Pd sa Kapakallbi o Kapakikhoyampta ko Tunganay!

Pd sa Kapakallbi o Kapakikhoyampta ko Tunganay! عَنْ أَبِيْ هُرَيْرَةَ -رَضِيَ الله عَنْهُ- قَالَ: قَالَ رَسُولَ اللَّهِ -صَلَّى الله عَلَيْهِ وَسَلَّمَ-: "مَنْ أَحَبَّ أَنْ يُبْسَطَ لَهُ فِي رِزْقِهِ وَيُنْسَأَ لَهُ فِي أَثَرِهِ فَلْيَصِلْ رَحِمَهُ" أخرجه البخاري. Miyakapoon a Thotol ko Abu Hurairah (R.A.) a Pitharo iyan: Pitharo o Rasulullah (S.A.W.): "Sadn sa Tao a Khababayaan iyan a Makablangon so Rizki go Makalndo so Omor iyan na Paki Khoyampta ko Tunganay niyan" Piyakaliyo i Bukhari. OSAYAN: Giyangkai a Hadith na Pphagosayn iyan so Galbk a Pkhasabapan sa Kapphakablang o Rizki ago Kapphakalndo o Omor a giyoto so Kapaki Khoyampta ko Madasg odi na Tunganay. Aya a Pipikirn sangkai a Madasg odi na Tunganay na siran so: mga Tunganay ngka ki Ina aka, Lagid o Bapa aka ki Ina aka, Babo oka, mga Datu oka, mga Bai ngka, odi na so mga Tunganay ngka ki Ama aka, Lagid o mga Bapa aka ki Ama aka, mga Babo oka, mga Datu oka, mga Bai ngka, goso mga Wata iran, goso mga Tngd Minsan, langon o makasosold ko Ptharoon a Tunganay odi na Madasg. Giyanan a Miyanga Aaloy na adn a Kabnar iran rka, na o Mitunay ngka so Kabnar iran rka na Mataan a giyoto i Khasabapan sa Kapaka pmbagiyan ka sa Mapiya ko Doniya ago sa Akhirat, sii ko Doniya na Phakablang rka so Rizki ago Kaphakalndo so Omor ka, na sii sa Alongna a Mawri na Balas a Mala a giyoto so Kapakathakna ko Surga. So pman so Kapaki Tholaka ko mga Tunganay na pd anan ko mga Ala a Dosa a Pkhasabapan ko Morka o Allah sa Lagid o Kiyatharowaon o Allahu Taala: }فَهَلْ عَسَيْتُمْ إِن تَوَلَّيْتُمْ أَن تُفْسِدُوا فِي الْأَرْضِ وَتُقَطِّعُوا أَرْحَامَكُمْ (22) أُوْلَئِكَ الَّذِينَ لَعَنَهُمُ اللَّهُ فَأَصَمَّهُمْ وَأَعْمَى أَبْصَارَهُمْ (23)} محمد: 22-23. {Na Ino Masikn skano na o Makakhapaar kano na Phaminasa kano ko Lupa, go Phanpdn iyo so mga Kathotonganaya iyo?. Siran man so Pimorkaan siran o Allah, Bingl iyan siran go Biyota niyan so mga Kailay iran} Muhammad: 22-23. Ini diyanndi kiran o Allah so Murka ago Bingl iyan siran, Biyota niyan siran Sabap ko Galbk iran a Kapaminasa ko Lupa ago Kapakithotolaka ko mga Tunganay. Na giyanan a Kiyapmorkai kiran o Allah na Dalil anan sa so Kapaki Thotolaka na pd ko mga Ala a Dosa. Miyaaloy sangkai a Hadith a Mataan a so Kapaki Khoyampta ko Tunganay na Pkhasabapan ko Manosiya sa Kaphaka Blangon o Rizki go Barakah so Rizki ron, ago Phakalndo so Omor iyan. PAKAIZA: Ba so Omor o Manosiya na Pkhasompatan antaa ka Mapapasad dn so Maphagomor o Manosiya? SMBAG: Simbag anan o mga Ulama sa Mataan a so Omor o Manosiya na Mapapasad dn, di Khalbatan na di Khaomanan, Ugaid na o Maki Khoyampta ko Tunganay niyan na Pakapmbarakatnon o Allah so Omor iyan ko Kapangongonotan ko Allah ago sii ko mga Pipiya. THANODAN: So Omor o Manosiya na Mapapasad dn, di Khaomanan na di Khalbata, Ugaid na aya a Maana a Giyanan a Hadith a Phakalndo so Omor iyan na Katii: 1.Khabaloy so Omor iyan a Barakah, Khaosar ko Kapangongonotan ko Allah, ago Khaosar ko mga Pipiya a Khasabapan sa Balas a Mala sii ko Allah. Apiya Mababa i Omor na asar a sii Miyaosar ko Mapiya ago Onot ko Allah, Apiya pman Malndo i Omor amay ko sii Miyaosar ko Marata na giyoto na Marata dn oto. 2.Upama ka Maki Khoyampta ko Tunganay na Phkalndo ron so Omor iyan na Upama ka Makitholakaon na Phakakmpt so Omor iyan, Aya a Maana na so Kapphakalndo o Omor ago Kapphaka Kmpt iyan na adn a mga Sabap iyan, Ugaid na Palaya oto Thatakdirn o Allah, Papasadn iyan dn a Giyoto a Kalndo o Omor goso Kakmpt iyan, go Papasadn iyan dn so mga Sabap iyan. 3.So Thotolanon a Mapiya ko Oriyan o Kapatay niyan. Amay ko Mawafat so Manosiya na Poon Mapiya a Thotolanon na Lagid skaniyan o Oyagoyag a sisii skaniyan ko Zaronsarongan o mga Tao Sabap ko Thotolanon a Mapiya a skaniyan na Maatay. Ikadowa a Miyapanothol na Prizkiyan skaniyan o Allah sa Wata a Shalih a Mapndowaa niyan skaniyan. Na Lagid o Miyakalayat so Omor iyan sabap ko gii ron Kindowaan o Moriyatao niyan. والله أعلم! وصلى الله وسلم على حبيبنا محمد