Aya a Wajib ko Moslim na so Kaphorongi niyan ko Agama niyan!

Aya a Wajib ko Moslim na so Kaphorongi niyan ko Agama niyan! عَنْ ابْنِ عُمَرَ -رَضِيَ اللهُ عَنْهُ- قَالَ: قَالَ رَسُولُ اللَّهِ -ﷺ-: "مَنْ تَشَبَّهَ بِقَوْمٍ فَهُوَ مِنْهُمْ" أَخْرَجَهُ أَبُوْ دَاوْدَ, وَصَحَّحَهُ ابْنُ حَبَّانِ. Miyakapoon a Thotol ko Ibn Omar (R.A.) a Pitharo iyan: Pitharo o Rasolollah (S.A.W.): "Sadn sa Tao a Pananayanan iyan so Pagtao na pd kiran" Piyakaliyo i Abo Dawd, ago Piyaka Shahih i Ibn Habban. OSAYAN: So Kapananayani ko Pagtao ko mga Galbk iran na gii Nggolalan ko gii Kanggalbka ko Lagid o Galbk iran, odi na so gii Kapropaana ko Lagid o Ropaan iran, odi na so gii Katharowa ko Lagid o Katharo iran. Aya a Kapananayan na so Kaphagiringi ko mga Katharo iran goso mga Galbk iran ago so mga Ropaan iran, Na aya a Patot ko mga Moslim na Kaphorongan iran so Agama iran, ago so Okit o mga Kokoman a Phakanggay a Gona, ago so mga Sogowan a Inisogo kiran a Kapapadalman sa Mapiya, ago Phananggilaan iran so mga Insapar a Phakabinasa kiran, ago so Kibidaan iran ko mga Ginawa iran ko Salakaw kiran a mga Tao, Kagiya a so Allah na Inibagr iyan kiran so Islam, Pitharo o Allahu Taala: ﴿وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ﴾ آل عمران: 139. {Na di kano Khalobayi, go di kano Pmboko, Ka skano i Maporo o skano na Khipaparatiyaya} Ali Imran: 139. So Paratiyaya na Pkhabaloy niyan so Tao a Maporo san ko Salakaw ron sii ko mga Sipat a mga Pipiya, Pitharo o Nabi (S.A.W.): "الإسلام يعلو ولا يعلى عليه" "So Islam na Maporo a da a Phakaombaw ron", So Moslim na Bigan o Allah sa Kakhibida iyan ko Salakaw rkaniyan, na Andamanaya i Kimbabaan o Tao sa Ginawa niyan ko da a Pakaid iyan?. So Kiyatharowa o Nabi (S.A.W.) sa: "Sadn sa Tao a Pananayanan iyan so Pagtao" na Rangkom anan, Mararangkom iyan so Kapananayani ko mga Kafir ago so mga Songklid (Fasiq) ago so mga Tao a mga Baradosa, Inisapar sangkai a Hadith so Kapananayani kiran, Inisapar ko Moslim so Kapananayani niyan ko isa sangkanan a Tlo a Miyaaloy tano, Aya a Patot rkaniyan na Maawat iyan so Okit iyan ago so Paparangayan iyan, ago so Islam ko Kapphananayani ko mga Kafir, odi na so mga Songklid (Fasiq), odi na so mga Baradosa, ka Opama ka Pananayanan iyan siran na sabnar a Inibaba iyan a Ginawa niyan ko Oriyan o Kiyabaloy niyan a Miphapantao niyan so Islam. So Kapananayan na Makanggogonanao sa Babaya ko Pphananayanan, ka Opama ko di niyan Pkhababayai so Pphananayanan iyan na di niyan dn Pananayanan, Sabnar a Miyaaloy ko mga pd a Hadith so Kisasaparn ko Kapananayani ko mga Yahodi ago mga Christian, ago Miyaaloy pn sa Hadith a Kisasaparn ko Kapananayani ko mga Pananakoto (mga Moshrik), ago Miyaaloy pn sa Hadith so Kisasaparn ko Kapananayani ko Pphamanimba sa Apoy (mga Majosi), ago so Apiya antonaa a Gropo a pd ko mga Gropo o mga Kafir, ka so Moslim na Mawatanon oba niyan Pphananayani so mga Gropo a Miyanga Lologi. Pitharo o Omar Ibn Al Khattab (R.A.): (إنا كنا أذل قوم فأعزنا الله بالإسلام, فمهما نطلب العزة بغير ما أعزنا الله به أذلنا الله) (Mataan a skami na aya a Btad ami na Lbi a Malobay ko Pagtao na Inibagr rkami o Allah so Islam, Ba pirapira i Kiyambabanoga ami ko Bagr ko Salakaw ko Allah na da kami niyan Pakabagra ka Piyakadapanas kami niyan) ﴿وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَـٰكِنَّ الْمُنَافِقِينَ لَا يَعْلَمُونَ﴾ المنافقون: 8. {Na rk o Allah so Bagr go rk o Sogo iyan, go