hokuman o kapangaruma

ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ Mataan a so langowan o bantogan na rk o Allah , bantogn tano skaniyan,nago mamangni tanoron sa tabang,nago mamangni tanoron sa rila,nago ttawbat tanoron, go lomindong tano ko Allah ppoon ko manga rarata ko ginawa tano, goso manga rarata a galbk tano, na sadn sa toroon o Allah na dadn a baon makadadag, nago sadn sa dadagn niyan na dadn a baon makatoro ko ontol,pssakisian akn a da a Tohan a bnar a simbaan a rowar ko Allah a daa sakotowa iyan a isabo, go pssaksian akn a mataan a so Mohammad na oripniyan na go siyogo iyan,sii rkaniyan so sanang nago so kadarayo-rayo a ginawa go sii ko manga pamiliya niyan nago sii ko manga sahaba niyan. Na oriyananan na pinili akn angkai a bandingan sabap ko kala-iyan I kipantag na dimakknal o kadaklan so manga kokoman a madadalmon,na go misasabapon so kapkka adn o madakl a simokt ko kappagingd a aya singanin o langowa kipagi-ikhlas goso langowa dii mamagosay ko agama go sii ko pagtaw na makalbod so kapkka imasada-on, mataan a langowa simokt na igira a piyangilayan sa okit a maliwanag na ppka lbod so kapkka bolongiron, na igira pman a diyara inon nago da tagoa-a sa ginawa na dikkabolongan go badn ppakala a awida akal. Misabap san na inompong akn angkai a bandingan ko sapolo a bandingan: Paganay a bandingan: so maana o kakkaromai Ika dowa a bandingan: so kokoman ko kakkaromai Ika tlo a bandingan: so mga sarat o kakkaromai Ika pat a bandingan: so manga ropaan o bae a mapiya a ppangaromaan Ika lima a bandingan: so manga bae a da pakaya so kapangaromaa kiran Ika nm a bandingan: so kadakla miya pakay apangaromaan Ika pito a bandingan: so madadalm a ongangn ko kakkaromai Ika walo a bandingan: so manga rarad go kokoman a mitotompok ko kakkaromai lagid o: 1] btang (mahar) 2] gasto (nafaqa) 3] tompokan o kambabala iya 4] kattotonganaya 5] kapopowarisa(al-mierath( Ika siyaw a bandingan: so kokoman o kamblablag goso patot a siyapn ko kamblablag. Ika sapolo a bandingan: so mga kokoman a mitotompok ko kamblablag Paganay a bandingan: So maana o kakkakaromai ================== So kakkaromai na: skaniyan so gakot a kapasadan ko kandarodopa, goso kapamakaya ko bae a karoma. Sopman so maana niyan ko osayanon o agama na: skaniyan so kappasada o pndarodopa a dato a go bae sa aya mapipikiron na so kapkkalami- lami o omani isa ko pdiyan sa aya antap na so kaadn o pamiliya a ttatagompiya go so kapaka moayaan o kappagingd a ttatagodaya. Misabap roo na; kiya sabotan tano a knabo oba aya antap ko kakkaromai na kakkalami-lami, ka aya osto na pd sa mala a antapon na so kapaka moayan o pamilya a ttatagompiya goso kappagingd a ttatagodaya. Ogaid na admpan oto a pkki ramig so antap ko isa sa dowa oto sii ko diyangka o btad. ika dowa a bandingan: so kokoman o kakkaromai =================== So