TOTHOLAN KO KAPHAKA-SHAFA'AT O NABI (S.A.W.) .

TOTHOLAN KO KAPHAKA-SHAFA'AT O NABI (S.A.W.) . Sii ko oriyano kawyaga ko pagtao sa Alongan a Mawri ipoon ko Adam na tamandun ko khaposan sangkai a pagtao a matimo siran sa satiman a darpa, aya ropaan o Alongan sangkotowa masa na isa-isa ka Mile a kawatan iyan sa olo, oba di imanto na aya kawatan iyan rukutano ko kiyabatiyaa koron na 93,000,000 miles, siyao polo ago tlo ka million ka mile a kawatan rukutano o alongan imanto na kiya sokodan so salongan a maagag kawon a dikadun makasirong igera maranti alongan na khapakay a dingka magaga. . Giyotoi sabap ana khailayengka sa gawii oto a dii makapulangoy ko ating iyan, na adumpuman a siibo matataman sa bokowa Ai niyan so Ating iyan, ana taman sa lub na ana taman sa lig sa sii oto dipendi ko kala a dosa o tao. . Gawii oto a daa lagid iyan a marugun, daa lagid iyan a mala awida akal, opamabo ka adumpuna lamba a kapatay na khasanaan oto a mapolang so pagtao sangkotowa karata nago karugun a butad. . Isa puna karugun angkanan a masa na omani isa na katao niyanduna ginawa niyan, daa khaapasan, dika phaka apas ko loks ka, pagaringka, wata aka, karomangka ka opuno khaparo na asar bo ka makasorga siran na apiyaka miyaka naraka, sangkanan a masa na omani isa na asar ka maka ligtas na apiya sodun so kadan-dan o pagtao na palayadun miyaka naraka. Giyanani isa ropaan a karugun angkanan a masa a sigoradodun a phakatalingoma tanosan. . Isa puna karugunanan na so salongan san na aya timbang iyan na sanggibo ragon (1,000yrs) ana isa ayat a so mga gawii san na aya timbang iyan na limapolo ragon (50,000yrs). Ogaid na apiya isa bo ka oras a kapakaraniyo tao ko alongan sa 1mile na kasanaan oto a matonag a norgapa iyan opamaka damapasad so kapatay, na opundirogadaini o tao na khapakay a kasanaan a mipananggila iyan sa dosa na masimba niyan so Allah sa tarotop. . Oriyan iyan na matharo o sabaad ko pagtao: Baniyo di khailay a miyasowa iyowai? Baniyo di khailay a riyaotan rukanowai? Ino kano di phangilay sa maka Shafa'at rukano ko kadunan iyo? . Na matharo o sabaad: Nao, pagapas kano ko Adam. Oriyanoto na mawopakat siran sa kaphagapas iran ko Adam (a.s.) na amay ka makatalingoma siranon na tharoon iranon: Hay Adam na suka e kiyapoonan o pagtao, inadungka o Allah asiidun minggolalan sa lima niyan nago so kiyatagoi niyan ruka sa niyawa, siyoJuodangka o mga Malaikat na ino kamingka di Shafa'ata ko kadunan ka, bangka di masisima angkai a masosowa ami, bangkadi khailay a riyaotan rukamiyai sa karuruguni rukami a tanto? . Tharoon o Adam: Mataan a so kadunan akun na so rarangit iyan imanto na daniyandun mipurangit sa ini-kumbo-kumbo dun, apiya sakun na maawan ako sabap ko kinisaparun iyan rakun ko Kayo na miyakandonsiyan akoron. (giyoto so sabap a kiyapakaliyo iran ko Hawa sa Sorga ko kiya akala kiran o Ibles, matas a totholan san). Imanto na ginawa, ginawa, (kaniya-kaniya), pangilay kano sa kasongowan iyo a salakao rakun, song kano ko Noh (a.s.). . Oriyanoto na somong puman so pagtao ko Noh (a.s.) na phanonun iranon so awida akal iran sa tharoon iranon: Ya Noh, sukai paganay a Nabi ko liyawao Lopa, bithowangka o Allah sa Oripun a Manginginshokor, Shafa'ata kamingka ko Kadunan ka, ilayangkaman na masosowa amiyai, bangka di khamasaiya riyaotan rukamiyai sa tanto rukamiya kapapasangi? . Tharoon o Noh (a.s.): Mataan a so kadunan akun na sabunar a pukhararangitan imanto sa rarangit adaniyandun mipurangit sa inikumbo- kumbodun, nago so duwaa koron na mininduwaa korondun ko Kaom akun. Imanto na Ginawa-Ginawa (kaniya-kaniya) tanodun sa pangilay kano sa kasongowan iyo a salakao rakun. Song kano ko Ibrahim. . Oriyanoto na somong so pagtao ko Ibrahim (a.s.) na phanonun iranon so awida akal iran sa tharoon iranon: Ya Ibrahim, suka so Nabi o Allah nago ginawai niyan ko liyawao Lopa, kapiyaanka na Shafa'ata kamingka ko kadunan ka, bangka di khailaya masosowa amiyai, bangka di khailaya riyaotanai sa kararasayami? . Tharoon o Ibrahim (a.s.): Mataan a so kadunan akun na sabunar a so rarangit iyan imanto na daduna lagid iyan ka daniyandunai mipurangit sa inipoon sa poonan, (rakusa aloyin niyan mambo a kapukhawan iyan sabap sa kiyapakambokhag iyan sa mapiya isako tharoon iyan a so mga barahala na piyamono siran o mala kiran, nago so kiyatharo aniyan sa dipagonot ko occasion o pagtao niyan a kapanakoto kay pukhasakit sukaniyan ogaid na kuna oba pukhasakit a peur, goso dii niyan kambanog sa tohan iyan ko onaan o daniyampun kaNabi [matas a osayan anan]). Oriyan iyan na tharoon iyan ko mga tao a Ginawa-Ginawa (kaniya-kaniya) tanodun imanto. Sa pangilay kano sa kaapasan iyo a salakao rakun, pagapas kano ko Mousa (a.s.). . Oriyanoto na sii puman somong so pagtao ko Mousa (a.s.) na rakusa phanonun iranon puman so awida akal iran sa tharoon iranon: Ya Mousa, suka na Sogo ka o Allah nago piyaka lubi kaniyan ko mga Sogoan iyan ko diingkawon kimbitiyarain mipantag ko mga manosiya, kapiyaan ka na Shafa'ata kamingka ko kadunan ka, bangkadi khailay a masosowa amiyai, bangkadi khailay a riyaotanai sa kararasayami? . Tharoon o Mousa: Mataan a so kadunan akun na sabunar a so rarangit iyan imanto na daduna lagidiyan, daniyampunai mipurangit sa mona nago sa mori, na rakusa aloyen iyan apiya sukaniyan na maawan sabap ko kiyapaka patay niyan sa tao isako dapun maNabi sa kuna oba niyan pithibaba, (matas mambo a totholan san) oriyan iyan na tharoon iyan a imanto na Ginawa-ginawa (kaniya-kaniya) tanodun sa pangilay kano sa kapagapasan iyo a salakao rakun, song kano ko Essa (a.s.). . Oriyanoto na sii puman somong so mga tao ko Essa (a.s.) na phanonun iranon puman so awida akal iran sa tharoon iranon: Ya Essa, suka na Sogo ka o Allah, diingka mimbitiyarai so mga manosiya isako matag ka ikaririga (sanggol) nago katharo a inipansir ko Mariyam na rakuso niyawa niyan, kapiyaan ka na Shafa'ata kamingka ko kadunan ka, bangkadi khailay a masosowa amiyai, bangka di khailaya riyaotanai sa kararasayamiya tanto? . Tharoon o Essah (a.s.): Mataan a so kadunan akun na sabunar a so rarangit iyan imanto na daduna lagidiyan ka daniyampunai mipurangit sa ipoon sa poonan na taman sa mori, tongayduna pukhararangitan, imanto na Ginawa-Ginawa (kaniya-kaniya) tanodun sa pangilay kano sa kasongowan iyowa salakao rakun. Song kano ko Mohammad (s.a.w.). . Oriyanoto na somong so mga tao ko Mohammad salallaho alaihe wasallam na phanonun iranon so awida akal iran sa tharoon iranon: Ya Mohammad, suka na Sogo ka o Allah nago moriporiya Nabi, inirila ruka o Allah so miyaona miyaoriya dosangka, kapiyaan ka na Shafa'ata kamingka ko kadunan ka, bangka di khailaya masosowa amiyai, bangka di khailay a raraotanai sa kararasayamiya tanto? . Oriyanoto na Somong so Nabi tano a Mohammad (s.a.w.) ko Atago 'Ar'sh o Allah na SomoJuod ko Allah, oriyan iyan na bantogun iyan so Allah sa mga bantogan a mga pipiya a daniyanonpun mibantog sa inipoon sa poonan nago dawon mibantog o salakao ron, (so Allah na pukhababayaan iyan a kapumbantogawon, giyotoi sabap aya permero ko mga tao sa alongan a mawri naso mga papasang e katasbeh sa Alhamdulillah, so bantogan na ruk o Allah, marata mapiya e masosowa iran na Alhamdulillah). Oriyan oto na tharoon o Allah: ya Mohammad, poroon ka a Olongka, na panguniyangka e phangunin ka kaan ruka mibugay, Shafa'atangka e Shafa'atunka kaanka maShafa'at, na iporo o Nabi tano a Mohammad (s.a.w.) a olo niyan ko kasoSojuod iyan na tharoon iyan: Ya Rabb, Ommati- Ommati, hay kadunanguko na so mga Omat akun, so mga Omat akun. Na tharoon