Nm a mga Sifat a Inisapar o Nabi (S.A.W.)!

Nm a mga Sifat a Inisapar o Nabi (S.A.W.)! عَنِ الْمُغِيْرَةِ بْنِ شُعْبَةَ -رَضِيَ اللَّهُ عَنْهُ- أَنَّ رَسُوْلَ اللَّهِ -صَلَّى اللَّهُ عَلَيْهِ وَسَلَّمَ- قَالَ: "إنَّ اللَّهَ حَرَّمَ عَلَيْكُمْ عُقُوقَ الْأُمَّهَاتِ، وَوَأْدَ الْبَنَاتِ، وَمَنَعَ وَهَاتِ، وَكَرِهَ لَكُمْ قِيلَ وَقَالَ، وَكَثْرَةَ السُّؤَالِ، وَإِضَاعَةَ الْمَالِ" مُتَّفَقٌ عليهِ. Miyakapoon a Thotol ko Al Mugirah In Shu'bah (R.A.) a Mataan! A so Rasulullah (S.A.W.) na Pitharo iyan: "Mataan! A so Allaj na Hiyaram iyan rkano so Kaphagatowi ko mga Ina, goso Kiplbngn ko mga Wata a Babae (a Oyagoyag), goso Karna (ko Miyapatot rka) goso kambabanoga ko Tamok sa Apiya antuna Okit, go Inikararangit iyan rkano so gii Katharowa (ko Langowan a Pkhan'g), goso Kadakl a Kapakaiza, goso Kailanga ko Tamok" Piyagayonan i Bukhari go si Muslim. OSAYAN: Miyaaloy sangkai a Hadith so Nm a mga Shayi a Haram so gii ron kanggalbka: 1.So Kaatowi ko mga Ina: aya a Pipikirn san na so Kasopaka ko mga Sugowan iran; kagiya a so Mbala a Loks na giyanan i Lbi a Madasg o Manosiya, Pitharo o Allah: {وَاعْبُدُوا اللَّهَ وَلَا تُشْرِكُوا بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى} النساء: 36. {Zuasuata niyo so Allah go di niyo Zakoton sa Maito bo, go Phiyapiyai niyo so Mbala a Loks iyo sa Samporna a Kaphiyapiya, goso mga Dadasg} An Nisa: 36. Kinanglan a aya a Paganay a Pphiyapiyaan o Manosiya ago Pnggastowan iyan, Iphangalimo iyan na so Mbala a Loks iyan, Aya a Ptharoon iyanon na so mga Pipiya, di niyan Phagatowi, ka so Mbala a Loks na Mala a Kabnar iran rktano, na so Kaatowi ko Mbala a Loks na pd anan ko mga Ala a Dosa. Giyanan pman a Kiyaaloy san o Ina a daon so Ama na aya a Sabap anan na kagiya Mas Mala i Kabnar o Ina adi so Ama ko mga Wata, Ugaid na Knaba aya a Maana anan na Bawn di pd so Ama ka Mala mambu i Kabnar so Ama. 2.So Kilbngn ko mga Wata a Babay a Oyagoyag: Sii ko Masa a dapn so Islam na aya a Tabiat o mga Tao na o Mbawata siran sa Babay na Iplbng iran a Oyagoyag sa Aya dn a Ipphatay iran na so Kapthamboni kiran a Botha. Aya oto a Sabap na Ipkhagowad iran a Tanto so mga Bae ka aya kiran kon Mala a Phakatunda ko Paawing, Na anda dn i Kambawata o Kharomai sa Babay na Miyarata a Ginawa iran, na Ayabo a Okit iran na dowadowa: Odi iran Iplbng a Oyagoyag na Pagoyagn iran Ugaid na Prasayn iran a Tanto. Ugaid na Sangkai a Masa na Miyada anan na aya pman a gii Nggolawlaan o Sabaad na Pmbubosn so Wata, Adn a Iplbad iyan so Wata iyan, adn pman a Phanginom sa Bulong ka gii Khontrol, na Giyanan mga Layok na Haram anan a Inisapar o Allah ko Katharo iyan: {وَلا تَقْتُلُوا أَوْلادَكُمْ خَشْيَةَ إِمْلاقٍ نَحْنُ نَرْزُقُهُمْ وَإِيَّاكُمْ} الإسراء: 31. {Di niyo Pmbonowa so mga Wata iyo sa Misabap sa Kalk ko Kamrmr, Ka Skami i Pphagpr kiran ago sii rkano} Al Isra: 31. 3.So Karna ko Miyapatot rka goso Kaplolobaa ko Tamok sa Apiya Antunaa Okit: Hiyaram o Allah so Kaphagrn angka ko Miyapatot rka ko Tamok ka, Lagid o Zakat, goso di ron Kapnggastowa, Lagid o (Kakhoripoti ko Ginawa) ka so Allah na Iniitong iyan sa Wajib so Kanggastowa ko Tamok, Kinanglan na Pnggaston ko Ginawa, goso mga Miskin, mga Dadasg, aya a Mala na so Zakat iyan. Pd pn a Inisapar so Kambabanoga ko Tamok sa Apiya Antunaa a Okit Haram antaa ka Halal. 4.Ipkhararangit o Allah so Gii Kapamanothola ko Langowan a Pkhan'g: Ibarat iyan na Poon adn a Miyan'g ka A Dingka Katawan i Katatanto niyan na Iniphapalata aka a Pitharo i giraw. Pd san pn a Giya a Mabbmbar Imanto s CP odi na FB a Poon adn a Minipost a tigiyan a: Batiyaangka Ini na Oriyan iyan na Pangsentn ka ko mga Kilalangka odi na Ishare ka ka adn a Phakauma rka a Magataos a Mapiya na odingka Pangsent na Makauma Rka so Tiyoba o Allah. Klaro anan a Kabokhagan na Obakano ron Misowasowa. Pitharo o Nabi (S.A.W.): كفى بالمرء إثما أن يحدث بكل ما سمع "Miyakatiyokop dn ko Tao a Dosa niyan a gii niya Kapanothola ko Langowan a Pkhan'g iyan". 5.So Kadakl a Pakaiza:Ipkhararangit o Allah so Kadakl a Pakaiza (Odi na Kapamangni), sa Tamok, Inonta bo o Kailangan. Kinanglan ko Manosiya a di Pphamalad sa Tamok ko mga Tao inonta bo so Kailangan iyan, na upama pman ko Kailangan iyan dn a Makapamangni na Khapakay rkaniyan oto Ugaid na Sobo so Diyangka a Kailangan iyan. Adn a Hadith a Miyaaloy a pd ko Maana niyan: "So Tao a Mapasang i Kapamalad na phakauma sa Alongan a Mawri a da a Sapo ko Bontal iyan". Pd san pn so Madakl a Kapakaiz ko Ilmo ko Islam, a apiya so da Tutugoniyan a Pakaiza na Ipphagiza, Ikadowa na Katokawan o Tao so Kukoman o Shayi na Ipagiza iyan pn ko pd a mga Ulama kagiya a Ipphangilay niyan sa Okit i Kapakay niyan. Di anan Khapakay ka Ipkhararangit anan o Allah. 6.So Kailanga ko Tamok: Lagid o Kanggastowaon ko Haram, goso da a Gona niyan, Lagid o Birth day, goso Salakaw san. Kinanglan na so Tamok na sii Mawsar ko Ikasosowat o Allah. So Tamok na Ipagiza ko Tao s Alongan a Mawri O anda niyan inosar, antuna i Okit a Kiyasokata niyanon. والله أعلم! وصلى الله وسلم على حبيبنا محمد