kakkaromai ko kababaloy niyan a isosogo , na kabnar a dimipndarainon ko oman I adna kabaya iyan a ndodon so kapakagaga. Go skaniyan na pd sa okit o manga rasul, pittaro o Allah : ﺍﻟﺮﻋﺪ38:ﻭﻟﻘﺪ ﺃﺭﺳﻠﻨﺎ ﺭﺳﻼ ﻣﻦ ﻗﺒﻠﻚ ﻭﺟﻌﻠﻨﺎ ﻟﻬﻢ ﺃﺯﻭﺍﺟﺎ ﻭﺫﺭﻳﺔ.. ]go siyogo ami so manga sogo a pd ko miya- onaanka nago singgayan ami siran sa bagi- aniran a manga karoma go manga moriyatao]al- ra'ad:38 Go mataan a miya mangaroma so Nabi go pittaro iyan: ﺭﻭﺍﻩ ﺍﻟﺒﺨﺎﺭﻱ ﻭﻣﺴﻠﻤﺈﻧﻲ ﺃﺗﺰﻭﺝ ﺍﻟﻨﺴﺎﺀ, ﻓﻤﻦ ﺭﻏﺐ ﻋﻦ ﺳﻨﺘﻲ ﻓﻠﻴﺲ ﻣﻨﻲ ]mataan a diiyako dii mamangaroma ko manga bae, na sadn sa ikagowadiyan so okit akn na dirakn pd]piyanotol I Bokharey go si Muslim Giyotowi sabap a pittaro o manga ulama: ((mataan a so kapangaroma a adna kabayaon na taralbi a diso manga sunat a samba)) sabap sa madadalmon so madakl a kamapiyaa,go mapiya a manga rarad, a pagaloyn tano Insha Allah sangakia a kitab. Go pkkabaloy so kapangaroma a paliogat egira a so mama na titodn a miyaka kkailangan,na ikkawaniyan a ginawa niyan oba makanggola-ola sa haram amay ka di maka pangaroma,na amay ka giyanani btad na miya patoton so kapangaroma ka an marn a giwa niyan ko haram. Go pittaro o Nabi: ﻳﺎ ﻣﻌﺸﺮ ﺍﻟﺸﺒﺎﺏ, ﻣﻦ ﺍﺳﺘﻄﺎﻉ ﻣﻨﻜﻢ ﺍﻟﺒﺎﺀﺓ ﻓﻠﻴﺘﺰﻭﺝ, ﻓﺈﻧﻪ ﺃﻏﺾ ﻟﻠﺒﺼﺮ,ﻭﺃﺣﺼﻦ ﻟﻠﻔﺮﺝ, ﻭﻣﻦ ﻟﻢ ﻳﺴﺘﻄﻊ ﻓﻌﻠﻴﻪ ﺑﺎﻟﺼﻮﻡ ﻓﺈﻧﻪ ﻟﻪ ﻭﺟﺎﺀ ﺭﻭﺍﻩ ﺍﻟﺒﺨﺎﺭﻱ ﻭﻣﺴﻠﻢ ]hay manga ngongoda, sa pakagaga rkano sa gasto na pangaroma, ka mataan a kkibaba iyan so kapangingilayan na go kasiyapiyan so piyamalongan, na sapman sa di pakagaga na powasa ka mataan a pakaogoponoto sa diniyan kaolog ko dosa[ Ika tlo a bandingan: So manga sarat o kakkaromai ===================== Pd sa kapiya na go kaiimpidi ko manga atoran a ka iislami na biyaloy niyan ko kappapasada so manga sarat ka anon maka titikna so kapasadan, na langowa kappapasada na adn a manga saratiyan na di kkatarotop angkotowa kapasadan amay ka da a manga sarat, isanan a marayag a karina sa kaiimpidi ko manga kokoman ko islam, na go kagiya mataan a ppoon ko Allah a lbi a maongangn a mapasang a katawa niyan so ippakapiya o manga kaadniyan, go ipsogo iyan kiran so ppaka ompiya kiran ko donya iran na go so akhiratiran, ka an di kkabaloy so kandadardopa a ilang go kasandagan. Na pd sangkanan a manga kapasadan so kapasadan ko kakkaromai, sa aya manga sarat ko kakkaromai na giyangkai a ppamaka talingoma: 1[ So kapkka bayai o dowa a pndarodopa: sa dikkapakay oba tgla so mama ko bae a diniyan kkababayaan, na dimambo kka tgl so bae ko mama a diniyan kabayaan. Pittaro o Allah: ﺍﻟﻨﺴﺎﺀ19:ﻳﺎ ﺃﻳﻬﺎ ﺍﻟﺬﻳﻦ ﺁﻣﻨﻮﺍ ﻻ ﻳﺤﻞ ﻟﻜﻢ ﺃﻥ ﺗﺮﺛﻮﺍ ﺍﻟﻨﺴﺎﺀ ﻛﺮﻫﺎ ]Hay! Skano a miyamaratiyaya na darkano ma halal so kapangowarisi niyo ko manga bae sa mokit sa tgl] Al-Nissah: 19 Go pittaro o Nabi: ﻻ ﺗﻨﻜﺢ ﺍﻷﻳﻢ ﺣﺘﻰ ﺗﺴﺘﺄﻣﺮ, ﻭﻻﺗﻨﻜﺢ ﺍﻟﺒﻜﺮ ﺣﺘﻰ ﺗﺴﺘﺄﺫﻥ, ﻗﺎﻟﻮﺍ: ﻳﺎﺭﺳﻮﻝ ﺍﻟﻠﻪ ﻭﻛﻴﻒ ﺇﺫﻧﻬﺎ؟ ﻗﺎﻝ: ﺃﻥ ﺗﺴﻜﺖ ﺭﻭﺍﻩ ﺍﻟﺒﺨﺎﺭﻱ ﻭﻣﺴﻠﻢ ]dikkapakay o baniyo pakipangaromaan so bae a balo odi na bitowann taman sa di manonogo, go dikkapakay o baniyo pakipangaromaan so raga taman sa di kaodasan, Tig o manga sahaba: andamanayai a kakkatokawi sa miniyog so raga? Tig o Nabi: a amayka odasan na didn ttaro[ Na ini sapar o Nabi so kapaki pangarumaan ko bae ko diniyan kkabayaan mlagid o raga antawa ka balo odi na bitowann, sa so miyaka sagad sa kakkakaruma na kkapayagiyandn so kakkabaya iyan goso di, sopman so raga na kkasanaandn so diniyan kapttaro a toos sa kiya paka iyogiyan, sabap sa kkapakay a ikaya iyan o baniyan pakarayaga so kakkabaya iyan. Na osangka so raga ko kappangaruma awn na di kkapakay so katglaon apiya anta adn ka bapn sidn si ama iyan, sabap ko kattaro o Rasul : ﻭﺍﻟﺒﻜﺮ ﻳﺴﺘﺄﺫﻧﻬﺎ ﺃﺑﻮﻫﺎ ﺭﻭﺍﻩ ﻣﺴﻠﻢ ]nago so raga na kkaissaan o ama iyan] Na daa dosa o mama iyan odiyan pakipangaromaan amay ka giyanan I masosowa-adi magiyog so raga- sabap sa ska niyan I somiyangka, ogaid na patot ki ama iyan a kasiyapa niyanon nago kapalihara niyanon. Amay ka adna dowa ppanoksam ko raga na go niyan pinili so isa na sa pinili iyan na ayaon kakkawing amay ko ndodon so manga sarat a ittarima ko mama. Amay pman ka daon so sarat na kabnar o wali a sangakaa niyanoto sa daa ba niyanon dosa. -2 so wali: sa dikkasak so kandarodopa a amay ka daa wali; sabap ko kattaro o Nabi ﻻ ﻧﻜﺎﺡ ﺇﻻ ﺑﻮﻟﻲ ﺭﻭﺍﻩ ﺃﺑﻮ ﺩﺍﻭﺩ ﻭﺍﻟﺘﺮﻣﺬﻱ ﻭﺍﺑﻦ ﻣﺎﺟﻪ ]da a kkasak go kkatarima a kakkaromai inontabo o adna wali[ Sa opaki pangaromaan o bae a ginawa niyan sa daa wali na giyoto na batal, mlagid o skaniyandn e miyagonay sa ginawa niyan antaa ka ini powakiliyan sa salakaw a knaba niyan wali. Aya wali na: na ska niyan so mama kiyabaligan a aduna akaliyan a somiyokod a pud sa rogo o bae go kasabala iyan ki ama iyan,lagid o: ama iyan,ama a dato iyan ki ama iyan,so wata iyan a mama(amay ka so bae na balo odi na bitowann a adna wata iyan) So apo iyan a mama apiya ika pira ka apid, so laki niyan sa ina ama, so laki niyan ki ama iyan, so bpa iyan a titto ki ama iyan, so bapa iyan a pagari I amaiyan sa ama, goso manga ttngdiyan minsan ki ama iyan sa sadn sa madasg na aya taralbi. Di maka ppangowali so manga pagari ko ina,goso manga pakiwatan ko pagari ko ina, goso ama dato ko ina,goso manga bapa ko kasabala ko ina, sabap ko knaba siran "asaba" kasabala ko ama. Na sabap sa didn mipndarainon ko kakkawing so wali na mataan a patot ko wali a piliin niyan so taralbi a ndodon so sarat amay ka madakla kkabaya ko bae, na amay pman ka sakatao nago ron ndodon so sarat nago kkabayaaniyan na mataan a miya patot ko wali a pakipangaroma .niyanon Misabap san na malo tano bgan sa osayan so kala a atastanggongan o wali ko nganin a ini sarigon o Allah, mataan a giyoto na sarigon a wajib so kasiyapa niyanon nago so kandaita niyanon ko miya patot a kadadaitanon, na di ron kkapakay o baniyan pagkkapkkapa sa pantag bo ko kakowa niyan ko baya a ginawa