AQEEDAH O MGA YAHUDI AGO KRISTIAN

AQEEDAH O MGA YAHUDI AGO KRISTIAN ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ ﺍﻟﺤﻤﺪ ﻟﻠﻪ ﺭﺏ ﺍﻟﻌﺎﻟﻤﻴﻦ ﻭ ﺍﻟﺼﻼﺓ ﻭ ﺍﻟﺴﻼﻡ ﻋﻠﻰ ﺭﺳﻮﻝ ﺍﻟﻠﻪ ﺳﻴﺪﻧﺎ ﻣﺤﻤﺪ ﻭ ﻋﻠﻰ ﺁﻟﻪ ﻭ ﺻﺤﺒﻪ ﺃﺟﻤﻌﻴﻦ ﺃﻣﺎ ﺑﻌﺪ So mga kristian na aya Aqeedah/paratiyaya iran na sii kon mababaling/kakadn so Tohan sii sa Langit. Na sii kon ko kiyaphikira niyanon sa thana ko Doniya na miya-khailangan iyan kon so Lawas/badan a adn a mga anggaota iyan a lagid o lima go kmr, go ulo, paras, suki na aya niyan siyolkan. maana a mimbaropa kon so Tohan sa manosiya na miyagingaran sa Jesus Christ (Kristo). Na tharo-on ka kiran a Di khapakay ko Allah ago Mustaheel iba solk sa Makhloq (kaadn) a lagid o badan, na aya ipsmbag iran na tonaa kon i marata-on i khagaga o Allah a makasolk ko Makhloq iyan, go khagaga niyan a mbaropa sa Tao!. So Mambo so mga Yahudi na miplalagid iran sa Aqeedah/ Paratiyaya so mga Kristian, ka aya paratiyaya a Yahudi na sii kon mambo mababaling/kakadn so Allah sa langit, a raks a moontod/ phapadampol kon sii ko Arash!. Sabnar a Miyadadag so Aqeedah/paratiyaya o mga Yahudi ago mga Kristian ka sabap ko kiyapakazipata iran ko Allah sa mga Sifat a special a para bo ko mga Kaadn. na wajib/patot a kapananggilaan o titho a Muslim so mga paratiyaya/panarima o mga Yahudi ago mga Kristian ka madadadag a paratiyaya. aya sabap a kadadag o mga Yahudi ago mga kristian na pizaksian dn o Allah sii sa Qur-an a mataana so mga Yahudi ago mga Kristian na miyangadadadag siran. AYA PARATIYAYA A YAHUDI NA SII KON KAKADN SA LANGIT SO ALLAH ﻗﺎﻝ ﺍﻟﻴﻬﻮﺩ ﻓﻲ ﺳﻔﺮ ﺭﺅﻳﺎ ﻳﻮﺣﻨﺎ ﺍﻹﺻﺤﺎﺡ 2 ﺍﻟﺮﻗﻢ " : 3ﻭ ﺳﻤﻌﺖ ﺻﻮﺗﺎ ﻋﻈﻴﻤﺎ ﻣﻦ ﺍﻟﺴﻤﺎﺀ ﻗﺎﺋﻼ ﻫﻮ ﺫﺍ ﻣﺴﻜﻦ ﺍﻟﻠﻪ". ﺍﻫـ Pitharo o mga yahudi sii ko kitab iran: “Miyakan'g ako sa sowara a matanog a poon sa langit a diiniyan githaroon a giya langit na aya Darpa o Allah.” AYA PARATIYAYA A YAHUDI NA MOONTOD SO ALLAH SII KO PORO O ARSH IYAN " ﺍﻟﺠﺎﻟﺲ ﻋﻠﻰ ﺍﻟﻌﺮﺵ ﻳﺤﻞ ﻓﻮﻗﻬﻢ". ﺍﻫـ ﺳﻔﺮ ﻳﻮﺣﻨﺎ ﺍﻹﺻﺤﺎﺡ 7 ﺍﻟﺮﻗﻢ 15 Pitharo o mga yahudi sii ko kitab iran: “So (Allah a) moontod ko Arsh iyan na komakadn sa kaporo-an o mga oripn iyan.” AYA PARATIYAYA A YAHUDI NA PTHORON SO ALLAH SII KO DARPA ﻗﺎﻝ ﺍﻟﻴﻬﻮﺩ ﻓﻲ ﺳﻔﺮ ﺍﻟﺘﻜﻮﻳﻦ ﺍﻹﺻﺤﺎﺡ 46 ﺍﻟﺮﻗﻢ " : 4-3ﻓﻘﺎﻝ ﺃﻧﺎ ﺍﻟﻠﻪ ﺇﻟﻪ ﺍﺑﻴﻚ....ﺃﻧﺎ ﺍﻧﺰﻝ ﻣﻌﻚ ﺇﻟﻰ ﻣﺼﺮ". ﺍﻫـ Pitharo o mga Yahudi sii ko kitab iran: “Pitharo o Allah: Sakn so Allah a Tohan i ama aka…na thoron (phanog) ako sii sa Misir a pd akn ska.” ﻗﺎﻝ ﺍﻟﻴﻬﻮﺩ ﻓﻲ ﺳﻔﺮ ﺍﻟﺘﻜﻮﻳﻦ ﺍﻹﺻﺤﺎﺡ 11 ﺍﻟﺮﻗﻢ " : 5ﻓﻨﺰﻝ ﺍﻟﺮﺏ ﻟﻴﻨﻈﺮ ﺍﻟﻤﺪﻳﻨﺔ". ﺍﻫـ Pitharo o mga Yahudi sii ko kitab iran: “Tomiyoron so Tohan ka pagilay niyan so ingd.” ﻗﺎﻝ ﺍﻟﻴﻬﻮﺩ ﻓﻲ ﺳﻔﺮ ﺍﻟﺘﻜﻮﻳﻦ ﺍﻹﺻﺤﺎﺡ 13 ﺍﻟﺮﻗﻢ " : 20ﻭﻛﺎﻥ ﺍﻟﺮﺏ ﻳﺴﻴﺮ ﺃﻣﺎﻣﻬﻢ ﻧﻬﺎﺭ". ﺍﻫـ Pitharo