ko Nabi (s.a.w.): Pakasoluldka ko mga Omat ka ko Sorga sa daduna kapamagitong sii ko Pinto a tomampar sa kawanan a pud ko mga Pinto o Sorga nago so pud ko mga pagtao a mipaagonota iran ko salakao a Pinto a pud ko mga Pinto o Sorga. . . Tanodan: . So paganay a khaSafa'at o Nabi tano a Mohammad (s.a.w.) na didun phamagitongun so mga Amal iran, dirizo serandun sa Sorga. . Kuna oba langon a tao na khaShafa'at o Rasolollah (s.a.w.) ka sabo sa ini-edhinon (pahintulot) o Allah a khaShafa'at iyan. . So mga pud a Nabi na kuna oba aya mitotoro iyan na badaa gagao iran ko madakula tao, ogaid na miyaaloy tano sa mona a tantoduna marugun so butad san nago tonganay a pukhararangitan so Allah na taman ko mga Nabi na owaydun ka katawan iran a phamakasorga siran na maawan sirampun sabap ko karugun o situation. . So punggirao a tomoon o Nabi tano (s.a.w.) a sukaniyan e makanaraka asar ko ditano makanaraka na DIYOTO BUNAR, so Rasolollah (s.a.w.) na miyanagontaman sabap sa kaluk iyan ko Siksa o Allah, aya mataan a khapakay a tharoon tano na tonganay sukaniyan a mala e gagao. . . PAKAIZA: Antawaonon a mga tao e Priority odi na Taralubi a khaSafa'ataon o Rasolollah (s.a.w.)? . Aya sumbag anan na so seranoto a mga Tao a lalayon iran diitharoon so kalemah LAA ILAAHA ILLALLAH sa Ikhlas ko mga Puso iran, kunaoba asar a pukhabals iran ka ikhlas, daa tohan a dait so kasimbaawon inonta na so Allah, daa sakotowa iyan ko kapusimbaawon. . . Para katagoangka sa panginam ko Shafa'at o Nabi tano a Mohammad (s.a.w.) na panamaringka a giya LIMA (5) a pagaloyen tano: . 1- Lalayonangka so kiputasbehun ka ko Laa ilaaha illaLLAH sa Ikhlas ko puso oka. . 2- Lalayonangka so kapusalawatingka ko Rasolollah (s.a.w.), at least, pinaka minus na maka sapolo ko oriyano Maghreb na maka sapolo ko oriyano Sobo. Obangka pumbuthowa so ngaran iyan sa bangka di pukhasalawati nago apiya igera matag ka miyanug so ngaran iyan na pusalawatingka. . 3- Igira miyanug ka so bang, kiphananawagun ko sambayang na purepeat angka so dii tharoon o phagbang inonta so Hayya ala salah goso Hayya alal falah ka aya putharoon ka na La hawla walaa quwwata illa billah. Oriyan iyan na makapasad so miyagbang na batiyaangka so Duwaa ko oriyan iyan. . 4- Phiya-piya ingka so mga Loks pagaringka, pamilyangka, na goso parangayingka na goso mga siringan ka. . 5- Pananggila ingka obangka mipanakoto so Allah nago obaka matay adika mapapadalum ko Eman. Sabap sa di khaSafa'at o Rasolollah (s.a.w.) so mga Kapir, lagido Bapa iyan Abu Talib a miyarasay ron somopurt sa Donya ogaid na miyatay a kuna oba sii miyatay ko Eman na da mapatot ko Nabi (s.a.w.) oba niyan mapakasorga, ayabo a miyagaga niyan na so pinaka makhap a siksa na aya khisiksa ko Abu Talib a maka thatalompa sa Apoy na pundidi a Olo niyan, wal-iyyadho billah. . Mga Oripuno Allah, panguninta ko Allah kiyakowaan iyo sa thoma a tothol tanowai, ikaluk tanodun so Allah ka mataambus ko marugun angkanan a gawii a masisigoradodun a palaya tanosan phaka attend, Thaobat tano ko Allah ka taman sa matatago rukutano so mga niyawa tano sa dapun kapaka talingoma o Sakratol Mawt na katatagoan tano sa panginam ko Sorga. . So mga babay ami a disapung sa Aurat, mapasang e ka- Upload sa toladan na gunukan tanowanan na makaosospak anan ko Agama. So dipusasambayang na taobat tano ko Allah na inggolalan tano sa tarotop so Sambayang. Ikaluk tano so Allah, mananggila tano sa Dosa, simbaan tano sa tarotop ko okit a inisogo iyan rukutano ka antano mamakasulang sa Maliwanag. . ﻭ ﺻﻠﻰ ﺍﻟﻠﻪ ﻭ ﺳﻠﻢ ﻋﻠﻰ ﻧﺒﻴﻨﺎ ﻣﺤﻤﺪ ﻭ ﻋﻠﻰ ﺁﻟﻪ ﻭ ﺻﺤﺒﻪ ﺃﺟﻤﻌﻴﻦ . So LIKE & SHARE na diniyo pulipati, aya mala na giya PAGE tano, balasangkano o Allah sa Mapiya. . Note: so Attached Pic tano na matag anan cover Photo, diyanan phakasaginda ko alongan a mawri.