niyan, go obaniyan kawinga ko mama a diron mapapatot sa pantag bo sa n'nga sat amok, ka mataan a giyoto na Kandonsiyan, na mataan a pithao o :Allah ﻳﺎ ﺃﻳﻬﺎ ﺍﻟﺬﻳﻦ ﺁﻣﻨﻮﺍ ﻻ ﺗﺨﻮﻧﻮﺍ ﺍﻟﻠﻪ ﻭﺍﻟﺮﺳﻮﻝ ﻭﺗﺨﻮﻧﻮﺍ ﺃﻣﺎﻧﺎﺗﻜﻢ ﻭﺃﻧﺘﻢ ﺗﻌﻠﻤﻮﻥ ﺍﻷﻧﻔﺎﻝ27: ]hay! Skano a miya maratiyaya na diniyo pndonsiyani so Allah ago so sogo iyan, go diniyo pndonsiyani so nganin a inisarig rkano a skano na katawaniyo] Al-anfal:27 Go pittaro iyanpn: ﺇﻥ ﺍﻟﻠﻪ ﻟﺎ ﻳﺤﺐ ﻛﻞ ﺧﻮﺍﻥ ﻛﻔﻮﺭ ﺍﻟﺤﺞ38: ]mataan a so Allah na diniyan kkababayaan so langowa padodonsiyan a moongkir] Al-hajj:38 Go pittaro o Nabi: ﻛﻠﻜﻢ ﺭﺍﻉ, ﻭﻛﻠﻜﻢ ﻣﺴﺌﻮﻝ ﻋﻦ ﺭﻋﻴﺘﻴﻪ ﻣﺘﻔﻖ ﻋﻠﻴﻪ ]Langongkanodn peppagipat, na langongakanodn pagissaan ko ppagipatniyo] Pkka masaan tano so pda manga tao a dirandi plbolbodn so atastanggongan iran, ka apiyadn o adna kkabaya ko warisaniran a ndodon so sarat na diran pagiyogan ka sabap ko baya a ginawa a dikkapno. Na amay ka giayanan e sosowaan o wali na kkaagaw ron so kawawalii ka kittogalin ko maontol a wali o bae sa sadn sa pda tantowa madasg ko Bae na aya taralbi. Ika pat a bandingan: So manga ropaan o bae a mapiya ipndarodopa ================================= Isa a antap ko kapangaroma na kakhalamilami, goso kaadn o pamiliya a mapiya go kappagingd a tatagodaya, lagid o kiya osaya tanoron sa miya ona. Na misabap sangkanan a manga antap na aya patot a ppangaromaan a bae na so kkatanto niyan angkanan a manga antap, a skaniyan so bae a ndodon so dowa a kataid, 1) kataid a kambobolawasan nago 2) kataid a paratiyaya nago parangay a mapiya. So kataid a pkka ilay: na ska niyan so kapiyai kambobolawasan,manisan go mataid, ka amay ka so bae na manisan go mataid,mapiyai kapapanaroan go matanos a phagilayn na pkki taalokon so poso na pkkaliwanagon so rarb na plintadon so pamikiran, na miya tanto so kattaro o Allah: ﻭﻣﻦ ﺁﻳﺎﺗﻪ ﺃﻥ ﺧﻠﻖ ﻟﻜﻢ ﻣﻦ ﺃﻧﻔﺴﻜﻢ ﺃﺯﻭﺍﺟﺎ ﻟﺘﺴﻜﻨﻮﺍ ﺇﻟﻴﻬﺎ ﻭﺟﻌﻞ ﺑﻴﻨﻜﻢ ﻣﻮﺩﺓ ﻭﺭﺣﻤﺔ ﺍﻟﺮﻭﻡ 21: ]na pd sa tanda iyan "Allah" a inadniyan a para ko manga ginawa niyo so manga karoma ka angkanoron maka rrnk go biyaloy niyan ko ndolonaniyo so gagaw nago so ranon]. A- lroom:21 Na aya pman a kataid a dikka ilay: na so agama nago so parangay a mapiya, sa sadn sa kalai agama o bae nago kapiya niyan I parangay na giyotodeni kapiyaniyan nago marani ko mapiya a bobolos. Sa so bae a malai agama na inggogolalaniyan so manga sogoanon o Allah go sisiyapniyan so manga kabnaron I karoma niyan,sii ko igaaniyan,manga wata iyan,manga pattamotamoka niyan, go dii niyan mipagogopa ko manga onot ko Allah ,go mappaka tanodiyan igira a malilipat nago igira boboklen na mappaka kasagiyan go igira a pekkararangitan na mappaka piya niyan a ginawa niyan. Sakamaoto mambo a so bae a bilangataw na lalayon di mangilay sa okit sa kikakadalii niyan sii ki karoma niyan, go pagaadata niyan, na madilapet ko manga sogoanon e karoma niyan, na manananggila ko nganin a di