o mga yahudi sii ko kitab iran: “Aya maolaola o tohan na plalakao sii ko onaan iran igira a daondaw.” AYA PARATIYAYA A YAHUDI NA ADN KON A MGA ANGGAUTA O ALLAH ﻗﺎﻝ ﺍﻟﻴﻬﻮﺩ ﻓﻲ ﺳﻔﺮ ﺍﺷﻌﻴﺎ ﺍﻹﺻﺤﺎﺡ 25 ﺍﻟﺮﻗﻢ " : 10ﻷﻥ ﻳﺪ ﺍﻟﺮﺏ ﺗﺴﺘﻘﺮ ﻋﻠﻰ ﻫﺬﺍ ﺍﻟﺠﺒﻞ". ﺍﻫـ Pitharo o mga yahudi sii ko kitab iran: “So Lima o tohan na pkibatog sa poro a anan a palao.” ﻭﻗﺎﻝ ﺍﻟﻠﻪ " :ﻧﻌﻤﻞ ﺍﻹﻧﺴﺎﻥ ﻋﻠﻰ ﺻﻮﺭﺗﻨﺎ ﻋﻠﻰ ﺷﺒﻬﻨﺎ". ﺍﻫـ Pitharo kon o Allah a tigo mga Yahudi: “Balowin tano so Manosiya sa Lagid tano sa Ropaan ago Bontal.” Miya-aloy anan ko kitab o mga yahudi. KATAYA SO AQEEDAH/PARATIYAYA A AHLUSSUNNAH WAL JAMA’AH (SUNNI) So Allah na inisogo iyan rktano a kazopaka tano ko mga Yahudi ago so mga Kristian sii ko mga dadabiyatan iran na samporna ko mga Aqeedah/paratiyaya iran a madadadag. Aya dn a sabap a kiyadadag o mga paratiyaya iran na sabap ko kiyapangalina iran ko Taurat ago so Injeel a kitab o Moosa ago so Eisa (alayhimas salam), na san mambo minisabap ada iran kasabota ko ontol a Aqeedah a minitalingoma o Moosa ago so Eisa. Aya Aqeedah a Ahlus sunnah na di khapakay iba tano tharowa a komakadn so Allah sa Darpa, ka pd sa sifat o Allah a di ska niyan dn Makapkhaylangan sa darpa, ka ska niyan i miyadn ko Langowan a darpa na Mostaheel oba ska niyan kadn odi na Baling ko inadn iyan ka makapmaana sa mas mala so Makhloq adiso Allah a Khaliq. Pd sa kaadn o Allah so Langit, go Lopa, go so Arsh etc. na Mostaheel iba ska niyan kadn ago dapo ago ontod ko makhloq/ kaadn iyan, Ka sadn sa tao a aya paratiyaya niyan na Komakadn so Allah sii sa Langit odi na sii sa Arsh na miyaka-iring ska niyan ko mga Yahudi ago so mga Kristian a aya mambo a paratiyaya iran na sii kon mambo kakadn so Allah sa Langit a moontod ko poro o Arsh iyan. Na ribat anan a Aqeedah!. Aya Ontol a aqeedah a Sunni na: so kapakamomo-ayan o Allah ko da niyan pn kaadna ko langowan a kaadn iyan (a dadn a pd iyan a Shai) a Lagid o langit, Lopa, Arsh na samporna sa giyai a doniya, na taman dn imanto na giyoto dni kapakamomo-ayan o Allah a didn makapkhailangan sa Darpa ago diyon phakararad ago diyon phakataasar so Makhloq iyan. Sakamauto mambo adi khapakay iba tano pakaplawasa so Allah ago tagoi sa mga Anggauta ka ribat anan a Aqeedah ka giyanani paratiyaya o mga Kristian ago mga Yahudi a Lagid kon o Allah so mga kaadn iyan a adn mambo kon a mga anggauta iyan. na aya paratiyaya tano a mga Sunni na dikhapakay aba tano tmpowi so Allah sa Anggauta ka so mga anggauta ago material na sii bo anan special ko mga kaadn o Allah, Na so Allah na dimakapkhailangan sa mga material ago mga anggauta, ka pd sa Sifat iyan a di ska niyan dn makapkhailangan. So