So Kahaharam o Katuyoka ko Nditarn sa Kathakabor!

So Kahaharam o Katuyoka ko Nditarn sa Kathakabor! عَنْ ابْنِ عُمَرَ -رَضِيَ اللَّهُ عَنْهُمَا- قَالَ: قَالَ رَسُولَ اللَّهِ صَلَّى اللَّهُ عَلَيْهِ وَسَلَّمَ: "لَا يَنْظُرُ اللَّهُ إِلَى مَنْ جَرَّ ثَوْبَهُ خُيَلَاءَ" متفق عليه. Miyakapoon a Thotol ko Ibn Omar (R.A.) a Pitharo iyan: Pitharo o Rasulullah (S.A.W.): "Di Pagilayn o Allah so Tao a Tiyonda iyan so Nditarn iyan sa Kathakabor" Piyagayonan i Bukhari go si Muslim. OSAYAN: Giyangkai a Hadith na pd pnai sa Paparangayan "Adab" ko Kandiditaran. Pd pn sa Paparangayan ko Kandiditaran a Haram so Kapag Isbal. Aya a Ptharoon a Isbal na so Kazarowar a Mallpas so Dowa a Boko a Ski odi na Matutunda. Aya a Kinanglan ko Kazarowar ko mga Datu na di Malpas so Boko a ski. Ka sadn sa Lpasn iyan so Dowa a Boko a ski na Diniyandian o Allah sa Siksa ko Naraka. Na upama ka giyoto a Katutndaa niyanon na Kararaksan sa Kathakabor na di skaniyan Pagilayn o Allah. Sabnar a Pitharo o Nabi (S.A.W.): "مَا كَنَ أَسْفَلَ الْكَعْبَيْنِ فَهُوَ فِي النَّارِ" "So Nganin a aya a Btad iyan na Miyalpas iyan so Dowa a Boko a ski na skaniyan na sii ko Naraka". Aya a Tamana o Kazarowar ko mga Datu na so Dowa a Boko a ski, Apiya Miyaoma so Dowa a Boko a ski na asara a di Malpas, na o Malpas so Dowa a Boko a ski na Haram, ka aya a Kanditar ko Islam na di Malpas so Dowa a Boko a ski. So Kapag Isbal na Mlagid o Pipikirn kawn na Kathakabor antaa ka Da a Bangkawn Pipikirn na Haram dn oto. Ka di Khapakay obangka Tundaa so Sarowar ka a gii ngka Tharoon a da Pipikirn akn sii a Kathakabor. Basta a Malpas so Boko a Ski na Haram dn oto apiya pn da a Pipikirnon a Kathakabor, Ugaid na upama ka adn pman a Pipikirnon a Kathakabor na Sobrawn oto a Kiya Haram iyan, ka so Isbal Haram anan a dadn a Sangkot iyan. Aya a Tabiya san na so mga Bae, ka so mga Bae na aya a Kandiditaran iran na Matutuyok, Khalpas so Palo, kagiya a adn a Miyapanothol sa Hadith a so mga Bae na Awrat. والله أعلم! وصلى الله وسلم على حبيبنا محمد!.