ikkasoat I karoma .niyan Mataan a inizaan so Nabi antawai mapiya ko manga bae? Na pittaro o Nabi : ))ﺍﻟﺘﻲ ﺗﺴﺮﻩ ﺇﺫﺍ ﻧﻈﺮ,ﻭﺗﻄﻴﻌﻪ ﺇﺫﺍ ﺃﻣﺮ, ﻭﻻ ﺗﺨﺎﻟﻔﻪ ﻓﻲ ﻧﻔﺴﻬﺎ, ﻭﻻ ﻣﺎﻟﻪ ﺑﻤﺎ ﻳﻜﺮﻩ(( ]skaniyan so bae a igira a inilay i karoma niyan na peppaka piya ginawa niyan, go oonotaniyan ko sogoaniyan, go diniyan sapakn ko iga aniyan, go diniyan pangonakonaan sii ko tamokiyan ko nganin a diniyan ikkabaya] go ptharo iyan pen: ))ﺗﺰﻭﺟﻮﺍ ﺍﻟﻮﺩﻭﺩ ﺍﻟﻮﻟﻮﺩ, ﻓﺈﻧﻲ ﻣﻜﺎﺛﺮ ﺑﻜﻢ ﺍﻷﻣﻢ(( ]pamangaroma kano sa malai gagaw a go salibata, ka mataan a ipagandisan akn skano ko manga nabi sa kadakli pagtao[. Ika lima a bandingan: So manga bae a miya haram "da mapakay"so kapangarumaa kiran ==================================== Pittaro o Nabi : ))ﺇﻥ ﺍﻟﻠﻪ ﻓﺮﺽ ﻓﺮﺍﺋﺾ ﻓﻼ ﺗﻀﻴﻌﻮﻫﺎ, ﻭﺣﺪ ﺣﺪﻭﺩﺍ ﻓﻼ ﺗﻌﺘﺪﻭﺍ ﻫﺎ(( ]mataan a ini paliyogat o Allah so manga paliogat na obaniyo ilanga, go mitad sa sa manga tamana na obaniyo lawanga]. Sa pd sa manga tamana sii ko agama a inibtad o Allah naso manga tamana ko miya halal nago miya haram ko kandadarodopa, sa sabap sa hiyaram sii ko dato so kapangarumaa niyan ko bae a miyapento sabap ko kadaseg o bangnsa, odi na sabap ko kiyapaka sosowa, odi na sabap ko kiya kkakamonga na goso salakaw san a manga sabap. So piyaka haram so kapangarumaaon ko manga bae na dowa soson: A] piyaka haram sa tanitiyasa: Pittaro o Allah: ﺣﺮﻣﺖ ﻋﻠﻴﻜﻢ ﺃﻣﻬﺎﺗﻜﻢ ﻭﺑﻨﺎﺗﻜﻢ ﻭﺃﺧﻮﺍﺗﻜﻢ ﻭﻋﻤﺎﺗﻜﻢ ﻭﺧﺎﻻﺗﻜﻢ ﻭﺑﻨﺎﺕ ﺍﻷﺥ ﻭﺑﻨﺎﺕ ﺍﻷﺧﺖ ﻭﺃﻣﻬﺎﺗﻜﻢ ﺍﻟﻼﺗﻲ ﺃﺭﺿﻌﻨﻜﻢ ﻭﺃﺧﻮﺍﺗﻜﻢ ﻣﻦ ﺍﻟﺮﺿﺎﻋﺔ ﻭﺃﻣﻬﺎﺕ ﻧﺴﺂﺋﻜﻢ ﻭﺭﺑﺎﺋﺒﻜﻢ ﺍﻟﻼﺗﻲ ﻓﻲ ﺣﺠﻮﺭﻛﻢ ﻣﻦ ﻧﺴﺂﺋﻜﻢ ﺍﻟﻼﺗﻲ ﺩﺧﻠﺘﻢ ﺑﻬﻦ ﻓﺈﻥ ﻟﻢ ﺗﻜﻮﻧﻮﺍ ﺩﺧﻠﺘﻢ ﺑﻬﻦ ﻓﻼ ﺟﻨﺎﺡ ﻋﻠﻴﻜﻢ ﻭﺣﻼﺋﻞ ﺃﺑﻨﺎﺋﻜﻢ ﺍﻟﺬﻳﻦ ﻣﻦ ﺃﺻﻼﺑﻜﻢ ﻭﺃﻥ ﺗﺠﻤﻌﻮﺍ ﺑﻴﻦ ﺍﻷﺧﺘﻴﻦ ﺇﻻ ﻣﺎ ﻗﺪ ﺳﻠﻒ ﺇﻥ ﺍﻟﻠﻪ ﻛﺎﻥ ﻏﻔﻮﺭﺍ ﺭﺣﻴﻤﺎ Paganay ron: so piyaka haram sa tanitiyasa sabap ko bangsa na pito soson: 1-so manga ina: makasosoled san so tittowa ina, goso manga ina a bae mlagid o kasabala ko ina antawa ka sii kasabala ko ama. 2-so manga wata a babay: makasosoled san so tittowa a wata a babay, goso manga babay a apo ko wata a mama,goso manga babay a apo ko wata a babay apiyapen ika pira lapis. 3-so manga babay niyan: makasosoled san so manga babay niyan a titto a lonson sa ina ama, goso manga babay niyan a lonsoniyan bo sa ama, goso manga babay niyan a lonsoniyan bo sa ina. 4-so manga babo a kasabala ko ama: makasosoled san so manga babo a titto, so manga babo I ama iyan, so manga babo o manga ama iyan a dato, goso manga babo I ina iyan, goso manga babo o manga ina iyan a bae. 5-so manga babo ko kasabala ko ina: makasosoled san so manga babo a titto, goso manga babo I ama iyan ko kasabala iyan ki ina iyan, goso manga babo o manga ama iyan a dato ko kasabala iran sa ina, goso manga babo o ina iyan ko kasabala iyan ki ina iyan, goso manga babo o manga ina iyan a bae ko kasabala iran ki ina iran. 6-so manga pakiwataan a babay ko pagari a mama: makasosoled san so manga babay a pakiwtaan a titto ko pagari a