Pd sa mga Wasiyat o Nabi a Maginawa (S.A.W.)!

Pd sa mga Wasiyat o Nabi a Maginawa (S.A.W.)! عَنْ عَمْرِو بْنِ شُعَيْبٍ، عَنْ أَبِيهِ، عَنْ جَدِّهِ -رَضِيَ الله عَنْهُمْ- قَالَ: قَالَ رَسُولُ اللَّهِ -صَلَّى الله عَلَيْهِ وَسَلَّمَ-: "كُلْ وَاشْرَبْ، وَالْبَسْ، وَتَصَدَّقْ فِيْ غَيْرِ سَرَفٍ وَلَا مَخِيلَةٍ" أَخْرَجَهُ أَبُو دَاوُدَ، وَأَحْمَدُ، وَعَلَّقَهُ الْبُخَارِيُّ. Miyakapoon a Thotol ko Amr Ibn Shu'ayb, Miyakapoon a Thotol ko Ama iyan, Miyakapoon a Thotol ko Ama iyan a Datu (R.A.) Pitharo iyan: Pitharo o Rasulullah (S.A.W.): "Kangka na go Inom ka, go Nditar ka, go Sidkah ka sa da a Bawn Kapag Israp ago Kathakabor" Piyakaliyo i Abu Daud, go si Ahmad, go Tiya'likan i Bukhari. OSAYAN: Giyangkai a Hadith a gii ron Tharoon o Nabi a: "Kangka na go Inom ka, go Nditar ka, go Sidkah ka sa da a Bawn Kapag Israp ago Kathakabor" na aya a Mapapadalm roo na Sugoan ko Manosiya a Kakan iyan ko ini Rizki ron o Allah a Pangn'ngkn, ago Kainom iyan ko ini Rizki ron o Allah a Pitibarangan a Panginginomn a Knaba Haram, ago so Kanditara niyan ko Ini Rizki ron o Allah a mga Nditarn a gii niyan Mithanos, ka aya a Pakaasal iyan na Khapakay. Kagiya a so Allah na Piyakay niyan rktano so Langowan o mga Pipiya, na Hiyaram iyan rktano so Langon o mga Rarata. Aya a K'n o Manosiya na so Khagaga niyan ko Pisusunan a Pangn'ngkn, na da a Karata a Kakana niyan ko Mapiya a Pangn'ngkn goso Lmbak a Pangn'ngkn, goso Kakana niyan ko Khalbodanon. Aya mambo a Paginomn iyan na so Panginginomn a Soti, Lagid o Tang goso Salakaw san a Panginginomn a Halal goso Khalbodanon sa Kakhowaa niyanon. Pitharo o Allah Taala: {يَا أَيّهَا الرُّسُل كُلُوا مِنَ الطَّيِّبَات وَاعْمَلُوا صَالِحًا} المؤمنون: 51. {Hay! Mga Rasul! Kangkano ko mga Pipiya go Nggalbk kano sa Mapiya} Al Mu'minon: 51. Go Pitharo o Nabi (S.A.W.): "وَإِنَّ اللَّهَ أَمَرَ الْمُؤْمِنِينَ بِمَا أَمَرَ بِهِ الْمُرْسَلِينَ" "Mataan! A so Allah na Inisugo iyan ko Miyamaratiyaya so Inisugo iyan ko mga Rasul" Pitharo pn o Allahu Taalah {يَاأَيُّهَا الَّذِينَ آمَنُوا كُلُوا مِنْ طَيِّبَاتِ مَا رَزَقْنَاكُمْ وَاشْكُرُوا لِلَّهِ إِنْ كُنتُمْ إِيَّاهُ تَعْبُدُونَ} البقرة: 172. {Hay Miyamaratiyaya! Kangkano ko mga Pipiya ko Ini Pagpr ami rkano, go Panalamati niyo so Allah o skano na skaniyan bo i Psimbaan iya} Al Baqarah: 172. Kinanglan a aya a K'n o Muslim na so mga Pipiya a Halal ago da a Bawn Kapag Israp, ago da a Bawn Kathakabor. THANODAN: Inisapar o Allah so Kapamagol "Kapag Israp" Lagid o Kapakasobraa ko Pangn'ngk, so Kanggastowa ko Tamok ko Salakaw ko Onot ko Allah, So Kaosarawn ko Haram. والله أعلم! وصلى الله وسلم على حبيبنا محمد!.