So Kahaharam o Katalikodi ko Miyamaratiyaya!

So Kahaharam o Katalikodi ko Miyamaratiyaya! ﻋﻦ ﺃﺑﻲ ﺃﻳﻮﺏ -ﺭﺿﻲ ﺍﻟﻠﻪ ﻋﻨﻪ- ﻗﺎﻝ: ﻗﺎﻝ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ" :ﻻ ﻳﺤﻞ ﻟﻤﺴﻠﻢ ﺃﻥ ﻳﻬﺠﺮ ﺃﺧﺎﻩ ﻓﻮﻕ ﺛﻠﺎﺙ ﻟﻴﺎﻝ، ﻳﻠﺘﻘﻴﺎﻥ ﻓﻴﻌﺮﺽ ﻫﺬﺍ ﻭﻳﻌﺮﺽ ﻫﺬﺍ، ﻭﺧﻴﺮﻫﻤﺎ ﺍﻟﺬﻱ ﻳﺒﺪﺃ ﺑﺎﻟﺴﻼﻡ" ﻣﺘﻔﻖ ﻋﻠﻴﻪ . Miyakapoon a Thotol ko Abu Ayyob (R.A.) a Pitharo iyan: Pitharo o Nabi (S.A.W.): "Di Khapakay ko Muslim oba niyan Talikodi so Pagari niyan (a Muslim) sa Kalawanan so Tlo ka Kagagawii, gii siran Makathoona na Pthalikod si Ngkai, na Pthalikod mambo si Ngkai, Na aya a Pinakamapiya kiran na so Phangona Sumalam" Piyagayonan i Bukhari go si Muslim. OSAYAN: Aya a Wajib ko Miyamaratiyaya na Mabaloy siran a Magariari ko Paratiyaya, Pitharo o Allahu Taala: { ﺇﻧﻤﺎ ﺍﻟﻤﺆﻣﻨﻮﻥ ﺇﺧﻮﺓ{ ﺍﻟﺤﺠﺮﺍﺕ10 : .. {So Miyamaratiyaya na aya bo Miyagariari} Al Hujurat: 10. So Miyamaratiyaya na Magariari siran ko Paratiyaya, a Giyoto i Mabagr a Kaphapagariya adi so Kaphapagariya ko Bangsa, Kagiya a da a Khaadn ko Dowa a Miphagariya ko Paratiyaya a Katholaka, sa Lagid o Kiya Osaya tano ko Katholaka ko Miyaona a Ini Post tano. "Di Khapakay ko Muslim oba niyan Talikodi so Pagari niyan (a Muslim) sa Kalawanan so Tlo ka Kagagawii, gii siran Makathoona na Pthalikod si Ngkai, na Pthalikod mambo si Ngkai, Na aya a Pinakamapiya kiran na so Phangona Sumalam" Aya a sisii sangkai a Hadith na Haram so Katalikodi ko Miyamaratiyaya Igira man oto a aya a Sabap iyan na Makapantag ko Doniya; Kagiya a so mga Tao na Sabnar a adn a Pkhaadn kiran a Rathm ago Simokt ko Makapantag ko Doniya, na di roo Kinanglan so Katalikodi o Isa ko Pdiyan sa Mipantag ko Doniya, Ka Waraan dn a sisii tano ko Kamamanosiyai a di Phakatarotop. Igira na Pphakataasar ko Ginawa so Kapkharibat o Pagariya, odi na so Karata iyan i Parangay ko Pdiyan, na Khapakay roo a Talikodan iyan Ugaid na Kinanglan a di Kalawanan so Tlo Gawii. Aya a Kiyapakaya roo na Adn Mada a Giyoto a Miyakataasar ko Ginawa niyan a Rata a Ginawa ko Pagari niyan. Giyoto a Inibgay ron a Lawdaparo a 3days a Kathalikodi niyan ko Pagari niyan na Iphonas oto ko Rata a Ginawa niyan ko Pagari niyan a Minikdi ko Puso iyan, Ugaid na Upama pman ka Khagaga a Dingka skaniyan Katalikodan na giyoto i Lbi rka a Mapiya. "Gii siran Makathoona" Giyoto so Dowa a Mithalikoda, "Na Pthalikod si Ngkai, na Pthalikod mambo si Ngkai" Giyai i di Khapakay, "Na aya a Pinakamapiya kiran na so Phangona Sumalam" Pinggonanao tano Angkai a Hadith ko Kipangorawn ko Salam ka an Mada so Rata a Ginawa niyo ago so gii Tano Kathalikoda. Upama ka Shalama siran na Mapphakada iyan so Makatataasar ko Puso o Omani isa a Rata a Ginawa ko pdiyan. Na Lagid anan mambo so Dowa a Mitholaka a O Shalama siran na Khada so Kiyapakatholaka iran. Na sa Maona Sumalam na Aya Miyakakowa sa Lbi a Mapiya. Pd anan sa Nanao sa Kapakallbi o Salam, Kagiya a Mapphakada iyan so Matatago ko Puso a Di Mapiya, Ago Karina oto ko Kakhakababayai. Upama pman ko Aya a Kiyasabapan ko Katholaka odi na Kathalikoda na Pantag ko Agama, na Khapakay roo so Kalawanan so Tlo Gawii, Dipindi ko Taks a Kignkn o Tiyalikodan ko Dosa a Pinggalbk iyan. So Nabi (S.A.W.) na Tiyalikodan iyan so siran oto a Miyamakasopak Sa Miyaka Limapolo Gawii (50days) taman sa da siran Thawbat, na Piyaka Tawbat siran o Allah, na Inimbitiyarai siran o Nabi (S.A.W.) na Siyalam iyan siran. THANODAN: So Katalikodi ko Tao na Upama ka Mipantag ko Kambaradosa na Khapakay a Kalawanan so Tlo Gawii sa Taman s di Thawbat ko Kambaradosa, na Upama ka Thawbat na Kinanglan a Mimbitiyarai ngka ka Miyada so Sabap sa Kiyatalikodingkawn. ﻭﺍﻟﻠﻪ ﺃﻋﻠﻢ! ﻭﺻﻠﻰ ﺍﻟﻠﻪ ﻭﺳﻠﻢ ﻋﻠﻰ ﻣﺤﻤﺪ !.