lonson sa ina ama, goso manga wata a babay o pagari sa ama, goso manga wata a babay o pagari sa ina, goso manga wata a babay o manga wata iran a mama. 7-so manga pakiwataan a manga babay ko babay niyan: makasosoled san so manga pakiwataan niyan a manga babay ko babay niyan a lonson sa ina ama, goso manga wata a babay o babay niyan sa ama, goso manga wata a babay o babay niyan sa ina, goso manga wata a babay o manga wata a babay o manga pakitaaniyan a mama, goso manga wata a babay o manga pakiwataa niyan a manga babay apiyapen I kababa iyan. Ika dowa: so piyaka haram sabap ko kiya paka sosowa ko sakataw a bae, sa siran a manga babay sa sosowa na lagideden o babay sa bangsa, sabap ko kataro o Nabi: ))ﻳﺤﺮﻡ ﻣﻦ ﺍﻟﺮﺿﺎﻉ ﻣﺎ ﻳﺤﺮﻡ ﻣﻦ ﺍﻟﻨﺴﺐ(( ]piyaka haram so kapangaromaa ko minisosowa sa lagid o kiyapaka harama ko bangsa] ogaid na aden a manga sarat ko kapakasosowa: 1. Mabaloy a maka lima so kiya pakasosowa odi na kasobraan. Sabap ko hadith a miyaka titiyan ko Aisha "radiyallahu anha:" ))ﻛﺎﻥ ﻓﻴﻤﺎ ﺃﻧﺰﻝ ﺍﻟﻘﺮﺁﻥ ﻋﺸﺮ ﺭﺿﻌﺎﺕ ﻣﻌﻠﻮﻣﺘﺎ ﻳﺤﺮﻣﻦ,ﺛﻢ ﻧﺴﺨﻦ ﺑﺨﻤﺲ ﻣﻌﻠﻮﻣﺎﺕ ﻓﺘﻮﻓﻲ ﺭﺳﻮﻝ ﺍﻟﻠﻪ ﻭﻫﻲ ﻓﻴﻤﺎ ﻳﺘﻠﻰ ﻣﻦ ﺍﻟﻘﺮﺁﻥ(( ]aya paganay a initoron na sapolo ka soso, oriyan niyan na miya mansokh sa lima ka soso taman sa miya wapat so Nabi "alayhissalam" sa giyotoden e miyatatap a pkabatiya ko kur'an] 2. Mabaloy so kiya pakasoso a onaan o dapn kapaka sowa koman o wata, amay ka sii ko oriyan o kiya paka sowa iyan koman odi na so sabaadon na sii ko onaan o dapen kapaka sowa koman o wata na so sabaadon na sii ko oriyan o kiya paka sowa iyan koman, na di khanbaloy so bae a ina o wata sa sosowa. Na amay ka madiyangka angkanan a manga sarat na miya baloy so wata a timbang a wata o bae naso manga wata iyan na pagari o piyaka Sa mlagid o miyaona imbawata anta ka miya ori imbawata o Bae a kiyasosowaniyan, go miyabaloy a manga pagari niyan so manga wata o karoma o Bae a kiyasosowaniyan ,mlagid o wata iyan ko Bae a kiyasosowaniyan anta ka manga wata iyan sa isaka babay. Misabap san na miya wadib a katokawan tano a mataan a so manga dadaseg o wata a piyaka soso inontabo so manga mbawataa niyan, na da a kitotompokiran ko kokoman a kasososowa go dikiran paka rarad sa maitobo. Sa kkapakay ko pagari niyan sa bangsa a kapangaromaa niyan ko ina iyan sa sosowa odi na babay niyan sa sosowa. Sa sopeman so sombawataan o wata a piyaka soso na mimbaloy siran a manga wata o Bae a kiyasosowaniyan a goso karomaniyan, go miyabaloy mambo a ama iran so karoma o Bae a kiyasosowan. Ika tlo: so miya haram so kapangaromaon sabap ko kiya kkakamonga, na pat soson: 1- So manga karomao ama goso ama a dato apiyapun I kiporo iyan, sa mlagid o sii kasabala ko ama antawaa ka sii ko ina, sabap ko kattaro o :Allah ﻭﻻ ﺗﻨﻜﺤﻮﺍ ﻣﺎ ﻧﻜﺢ ﺁﺑﺎﺅﻛﻢ ﻣﻦ ﺍﻟﻨﺴﺎﺀ] nago miya haram rkano obaniyo pangaromaa so nganin a miya pangaroma o manga ama iyo a pd ko manga