mipantag ko mga Kalimah a miya-aloy sa Qur-an a makap'mamaana so Literal iyan sa mga Anggauta na aya tindgon o mga Ulama tano a mga Ahlus sunnah na dowa: TAFWEEDH ago TA’WEEL. Aya maana TAFWEEDH na sii tano piyakambalingan ko Allah so titho a Murad a maana o mga Kalimah a makap'mama-ana so literal iyan sa mga anggauta a manonompang ko Allah. Knaba aya pharatiyayaa tano na so katawan tano a maana niyan sa literal a mga anggauta, ka aya bo a matao a titho ko mga maana niyan na so bo so Allah. Aya pd a Rayagan o Tafweedh na: sadn sa maana a kabaya o allah sa giyai a mga kalimah a mga motashabihat a datar o yad ago wajh ago ayn ago istiwa na aya tano pharatiya-an. Ditano pagalowin so maana niyan ko Literal iyan. Giyanan i pmbtowan sa tafweedh. Aya ibarat iyan na lagid o Kalimah a “Yad” sii sa Qur-an, Na aya ptharoon o Muslim a Sunni sii ko kaptindgi niyan ko Tafweedh na: ya allah na sadn sa pakamomoradan ka sa giyai a Kalimah a “Yad” na aya ko piyaratiyaya. So maana niyan ko literal iyan a lima a anggauta na Mostaheel rka Ya Allah. Giyanan i Rayagan o Tafweedh. So mipantag ko Ta’weel na aya maana niyan pd na "Tafseer" a giyanan so kaonoti tano ko inipmaana o mga Ulama tano sii ko mga kalimah a Motashabihat sii ko Qur-an ago hadith a maka- aayon ko Ongangn o Basa arab. Sa aya ibarat iyan na Lagid o kalimah a “YAD” a manonompang ko Allah na aya inipmaanaon o mga Ulama tano na Limo ago Bagr sabap sa so “YAD” na madakl a tanto i maana sii sa Lugah, na aya domadait a maana niyan sii ko Allah na Bagr odi na Limo, Ka so kapmaanai ron sa anggauta a Lima/Barokan a piyopiyor na di domadait ko Allah ka kiropa so Allah sa Lagid o kaadn iyan, sa apiya pn pitharo o Tao a knaba Lagid o anggauta a lima a kaadn. Tlo a Hikmah ko kaphagosara ko ta’weel: 1- Paganay a Hikmah ko kaphagosar tano sa Ta’weel na Sabap ko kiyaosaraon o Allah ko Qur-an ago sabap ko Kiyaosaraon o Nabi ago so mga Sahaba niyan na samporna ko mga Imam a mga Mujtahid. Aya ibarat o kiyaosar o Allah sa Ta’weel na so kiyatharoa niyanon sa Qur-an a aya mapmama-ana niyan sa Literal na so gi mamagtonga a Tlo katao na ikapat iran so Allah, na kokoma a inipangndao rktano o Allah sii sa giyanan a ayat so ta’weel, ka odi tano anan osari sa Ta’weel na ti samanoto na miplolomamka bs o Allah so Tlo katao a manosiya a gimamagtonga?! ago maphakadakl tano so Allah ka miyakadakdakl a giimamagtonga sii ko Doniya. Na aya titho a Murad a giyanan a ayat na katawan o Allah so langowan a giitharo-on o mga tao a giimamagtonga. Giyanan i pmbtowan sa Ta’weel. Aya ibarat o ta’weel o Nabi na so hadith iyan a aya maana niyan