ko mga Ulama. Isapar tano so Bid'ah a Galbk na Pakaonotn tano ron pn a Isapar tano so Bid'ah a Katharo.