Bae] sa andadun a kakawing o mama sii ko Bae Na mimbaloy a haram ko manga wata iyan so kapangaroma-on,nago miya haram pn ko manga apo iyan a manga mama,mlagid o sii niyan apo ko manga wata iyan a mama antawaa ka sii ko manga wata iyan a manga babay apiyapun I kibaba iyan, go mlagid o kiyasolda niyan antaka da. -2 So manga karomao wata a mama, apiyapni kibaba iyan,sabap ko kattaro o Allah: ﻭﺣﻼﺋﻞ ﺃﺑﻨﺎﺋﻜﻢ ﺍﻟﺬﻳﻦ ﻣﻦ ﺃﺻﻼﺑﻜﻢ ]na go miya haram rkano so manga karoma o manga wata iyo a mama a siran na pd sa bukkokongiyo] sa andadun I kakawing o mama sii ko babay na miyaharam dn ki ama iyan nago sii ko manga ama iyan a dato, apiyapn I kiporo iyan nago apiyapun kasabala ki ama iyan antawa ka sii ki ina iyan, mlagid o kiya soldaniyan antawa ka da. 3- So panogangan a bae goso manga ina a bae o karoma, apiyapn I kiporo iyan, sabap ko kattaro o Allah: ﻭﺃﻣﻬﺎﺕ ﻧﺴﺂﺋﻜﻢ ]na go miya haram rkano so manga ina o manga karoma niyo] sa andadn I kakawing o mama ko bae na na miyabaloy so ina goso manga ina a bae o piyangaroma niyan a haram rka niyan, apiyapn da niyan kasoldi, mlagid o kasabala siran o bae ki ama iyan antawaa ka sii ki ina iyan. 4- So manga patalilowan a manga babay, go maga wata a babay o patalilowan a mama, apiyapun I kibaba iyan goso manga mabawataa niran, sa aya sarat na kiyasolda Niyan so karomaniyan, sa o makamblag siran sa daniyanopmpen kasoldi na na diron kkaharam so manga patalilowaniyan goso manga mbawataa niran, sa mlagid san so patalilowan ko mona miyaka pangaroma ko bae anta ka mori a piayaka pangaromaon. Ika dowa: so piyaka haram sa kunaba tanitiyasa na tlo soson: 1- So manga pagari a babay o karoma, goso manga babo iyan ki ama iyan go sii ki ina iyan, sabap ko kattaro o Allah: ﻭﺃﻥ ﺗﺠﻤﻌﻮﺍ ﺑﻴﻦ ﺍﻷﺧﺘﻴﻦ ﺇﻻ ﻣﺎ ﻗﺪ ﺳﻠﻒ ]go miya haram rkano o ba niyo pakandowayaa so magari inontabo o marending] go sabap ko kattaro o Nabi "alayhis’salaam" )ﻻ ﻳﺠﻤﻊ ﺑﻴﻦ ﺍﻟﻤﺮﺃﺓ ﻭﻋﻤﺘﻬﺎ, ﻭﻻ ﺑﻴﻦ ﺍﻟﻤﺮﺃﺓ ﻭﺧﺎﻟﺘﻬﺎ( ]di mapaka pndowaya so bae ago so babo iyan ki ama iyan go sii ki ina iyan] 2- So ka iidaan ko salakaw; maana amay ka so bae na ka iidaan ko salakaw ron a mama, na diron kkapakay oba niyan pangaromaa taman sa taman sa di mapopos so ida, go diron kkapakay oba niyan panoksami taman sa di mapopos so ida. 3- So magi-ihram sabap ko kapnay kadi odi na kapagomra, sa di kkapakay so kapangaromaa sa bae oto a madadalem ko ihram taman sa di maka kekkang sa ihram. So peman so bae a ndodon so basa, na mapapakay so kapangarom-awn apiyapen ndodon so basa, ogaid na diniyan pasi kkarembang taman sa di maka sotti a bae oto nago maka ppaygo. SO DIYANGKA A KADAKEL A MIYA PAKAY A MAPANGAROMA O DATO ***************** Na mataan a amay ka botawanan so manga dato ko kapangaroma sa da a diyangka iyan na magonga oto sa kabinasaan, nago kapelalalim, nago dikkagaosan so kitonayn ko manga kabnar o siranoto a manga