sa literal na “Siyap anga so Allah” na timbang mambo a inisogo o Nabi a kakhaosari tano san sa ta’weel ka odi tano osari sa Ta’weel na ti samanoto na so bs so Allah i phakisiyap ko Oripn iyan?! na aya titho a Murad san o nabi na “siyap anga so sogo-an o Allah”. na giyanan i pmtowan sa Ta’weel. 2- Aya ikadowa a Hikmah ko kaphagosar tano sa ta’weel na para di tano misaginda so Allah sa Makhloq (kaadn), ka aya ibarat iyan na datar o Katharo o Allah sa hadith Qudsi a aya mapmama-ana o literal iyan na “miyasakit ako a tigo Allah” na odi tano anan osari sa Ta’weel na kisayan tano dn so Allah sa makhloq a pkhasakit mambo. Na aya ta'weel anan a titho na aya pkhasakit na so Oripn o Allah, knaba so Allah i pkhasakit ka matag ska niyan miyosar sa ongangn sa kiyatharoa niyanon sa "pkhasakit ska niyan" ka para tano katagoi sa babaya ko gikambisitai ko mga pagari tano a di phamakarag. na giyanan i pmbtowan sa Ta’weel. 3- Aya ikatlo a hikmah ko kaphagosara tano ko ta’weel na para ditano mapakambulabulang so mga maana o mga ayat o Allah ago so mga Hadith o nabi. Sa aya ibarat iyan na so ayat a “Istiwa” a aya maana niyan ko literal iyan na miyontod ago komiyadn ko Arsh. Na odi tano anan osari sa ta’weel na mipmbulang iyan so ayat a aya maana niyan sa Literal na: "apiya anda kano sangor na khasangoran iyo so paras o Allah" ago mipbulang iyan so hadith a aya maana niyan sa literal na igira a mizambayang kano na di kano pndoda ko una-an iyo kandodon so Allah. Ago so hadith a aya kapakararani o tao ko Allah na igira a Sumusojod, ago so salakaw san a ayat ago hadith a aya maana niyan sa Literal na sii matatago so Allah sa Lupa a miplolomamka iyan so mga Kaadn iyan. na odi tano anan osari sa Ta'weel na miyapakadowa tano so Allah ka adn a Allah sa puro ago adn a Allah sa Baba, na giyoto i sabap a Kap'phaka osar tano sa Ta'weel ka para ditano mapakapmbulambulang so mga maana o Ayat ago hadith. Sadn sa pkpitan tano sa giyanan a Dowa (TAFWEEDH ago TA’WEEL) na palaya dn anan mapapakay, ka giyanan i pikpitan o mga Ulama tano a mga ahlussunnah sii ko kiniphantagn iran ko mga kalimah odi na Ayat Motashibat sii ko Qur-an ago sii ko Hadith, na samporna ko mga Sahaba o Nabi (S) na da siran dn mambo liyo sa giyanan a dowa (Tafweedh ago Ta’weel). Ka sadn sa lomiyo sa giyanan a Dowa na dadn sa Akal ka odi maolog ko “Ta’teel” na aya khaologanon na so Aqeedah o mga Yahudi ago mga Kristian a “Tashbeeh” a giyanan so kisayan’n ko Allah sii ko mga Makhloq! ﺃﻟﻠﻬﻢ ﺃﺭﻧﺎ ﺍﻟﺤﻖ ﺣﻘﺎ ﻭ ﺍﺭﺯﻗﻨﺎ ﺍﺗﺒﺎﻋﻪ ، ﻭﺃﺭﻧﺎ ﺍﻟﺒﺎﻃﻞ ﺑﺎﻃﻼ ﻭ ﺍﺭﺯﻗﻨﺎ ﺍﺟﺘﻨﺎﺑﻪ ﻭ ﺻﻠﻰ ﺍﻟﻠﻪ ﻋﻠﻰ ﺳﻴﺪﻧﺎ ﻣﺤﻤﺪ ، ﻭ ﺁﺧﺮ ﺩﻋﻮﺍﻧﺎ ﺃﻥ ﺍﻟﺤﻤﺪ ﻟﻠﻪ ﺭﺏ ﺍﻟﻌﺎﻟﻤﻴﻦ