rk o Miyamaratiyaya, na ogaid na so mga Monafiq na di iran Katawan} Al Monafiqoon: 8. Aya a sisii sangkai a Hadith a Inaloy tano na Isasapar so Kapananayani ko salakaw ko mga Moslim, kagiya a Pkhasabapan anan sa Kapkhitariyosod o Mapiya ko Marata, Sabnar a Minitpng ko mga Moslim so Kapananayani ko mga Kafir, (a giyoto so Kapananayani ko Simba iran goso Agama iran) na Miyanggalbk iran sa Lagid o Kiyanggalbkawn o mga Kafir Lagid o mga Bid`ah a Pimbabago, Kagiya a Mbabagon o mga Kafir so Kaslaslaa ko mga Birth Day odi na Mawlid (Lagid o Mawlid An Nabi) na Piyananayanan iran mambo, Giyanan i Btad o mga Moshrik ago so mga Yahodi ago so mga Christian, Kagiya a Nggolawlaan iran so gii Kambabalayi ko mga Kobor na Piyananayanan siranon mambo o sabaad ko mga Moslim a Mimbabalay siran mambo ko mga Kobor, a badi so Kambalayi ko mga Kobor na pd ko Adat o mga Yahodi ago mga Christian. Pitharo o Nabi (S.A.W.): "أُولَئِكَ قَوْمٌ إِذَا مَاتَ فِيهِمُ الْعَبْدُ الصَّالِحُ بَنَوْا عَلَى قَبْرِهِ مَسْجِدًا، وَصَوَّرُوا فِيهَا تِلْكَ الصُّوَرَ، أُولَئِكَ شِرَارُ الْخَلْقِ عِنْدَاللهِ" "Siran oto so Pagtaw a Igira a adn a Miyawafat kiran a Oripn a Salih na gii ran Mbalayan so Kobor iyan sa Masjid, na Iptholad iranon a giyoto a mga Toladan iran, na Siran man i Miyakaratarata a Kaadn sii ko Allah" Na kagiya a pd sa Adat iran a gii ran Mbabalayan so Kobor o mga Tao a Kisslaan iran na Piyananayanan siranon mambo o Sabaad ko mga Moslim, sktano na Isasapar rktano so Kapananayani ko mga Kafir ko Agama iran, na goso mga Simba iran a Mappnto kiran. Sii pman ko Shayi a aya a Pakaasal iyan na Mobah na knaba oto pd sa Kapananayan, Lagid o Kambaal sa Sinapang, mga Nditarn a di Makasosopak ko Islam. Knaba anan Makasosold ko Kapananayan ka pd anan ko Khapakay (Mobah). Pd pn sa Kapananayan kiran so Kaopawa ko Sompa ago so Kapakatasa ko Bigoti, Kagiya aya a Btad o mga Moshrik goso mga Yahodi goso mga Christian na Pkikisn iranon so Sompa iran na Lalambaan iranon so Bigoti iran, na Haram anan a pd sa Kapananayan kiran, Miyaaloy sa Hadith a Pitharo o Nabi (S.A.W.): " خَالِفُوا الْمُشْرِكِينَ أَحْفُوا الشَّوَارِبَ، وَأَوْفُوا اللِّحَى " "Soranga niyo so mga Moshrik, Kowaa niyo ron so mga Bigoti, na Pakatasa niyo so mga Sompa", So Kakikisa ko Sompa ago so Kapakatasa ko Bigoti na pd anan sa Adat iran a mga Rarata a di Khapakay a Nggolawlaan. So Kapananayan na Igira na Pkhaolog sa Haram, Igiran na Makroh, So Kapphananayani kiran ko mga Bid`ah, goso Birth Day odi na Mawlid goso Salakaw san, odi na so Kambalayi ko mga Kobor na Kapananayan anan a Haram, sa Lagid o Kiyaosayawn i Shiekhol Islam Ibno Taymiyyah -Ikalimo skaniyan o Allah- ko Kitab a: إقتضاء الصراط المستقيم لمخالفة أصحاب الجحيم Goso salakaw san a mga Kitab ago mga Sorat a Piyakipananggilaan iyan so Kapananayani ko mga Kafir batagolabaw ron so mga Yahodi goso mga Christian. Sadn sa Nggolawla sangkai a Miyanggaaloy tano na Sabnar a Miyakasogok sa Haram, ago Miyatangkd iyan sa Ginawa niyan a Mataan a skaniyan na pd kiran, Kagiya a siran i Prawatn iyan, Ugaid na aya a Minos na Miyakanggolawla sa Haram, sa Lagid o Kiyaosayawn i Shiekho Islam Ibno Taymiyyah -Ikalimo skaniyan o Allah-. Giyangkai a Hadith i Pakaasal a Mala ko gii Kaphorongi o Moslim ko Agama niyan goso gii niyanon Kakphiti, ago aya a sisii sangkai a Hadith na so Kapananggilai ko Kapananayani ko mga Kafir. والله أعلم! وصلى الله وسلم على حبيبنا محمد!.