bae, na lagidoto mambo a o tamani sa sasa katao so mappangaroma o dato na magonga mambo sa kamoralaan, nago na kkitana so milolonto a baya a ginawa ko okit a haram, misabap san na pippaparo o Allah so kapangaroma sa pat bo katao, sabap sa giyanani diyangka a marani a magagaos o dato a mitonay niyan so kapaginontolan. Pittaro o Allah: ﻓﺎﻧﻜﺤﻮﺍ ﻣﺎ ﻃﺎﺏ ﻟﻜﻢ ﻣﻦ ﺍﻟﻨﺴﺎﺀ ﻣﺜﻨﻰ ﻭﺛﻼﺙ ﻭﺭﺑﺎﻉ ﻓﺈﻥ ﺧﻔﺘﻢ ﺃﻻ ﺗﻌﺪﻟﻮﺍ ﻓﻮﺍﺣﺪﺓ ] na pangaroma kano sa kkabayaa niyo a ped ko manga bae sa isa,dowa,tlo,pat na amay ka ikkawa niyo obakano di maka paginontolan na tangaan so isa [ Go sii ko masa o Nabi "alayhis'salaam" na kagiya magislam so Gayalan Athaqafie "radiyallaho anho" na sapolo a karoma niyan na siyogo o Nabi katalaka niyan ko sabagion sa lomambaon sa pat katao. Lagidoto mambo so Qays Bin al- Harith "radiyallaho anho" na walo a karoma niyan na inisogoon o Rasul "alayhis'salaam" katalaka niyan ko sabaadon na lambaon sa pat .katao SO MANGA GONA KO KADOWAY *********************** 1-Mataan makikinanglandun sii ko pd a maoola- ola, ibarat: igiramanoto a so BAE na maloden minitolod a idadiyan, odi na pkha sakit na diniyan kibugay ki karoma niyan so kabnariyan ko igaan goso kasakodowiron, sa opama ka sasabardn si mama kasan na ikkawaniyan a ginawa niyan oba maka silay, opman o talaka niyan kai di pakidoway na da baon paka siyap, odi na maka penggaganata siran goso manga moriyatawiran, odi na datokidi o Allah sa moriya tao a BAE oto na opama ka didn miyog sa ba makadoway si mama kasan na maka praks siran a palaya kkapos, na mataan a ayabo a bolong o lagidaya na kandowadoway. 1-So kapangaroma na pkkasabapan sa kapaka dakel o tonganay nago koniksiyon ko manga tao, lagido kiya aloy niyan sa Quran: ﻭﻫﻮ ﺍﻟﺬﻱ ﺧﻠﻖ ﻣﻦ ﺍﻟﻤﺎﺀ ﺑﺸﺮﺍ ﻓﺠﻌﻠﻪ ﻧﺴﺒﺎ ﻭﺻﻬﺮﺍ ﻭﻛﺎﻥ ﺭﺑﻚ ﻗﺪﻳﺮﺍ ]na go ska niyan a Allah I miyadun ko manosiya sa phoon sa ig na biyaloy niyan a inisbap roo so bangsa goso kakhakamonga, mataan a so kadnanka na lubi a gaos], misabap san na so kandowadoway na pkha sabapan ko kaphaka dakul I bangsa nago tonganay, batadi labaw so manga wata aka, giyotowi so Rasul sallallahu alayhi wasallam na inokitaniyan so lagidanan ka isadn a hadap na arap ko kapaka dai-dair o madakul a bangsa. 2-Khasiyapiyan so madakel a bilangan o manga BAE sii ko kada a somisiyap kiran ko kalilindinga kiran,goso kada a somasakodo kiran ko gastowiran goso pud a kailanganiran ko kaphagoyagoyagiran, nago phaka ogop kiran sa kapaka pmomoriyatawiran sa disiran mabaloy a mapos ko dikapama gitonga ko moriyatao, na so agama islam na isosogo iyan so kapumomoriyatao. 4-Khatoon ko manga DATO so manga ayawi rogo, na dikiran paka tiyokop so sakatao a BAE, na sabap ko si aki oto na malai pananggila sa dosa nago oba misomek ko kazina na aya kabaya iyan na sii niyan maosar ko halal na isanan a limo o Allah ko oripniyan sa kiya pakaya niyan ko kandowadoway.